ముజఫర్నగర్ : జర్మనీలో జరిగిన జూనియర్ షూటింగ్ వరల్డ్ ఛాంపియన్షిప్లో సిల్వర్ మెడల్ పొందిన నేహ తోమర్(21) యూపీ పంచాయతీ ఎన్నికల బరిలో నిలిచారు. భారత్ తరపున పలు అంతర్జాతీయ క్రీడా ఈవెంట్లలో సత్తా చాటిన నేహ తమ గ్రామాభివృద్ధిలో పాలుపంచుకోవాలని భావిస్తున్నారు. ముజఫర్నగర్ జిల్లా మఖియాలి పంచాయతీ ఎన్నికల్లో గ్రామ సర్పంచ్ అభ్యర్ధిగా ఆమె నామినేషన్ దాఖలు చేశారు.
పుట్టిన గ్రామాన్ని అభివృద్ధి పధంలో నడిపించాలని తాను కోరుకుంటున్నానని, తమ ప్రాంత యువతలో క్రీడలను ప్రోత్సహిస్తానని, గ్రామ సర్పంచ్గా ఎన్నో పనులు చేపట్టేందుకు తనకు వెసులుబాటు కలుగుతుందని నేహ చెబుతున్నారు. తమ గ్రామం నుంచి ఎన్నో మైళ్ల దూరంలో ఉన్న దుస్తుల ఫ్యాక్టరీలకు పనిచేసేందుకు తమ మహిళలు, బాలికలు వెళుతున్నారని, వారి కోసం శిక్షణా కేంద్రం, పని ప్రదేశాలను ఏర్పాటు చేయాలని కోరుకుంటున్నానని ఆమె చెప్పుకొచ్చారు. నేహ ప్రస్తుతం ముజఫర్నగర్లోని డీఏవీ కాలేజ్ నుంచి డిగ్రీ చదువుతున్నారు.