బాలీవుడ్లో మహిళా ప్రధాన ఇతివృత్తాలతో సినిమాలు చేస్తూ అగ్రనాయికల రేసులోకి అడుగుపెట్టింది ఢిల్లీ సొగసరి తాప్సీ. హిందీ, తమిళ భాషల్లో పలు చిత్రాల్లో నటిస్తూ బిజీగా ఉన్న ఈ సుందరి రెండేళ్ల విరామం తర్వాత తెలుగు చిత్రసీమలో పునరాగమనం చేయబోతున్నది. ‘ఏజెంట్ సాయి శ్రీనివాస్ ఆత్రేయ’ చిత్రంతో దర్శకుడిగా ప్రతిభను చాటుకున్నా ఆర్ఎస్జే స్వరూప్ నిర్దేశకత్వంలో మ్యాట్నీ ఎంటర్టైన్మెంట్ పతాకంపై రూపొందుతున్న చిత్రం ‘మిషన్ ఇంపాజిబుల్’. నిరంజన్రెడ్డి, అన్వేష్రెడ్డి ఈ చిత్రాన్ని నిర్మిస్తున్నారు. ఇందులో తాప్సీ కీలక పాత్రలో నటిస్తోంది. మంగళవారం నుంచి ఆమె చిత్రీకరణలో భాగమయ్యారు. చేతికి బ్యాండేజ్ ధరించిన తాప్సీ వర్కింగ్స్టిల్ను చిత్రబృందం విడుదలచేసింది. ‘కథానాయికగా కాకుండా ప్రేక్షకురాలిగా నన్ను నేను తెరపై చూసుకోవడానికి ఇష్టపడే కథల కోసం ఏడేళ్లుగా అన్వేషిస్తున్నా. అలాంటి వాటిలో ఈ సినిమా ఒకటిగా నిలుస్తుంది. కథాబలమున్న నాణ్యమైన చిత్రాలను మాత్రమే చేస్తాను’ అని తాప్పీ తెలిపింది. ఈ చిత్రానికి సంగీతం: మార్క్ కె రాబిన్, సినిమాటోగ్రఫీ: దీపక్ యరగర.