వాషింగ్టన్: ఎలెక్ట్రిక్ కార్ల కంపెనీ టెస్లా అధినేత ఎలాన్ మస్క్ (49) బ్లూంబెర్గ్ ప్రపంచ కుబేరుల జాబితాలో రెండో స్థానాన్ని కోల్పోయారు. లూయీ వ్యూటన్ అధిపతి బెర్నార్డ్ ఆర్నాల్ట్ (72) ఆ స్థానంలోకి ఎగబాకారు. మస్క్ షేర్ల ధర 2.2 శాతం తగ్గిపోవడమే ఇందుకు కారణం. గతవారం టెక్నాలజీ షేర్లు పడిపోవడం వల్ల మస్క్ ఆస్తుల విలువ గత జనవరి నాటికంటే 24 శాతం తగ్గి 160.6 బిలియన్ డాలర్ల వద్ద నిలిచింది. భారత కరెన్సీలో ఇది 12 లక్షల కోట్ల పైచిలుకే. గత మార్చిలో కొద్దిరోజుల పాటు మస్క్ నంబర్ వన్ స్థానంలో నిలిచారు కూడా. కాగా చైనాలో, ఆసియాలోని ఇతర భాగాల్లో లగ్జరీ గూడ్స్ దిగ్గజం లూయీ వ్యూటన్ అమ్మకాలు భారీగా పెరుగడంతో ఆ సంస్థ అధిపతి ఆర్నాల్ట్ నికర ఆస్తి విలువ 4700 కోట్ల డాలర్లు పెరిగి 161.2 బిలియన్ డాలర్లకు చేరుకుంది. మస్క్ సంపదన కన్నా ఇది కొంచెమే ఎక్కువ. దాంతో ఆర్నాల్ట్ ప్రపంచ కుబేరుల్లో నంబర్-టూ స్థానాన్ని దక్కించుకున్నారు.