మంగళవారం 19 జనవరి 2021
Warangal-rural - Dec 05, 2020 , 02:17:06

యాసంగిలో ఆరుతడి, కూరగాయల పంటలు అనుకూలం

యాసంగిలో ఆరుతడి, కూరగాయల పంటలు అనుకూలం

  • మక్కజొన్నను సాగు చేయొద్దు 
  • జిల్లా వ్యవసాయాధికారి ఉషాదయాళ్‌

కలెక్టరేట్‌ : ఈ సంవత్సరం యాసంగిలో ఆరుతడి పంటలు, కూరగాయల పంటలు సాగు చేయడానికి రూరల్‌ జిల్లాలోని నేలలు అనుకూలమని జిల్లా వ్యవసాయ శాఖ అధికారి ఉషాదయాళ్‌ రైతులకు సూచించారు. ఈ సందర్భంగా ఆమె విలేకరులతో మాట్లాడుతూ ఆరుతడి పంటలైన వేరుశనగ, నువ్వులు, పొద్దుతిరుగుడు, కుసుమలు, పెసర, మినుములు, చిరు ధాన్య పంటలైన జొన్న, సజ్జ, రాగి, కొర్రలు, కూరగాయల పంటలకు జిల్లాలోని నేలలు అనుకూలమని తెలిపారు. రైతులందరూ నేలను బట్టి, నీటి వనరులను బట్టి అనువైన పంటలను ఎంపిక చేసుకుని సాగు చేయాలని సూచించారు.  గత సంవత్సరంలో కొనుగోలు చేసిన మక్కజొన్న నిల్వలు ఎక్కువగా ఉండడం వల్ల దానికి మద్ధతు ధర లభించక రైతులు నష్ట పోయే ప్రమాదం ఉందని తెలిపారు. ప్రభుత్వ సూచన మేరకు ఈ సారి యాసంగిలో మక్కజొన్న సాగు చేయవద్దని సూచించారు. కాగా, పెసర, మినుము, చిరుధాన్య పంటల విత్తనాలు కావాల్సిన రైతులు తమ క్లస్టర్‌ వ్యవసాయ శాఖ అధికారులను కలిసి పేర్లు నమోదు చేసుకోవాలని సూచించారు. దీంతో జాతీయ ఆహార భద్రతా పథకం కింద రాయితీపై అర్హులైన వారికి విత్తనాలు సరఫరా చేయడంతోపాటు ఈ పథకం కింద అడవి జంతువుల నుంచి పంటలను కాపాడుకోవడానికి 50 శాతం రాయితీపై అకౌస్టిక్స్‌ కూడా సరఫరా చేయనున్నట్లు వివరించారు. రైతులు దీనిని సద్వినియోగం చేసుకోవాలని కోరారు.