ఆదివారం 17 జనవరి 2021
Zindagi - Nov 29, 2020 , 01:56:52

కాపురంలో కలతలా?

కాపురంలో కలతలా?

 మూడో వ్యక్తి జోక్యం లేకుండా, ఒకరు చెప్పకుండా సంసారం సాఫీగా సాగిపోయే మార్గం భార్యాభర్తల చేతుల్లోనే, చేతల్లోనే ఉంటుంది. జీవితంలో చిరాకులు, మనస్పర్థలు తొంగిచూడకుండా ఉండాలంటే ఇదిగో దంపతులిద్దరూ ఈ నాలుగు సూత్రాలూ  పాటించి చూడండి.

1. క్షమాపణ: ఆఫీసు నుంచి ఆలస్యంగా వచ్చిన వేళ, అలకలప్పుడు.. రెండక్షరాల అస్త్రం సంధిస్తే ఇల్లు ఇల్లులాగే ఉంటుంది. శ్రీమతి బహుమతిగా కనిపిస్తుంది. శ్రీవారు శ్రీరాముడనిపిస్తారు. ఆ అస్త్రమే సారీ! ఒక్కసారి ఒక్క సారీ చెప్పినంత మాత్రాన తరిగిపోయేదేమీ ఉండదు. కానీ, ఈ చిన్న మాట భాగస్వామి కోపాన్ని దూదిపింజలా ఎగిరిపోయేలా చేస్తుంది.

2. కృతజ్ఞత: సారీలు చెప్పడానికి మొహమాటపడితే థ్యాంక్స్‌ చెప్పండి. ఎవరికెవరు సాయం చేసుకున్నా.. ‘బాధ్యత కాబట్టి చేశార’ని భావించకుండా.. థ్యాంక్స్‌ అంటూ కృతజ్ఞత వ్యక్తం చేయండి. ఆ రోజంతా ఆల్‌ హ్యాపీసే!

3. మర్యాద: సంసారం సాగరాన్ని భార్యాభర్తలిద్దరూ కలిసి సమంగా ఈదాలి. ఇలా జరగాలంటే ఒకరికొకరు మర్యాదలు ఇచ్చిపుచ్చుకోవాలి. ఎవరి మర్యాదకు భంగం వాటిల్లినా.. ఆ సంసారం దుఃఖ సాగరం అవుతుంది.

4. సమభాగం: దాంపత్య జీవితంలో ఇద్దరూ సమానమే. నేను ఎక్కువ, నువ్వు తక్కువ అన్న పేచీ మొదలైందా.. ఒకరి దృష్టిలో మరొకరు దిగజారి పోవాల్సి వస్తుంది.  ఆ పరిస్థితి ఎదురవ్వొద్దనుకుంటే.. ఇద్దరం చెరి సగమనే భావన మనస్ఫూర్తిగా కలగాలి.