మీ వయస్సు 20 దాటితే క్రమం తప్పకుండా పరీక్షలు అవసరం
20-40 సంవత్సరాల వయసుగల స్త్రీలు ప్రతి 3 సంవత్సరాలకు ఒకసారి డాక్టర్చే స్థనాలను పరీక్ష చేయించుకోవాలి. 40 సంవత్సరాలు పైబడిన స్త్రీలు ప్రతీ సంవత్సరం పరీక్ష చేయించుకోవాలి. 40-49 సంవత్సరాల వయసు గల స్త్రీలు ప్రతీ రెండేండ్ల కొకసారి డిజిటల్ మామ్మోగ్రఫీద్వారా పరీక్ష చేయించుకోవాలి. 50 ఏండ్లు పైబడిన స్త్రీలు ప్రతి సంవత్సరం డిజిటల్ మామ్మోగ్రఫీ ద్వారా పరీక్ష చేయించుకోవాలి.
నియంత్రించలేని కారణాలు: బ్రెస్ట్ క్యాన్సర్ విషయంలో నియంత్రణలో లేని కారకాల గురించి తెలుసుకుందాం.
లింగము: మగవారిలోకన్నా ఆడవారిలో బ్రెస్ట్ క్యాన్సర్ ఎక్కువగా వస్తుంది.
వయసు: వయసు అనేది మరొక అతిపెద్ద క్యాన్సర్ కారకం. మీ వయసు ఎంత ఎక్కువగా ఉంటే క్యాన్సర్ ప్రమాదం అంత ఎక్కువగా ఉంటుంది. నిపుణుల అధ్యయనంలో తేలింది ఏమిటంటే, ‘30 నుండి 39 సంవత్సరాల వయసుగల స్త్రీలలో ప్రతి 233 మందిలో ఒకరికి బ్రెస్ట్ క్యాన్సర్ వచ్చే అవకాశం ఉంది’. అయితే, వయసు 60 పైబడిన స్త్రీలలో ప్రతి 27 మందిలో ఒకరికి బ్రెస్ట్ క్యాన్సర్ వస్తున్నది.
కుటుంబ నేపథ్యం: మీ దగ్గరి బంధువులకు (అమ్మ, సోదరి, కూతురు) క్యాన్సర్ ఉన్నైట్లెతే మీకుకూడా వచ్చే అవకాశం మరింత పెరుగుతుంది.
వ్యక్తిగత నేపథ్యం: మీకు ఇదివరకే బ్రెస్ట్ క్యాన్సర్ ఉన్నట్లయితే అదే బ్రెస్ట్లో కానీ, పక్క బ్రెస్ట్లో కానీ మరల క్యాన్సర్ వచ్చే అవకాశాలు ఎక్కువగా ఉంటాయి.
జాతి: నల్లజాతి స్త్రీలతో పోలిస్తే తెల్లజాతి స్త్రీలలో బ్రెస్ట్ క్యాన్సర్ వచ్చే అవకాశం మరింత ఎక్కువ.
ఈస్ట్రోజన్: ‘ఈస్ట్రోజన్ హార్మోన్’ స్థనాల్లోని కణాలను ఉత్తేజ పరుస్తుంది. దీర్ఘకాలం పాటు ఈస్ట్రోజన్ హార్మోన్కు గురికావడం వల్ల బ్రెస్ట్ క్యాన్సర్ పెరిగే అవకాశం ఎక్కువ. ఈస్ట్రోజన్ నియంత్రణ కొన్నిసార్లు మన చేతుల్లో ఉండదు. ఉదా॥కు చిన్నవయసులోనే అంటే 12 సంవత్సరాలకన్నా తక్కువ వయసులోనే నెలసరి ప్రారంభం కావటం, అదే విధంగా 55 సంవత్సరాల తర్వాత బహిష్టు ఉడిగిపోవడం (మెనోపాజ్), అంటే దీర్ఘకాలం పాటు నెలసరి కొనసాగితే క్యాన్సర్ వచ్చే అవకాశం కూడా అంతే ఎక్కువ. అదే విధంగా, బయటి వాతావరణం నుండి శరీరంలోకి ప్రవేశించే ఈస్ట్రోజన్. ఉదా: మాంసాహారంలోని హార్మోన్లు, ఇతర ఆహార పదార్థాలలోని పురుగు మందుల అవశేషాలు మన శరీరంలో ఈస్ట్రోజన్ను పోలిన అవశేషాలను విడుదల చేస్తాయి.
గర్భం మరియు స్థనపానం: గర్భం మరియు స్థనపానం అనేవి నెలసరుల సంఖ్యను తగ్గిస్తాయి. తద్వారా క్యాన్సర్ ముప్పును కూడా తగ్గిస్తాయి. 30 సంవత్సరాలు పైబడే వరకు గర్భం ధరించని స్త్రీలకు లేదా అసలు గర్భం ధరించని స్త్రీలకు బ్రెస్ట్ క్యాన్సర్ వచ్చే అవకాశం ఎక్కువ.
