తొక్కలోనే ఎక్కువ!

సపోటాకు తమ్ముడిలా అనిపిస్తూ.. పచ్చని గుజ్జుతో, నల్లని గింజలతో పుల్లపుల్లగా నోరూరించే కివీ పండు అపారమైన పోషకాలకు నిలయం. ఇందులోని విటమిన్‌-సి కమలాపండుకు రెండురెట్లు, ఆపిల్‌ కన్నా అయిదు రెట్లు అధికం. కొవ్వులూ, సోడియం తక్కువగా ఉండటం వల్ల హృద్రోగులూ, మధుమేహులూ సంకోచం లేకుండా తినొచ్చని అంటున్నారు వైద్యులు. దాదాపు 27 రకాల పండ్లలోని పోషకాలు ఒక్క కివీ పండుతో సరిసమానం. అందుకే దీన్ని ‘వండర్‌ ఫ్రూట్‌'గా అభివర్ణిస్తారు.
బరువు తగ్గించుకోవాలనుకునే వారికి కివీ పండు చాలా మంచిది. దీనిలోని యాంటీ ఆక్సిడెంట్స్‌ వల్ల బీపీ, కొలెస్ట్రాల్‌ అదుపులో ఉంటాయి. పీచు పదార్థం, విటమిన్‌-ఇ, పొటాషియం, ఫోలిక్‌ యాసిడ్‌, కెరోటినాయిడ్స్‌ పుష్కలం.
రోజుకు రెండు మూడు కివీ పండ్లు తింటే, నేత్ర సంబంధ వ్యాధులను అడ్డుకోవచ్చు. వయసుతో వచ్చే కణజాల క్షీణతను అరికడుతుంది. క్యాన్సర్‌కు దారి తీసే జన్యు మార్పులను నిరోధించే పదార్థం కివీలలో ఉంటుందని తేలింది. కివీపండు గుజ్జులోకంటే తొక్కలోనే రెట్టింపు పోషకాలు ఉంటాయంటున్నారు నిపుణులు.