అనేక సంప్రదాయ కేశ తైలాలు మార్కెట్లో లభిస్తున్నాయి. ఇవి జుట్టుకు కావాల్సిన పోషణను అందిస్తాయి. నిగారింపును ఇస్తాయి. తలకు, మాడుకు చల్లదనాన్నిప్రసాదించి చుండ్రును నివారిస్తాయి.
కొబ్బరి నూనె: కేశాల పోషణలో కొబ్బరి నూనె ప్రధానమైంది. దీనిలోని ఒమేగా 3 యాసిడ్స్ వెంట్రుకల మూలాలకు శక్తిని అందిస్తాయి. జుట్టు ఒత్తుగా, వేగంగా పెరుగడానికి సాయపడుతాయి. కొబ్బరి నూనెను నిమ్మరసంతో కలిపి, తలకు పట్టించి ఓ గంట తర్వాత తలస్నానం చేస్తే జుట్టు పట్టులా మెరుస్తుంది. కొబ్బరి నూనెలో మందార పువ్వులు వేసి, వేడి చేసి తలకు పట్టించడం వల్ల జుట్టు రాలడాన్ని అరికట్టవచ్చు.
ఆవ నూనె: మందపాటి, నల్లటి జుట్టు పొందాలంటే ఆవనూనే దిక్కు. ఈ తైలం తలలో రక్త ప్రసరణను పెంచి జుట్టు పెరగడానికి సహాయపడుతుంది.
బాదం నూనె: ఈ నూనెలో విటమిన్- ఇ పుష్కలం. కొబ్బరి, ఉసిరి మాదిరిగానే పోషక శక్తి ఉంటుంది. త్వరగా జుట్టు పెరగాలనుకొనే వారు రోజూ తలకు పట్టిస్తే మంచి ఫలితం ఉంటుంది.
ఆముదం నూనె: ఈ నూనెకూడా జుట్టు పెరుగుదలకు సహాయపడుతుంది. వారానికి రెండుసార్లు తలకు మసాజ్ చేయడం వల్ల జుట్టు రాలడాన్ని అరికట్టవచ్చు. జుట్టు కళకళలాడేలా చేస్తుంది.
మందార నూనె: కేశాలను మొదళ్ళనుండి బలోపేతం చేస్తుంది. ఎండలో తిరగడం వల్ల; దుమ్మూ ధూళీ, వేడివల్ల జుట్టు గోధుమ రంగులోకి మారుతుంది. ఈ నూనె రంగు మారకుండా నిరోధిస్తుంది.
బృంగరాజ్ తైలం: ఈ నూనెతో మాడుమీద మసాజ్ చేయడం వల్ల తలలో ఇన్ఫెక్షన్స్ రావు. ఇది చుండ్రుని అరికడుతుంది. జుట్టు బూడిద రంగులోకి మారకుండా చేస్తుంది. వేసవిలో చల్లదనాన్ని ఇస్తుంది.
ఉల్లిగింజల నూనె: ఉల్లిపాయలో కేశ సంరక్షణకు పనికొచ్చే చాలా పోషకాలున్నాయి. ఉల్లిపాయ రసం జుట్టు పెరుగుదలకు, పోషణకు తోడ్పడుతుంది. ఉల్లిపాయ రసాన్ని తేనెతో కలిపి పట్టించడం వల్ల వెంట్రుకలు రాలడాన్ని అరికట్టవచ్చు.
ఆలివ్ ఆయిల్: ఆలివ్ ఆయిల్ను కొబ్బరి నూనెతో కలిపి వారానికి రెండుసార్లు జుట్టుకి పట్టిస్తే మంచి ఫలితం ఉంటుంది. తరచూ ఇలా చేయడం వల్ల కేశ సమస్యలు తొలగిపోతాయి. వెంట్రుకలు నిగనిగలాడుతాయి.