దీర్ఘకాలం పాటు అంటే ఒకటిన్నర లేదా రెండు సంవత్సరాల వరకు స్థన్యం ఇచ్చే తల్లులకు కూడా బ్రెస్ట్ క్యాన్సర్ వచ్చే అవకాశం తక్కువ. అయితే, అంత సుదీర్ఘ కాలం పాటు స్థన్యం ఇవ్వడం ఈ రోజులలో సాధ్యం కావడం లేదు. మనం ఎన్ని జాగ్రత్తలు తీసుకున్నా (మంచి ఆహారపు అలవాట్లు, వ్యాయామం) మన చేతిలో లేని పైన పేర్కొన్న అనేక కారణాలవల్ల ‘బ్రెస్ట్ క్యాన్సర్’ వస్తుంది. బ్రెస్ట్ క్యాన్సర్ వచ్చినప్పుడు అదేదో మనం చేసిన తప్పిదం వల్ల వచ్చినట్టుగా క్రుంగిపోవడం తగదు.
సాధారణంగా బ్రెస్ట్ క్యాన్సర్ అనేది ‘కణతుల’ రూపంలో బయటపడుతుంది. ఈ కణతులు నొప్పి లేకుండాను, గట్టిగాను, సమానమైన అంచులు లేకుండా ఉంటాయి. మరికొన్నిసార్లు మెత్తగా, సమానంగా ఉంటాయి. కాబట్టి, స్థనాలలో ఏ మాత్రం మార్పు కనిపించినా వెంటనే డాక్టరుకు చూపించుకోవడం మంచిది. సాధారణంగా బ్రెస్ట్ క్యాన్సర్ సోకినపుడు ఈ క్రింద పేర్కొన్న విధంగా మార్పులు సంభవిస్తాయి.
స్థనాలలో వాపు, ఇరిటేషన్, స్థనాలలో నొప్పి, చనుమొనలలో నొప్పి, చనుమొనలు లోపలికి క్రుంగిపోవడం, ఎరుపెక్కడం, స్థనాలు, చనుమొనలు మొద్దుబారి పోవడం, చనుమొనల నుండి పాలు కాకుండా ఇతర ద్రవాలు స్రవించడం, చంకలు క్రింది భాగంలో గడ్డలు ఉండటం మొదలైనవి. అయితే, అన్ని రకాల గడ్డలు క్యాన్సర్ కాకపోవచ్చు. కాబట్టి, డాక్టర్చే క్షుణ్ణంగా పరీక్ష చేయించుకుని నిర్ధారించుకోవడం మంచిది. క్యాన్సర్ను ఎంత ముందుగా గుర్తిస్తే అంత సులువుగా చికిత్స చేయవచ్చు. క్యాన్సర్ను ముందుగా గుర్తించడానికి ఎప్పటికప్పుడు పరీక్షించుకోవడమే సరైన మార్గం. 20 సంవత్సరాల వయసు దాటిన స్త్రీలు ప్రతినెలా స్థనాలను స్వయంగా పరీక్షించుకోవాలి. 20-40 సంవత్సరాల వయసుగల స్త్రీలు ప్రతి 3 సంవత్సరాలకు ఒకసారి డాక్టర్చే స్థనాలను పరీక్ష చేయించుకోవాలి. 40 సంవత్సరాలు పైబడిన స్త్రీలు ప్రతీ సంవత్సరం పరీక్ష చేయించుకోవాలి. 40-49 సంవత్సరాల మయసు గల స్త్రీలు ప్రతీ రెండేండ్ల కొకసారి డిజిటల్ మామ్మోగ్రఫీద్వారా పరీక్ష చేయించుకోవాలి. 50 ఏండ్లు పైబడిన స్త్రీలు ప్రతి సంవత్సరం డిజిటల్ మామ్మోగ్రఫీ ద్వారా పరీక్ష చేయించుకోవాలి. డిజిటల్ మామ్మోగ్రఫీ అనేది డిజిటల్ రెసెస్టర్ మరియు కంప్యూటర్కి అనుసంధానించిన ఆధునిక ఎక్స్రే మెషీన్.
దీనిద్వారా అత్యంత సులువుగా, వేగంగా బయాప్సీ చేయవచ్చు. మరీ ముఖ్యంగా ఇప్పుడు వస్తున్న అధునాతన డిజిటల్ మామ్మోగ్రఫీ మెషీన్స్లో వచ్చే బెడ్వల్ల కూర్చుని లేదా పడుకుని కూడా అత్యంత వేగంగా బయాప్సీని సేకరించవచ్చు. మామ్మోటోమ్ వంటి వాక్యూమ్ పవర్డ్ పరికరాలవల్ల అత్యంత కచ్చితంగా మల్టిపుల్ బయాప్సీ చేయవచ్చు.
డాక్టర్ మోహనవంశీ
చీఫ్ సర్జికల్ ఆంకాలజిస్ట్, ఒమేగా హాస్పిటల్స్
హైదరాబాద్: 9848011421
కర్నూల్: 08518-273001
గుంటూర్: 0863-2223300