సొగసైన కవర్ డ్రైవ్లు.. అంతకుమించిన పుల్ షాట్లు!! ఒక్కటేమిటి క్రికెట్ పుస్తకంలో ఉన్న షాట్లన్నింటినీ అచ్చుగుద్దినట్లు పృథ్వీ షా ఆచరణలో పెడుతుంటే.. కోల్కతా బౌలర్లు చేష్టలుడిగి చూస్తుండిపోయారు. ఈ యువ ఓపెనర్ సృష్టించిన పరుగుల వరదలో కోల్కతా నిర్దేశించిన లక్ష్యం చిన్నబోగా.. ఐదో విజయం నమోదు చేసుకున్న ఢిల్లీ పాయింట్ల పట్టికలో రెండో స్థానానికి ఎగబాకింది.
అహ్మదాబాద్: యువ ఓపెనర్ పృథ్వీ షా (41 బంతుల్లో 82; 11 ఫోర్లు, 3 సిక్సర్లు) కోల్కతా బౌలర్లను చెడుగుడాడుకోవడంతో నైట్రైడర్స్పై ఢిల్లీ క్యాపిటల్స్దే పైచేయి అయింది. గురువారం జరిగిన పోరులో ఢిల్లీ 7 వికెట్ల తేడాతో గెలుపొందింది. మొదట కోల్కతా 20 ఓవర్లలో 6 వికెట్లకు 154 పరుగులు చేసింది. శుభ్మన్ గిల్ (43) ఫర్వాలేదనిపించగా.. డేంజర్ మ్యాన్ రస్సెల్ (27 బంతుల్లో 45 నాటౌట్; 2 ఫోర్లు, 4 సిక్సర్లు) ధాటిగా ఆడాడు. అనంతరం లక్ష్యఛేదనలో ‘మ్యాన్ ఆఫ్ ది మ్యాచ్’ పృథ్వీ షా, శిఖర్ ధవన్ (46) దంచికొట్టడంతో ఢిల్లీ 16.3 ఓవర్లలో 3 వికెట్లు కోల్పోయి 156 పరుగులు చేసింది.
బౌండ్రీల మోత..
ఓ మాదిరి లక్ష్యఛేదనలో ఢిల్లీకి మెరుపు ఆరంభం లభించింది. మావి వేసిన తొలి ఓవర్లో పృథ్వీ ఆరు ఫోర్లు అరుసుకోవడంతోనే మ్యాచ్ ఢిల్లీ వైపు మొగ్గింది. ధవన్ కూడా బ్యాట్కు పనిచెప్పడంతో 4 ఓవర్లు ముగిసేసరికి ఢిల్లీ 57/0తో నిలిచింది. ఈ క్రమంలో పృథ్వీ 18 బంతుల్లో అర్ధశతకం పూర్తి చేసుకున్నాడు. తొలి వికెట్కు 132 పరుగులు జోడించాక ధవన్ ఔట్ కాగా.. పంత్ (16) ధాటిగా ఆడి పృథ్వీకి సెంచరీ చేసే చాన్స్ లేకుండా చేశాడు. వీరిద్దరినీ కమిన్స్ ఒకే ఓవర్లో ఔట్ చేసినా అప్పటికే ఆలస్యమైపోయింది.
రస్సెల్ రాణించినా..
టాస్ ఓడి బ్యాటింగ్కు దిగిన కోల్కతా నాలుగో ఓవర్లోనే నితీశ్ రాణా (15) వికెట్ కోల్పోయింది. అయినా గిల్ ఆచితూచి ఆడటంతో పవర్ప్లే ముగిసే సరికి మోర్గాన్ సేన 45/1తో నిలిచింది. రాహుల్ త్రిపాఠి (19)ని స్టొయినిస్ బుట్టలో వేసుకోగా.. లలిత్ యాదవ్ ఒకే ఓవర్లో మోర్గాన్ (0), నరైన్ (0)ను పెవిలియన్ బాట పట్టించాడు. ఫలితంగా 11 ఓవర్లు ముగిసేసరికి కోల్కతా 75/4తో కష్టాల్లో పడింది. కాసేపటికే గిల్ కూడా ఔట్ కాగా.. దినేశ్ కార్తీక్ (14) పెద్దగా ప్రభావం చూపలేకపోయాడు. ఆఖర్లో రస్సెల్ భారీ షాట్లకు దిగడంతో కోల్కతా ఆ మాత్రం స్కోరు చేయగలిగింది.
స్కోరు బోర్డు
కోల్కతా: రాణా (స్టంప్డ్) పంత్ (బి) అక్షర్ 15, గిల్ (సి) స్మిత్ (బి) అవేశ్ 43, త్రిపాఠి (సి) లలిత్ (బి) స్టొయినిస్ 19, మోర్గాన్ (సి) స్మిత్ (బి) లలిత్ 0, నరైన్ (బి) లలిత్ 0, రస్సెల్ (నాటౌట్) 45, కార్తీక్ (ఎల్బీ) అక్షర్ 14, కమిన్స్ (నాటౌట్) 11, ఎక్స్ట్రాలు: 7, మొత్తం: 154/6. వికెట్ల పతనం: 1-25, 2-69, 3-74, 4-75, 5-82, 6-109, బౌలింగ్: ఇషాంత్ 4-0-34-0, రబడ 4-0-31-0, అక్షర్ 4-0-32-2, అవేశ్ 4-0-31-1, లలిత్ 3-0-13-2, స్టొయినిస్ 1-0-7-1.
ఢిల్లీ: పృథ్వీ షా (సి) రాణా (బి) కమిన్స్ 82, ధవన్ (ఎల్బీ) కమిన్స్ 46, పంత్ (సి) మావి (బి) కమిన్స్ 16, స్టొయినిస్ (నాటౌట్) 6, హెట్మైర్ (నాటౌట్) 0, ఎక్స్ట్రాలు: 6 మొత్తం: 16.3 ఓవర్లలో 156/3. వికెట్ల పతనం: 1-132, 2-146, 3-150, బౌలింగ్: మావి 1-0-25-0, వరుణ్ 4-0-34-0, కృష్ణ 3.3-0-36-0, నరైన్ 4-0-36-0, కమిన్స్ 4-0-24-3.