శుక్రవారం 14 ఆగస్టు 2020
Vikarabad - Jan 20, 2020 , 02:48:48

గులాబీ జెండా ఎగురేస్తాం

గులాబీ జెండా ఎగురేస్తాం


వికారాబాద్‌ జిల్లా ప్రతినిధి, నమస్తే తెలంగాణ : తొలిసారి ఎన్నికలు జరుగుతున్న పరిగి మున్సిపాలిటీ చైర్మెన్‌ పీఠాన్ని చేజిక్కించుకునే దిశగా టీఆర్‌ఎస్‌ పార్టీ ముందుకెళ్తుంది. పరిగి నియోజకవర్గంలో ఏ ఎన్నికలు జరిగినా అధికార పార్టీదే హవా కొనసాగుతుంది. అయితే జోరుమీదున్న గులాబీ పార్టీకి మున్సిపల్‌ ఎన్నికల్లోనూ ఎదురులేదనే చెప్పవచ్చు. పరిగి మున్సిపాలిటీలో అన్ని వార్డుల్లో గెలుపొంది క్లీన్‌స్వీప్‌ చేసేందుకు టీఆర్‌ఎస్‌ అభ్యర్థులకు మద్దతుగా స్థానిక ఎమ్మెల్యే కొప్పుల మహేశ్‌రెడ్డితోపాటు ఆయన సతీమణి ప్రతిమారెడ్డి, సోదరుడు అనిల్‌రెడ్డి, పార్టీ ముఖ్య నేతలు ఇంటింటికి తిరుగుతూ జోరుగా ప్రచారం చేస్తున్నారు. ప్రజల నుంచి ఎలాంటి స్పందన వస్తుంది, ప్రచారంలో భాగంగా ప్రజలకు ఏయే హామీలిస్తున్నారు, సంబంధిత మున్సిపాలిటీ అభివృద్ధికి ఎలాంటి ప్రణాళికలు రూపొందించారు, ఎన్నికల్లో ప్రతిపక్షాల నుంచి ఎలాంటి పోటీ ఉంది తదితర అంశాలపై ఎమ్మెల్యే కొప్పుల మహేశ్‌రెడ్డితో ‘నమస్తే తెలంగాణ’ ప్రతినిధి ప్రత్యేక ఇంటర్వ్యూ...

నమస్తే తెలంగాణ : పరిగి మున్సిపాలిటీ తొలి చైర్మన్‌ పీఠం ఎవరికి దక్కనుంది?

ఎమ్మెల్యే : తొలిసారి ఎన్నికలు జరుగనున్న పరిగి మున్సిపాలిటీపై టీఆర్‌ఎస్‌ జెండా ఎగురవేస్తాం. మున్సిపాలిటీలోని 15 వార్డుల్లో గెలుపొంది క్లీన్‌స్వీప్‌ చేసేందుకు ముమ్మర ప్రయత్నాలు చేస్తున్నాం. ఉదయం నుంచి రాత్రి వరకు నాతోపాటు ఎంపీ రంజిత్‌రెడ్డి, మున్సిపాలిటీతోపాటు అన్ని మండలాల ముఖ్య నేతలు పార్టీ అభ్యర్థుల తరపున ప్రచారం చేస్తున్నారు.

నమస్తే తెలంగాణ : ప్రచారంలో భాగంగా ప్రజల నుంచి ఎలాంటి స్పందన వస్తుంది?

ఎమ్మెల్యే : అన్ని వర్గాల ప్రజల నుంచి మంచి స్పందన వస్తుంది. ప్రచారంలో భాగంగా పరిగి మున్సిపాలిటీలోని అన్ని వార్డుల్లో ఇంటింటికి వెళ్లి ప్రచారం చేశాం. ఎక్కడికెళ్లినా ప్రజలు బ్రహ్మరథం పడుతున్నారు. టీఆర్‌ఎస్‌ అభ్యర్థులనే గెలిపిస్తామంటూ హామీ ఇస్తున్నారు. టీఆర్‌ఎస్‌ ప్రభుత్వం అధికారంలోకి వచ్చిన అనంతరం రూ.200, రూ.500 ఉన్న పింఛన్లను పార్టీ అధికారం చేపట్టిన అనంతరం రూ.1000, రూ.1500లకు పెంచడం, పేదింటి ఆడబిడ్డల పెండ్లిళ్లకు కల్యాణలక్ష్మి, షాదీ ముబారక్‌ పథకాలను తీసుకువచ్చి రూ.లక్షా116ల ఆర్థిక సాయమందించడం, భూమిలేని నిరుపేద మహిళలకు మూడెకరాల చొప్పున భూ పంపిణీ చేయడం, ప్రతీ పేదవారికి కుటుంబ సభ్యులతో సంబంధంలేకుండా రూపాయికే కిలో బియ్యాన్ని పంపిణీ చేయడం తదితర సంక్షేమ పథకాలతోపాటు ఇంటింటికి నల్లాల ద్వారా తాగునీరందిస్తున్న మిషన్‌ భగీరథ, పేదోడి సొంతింటి కలను నిజం చేసేందుకు చేపట్టిన డబుల్‌ బెడ్‌రూం ఇండ్ల నిర్మాణం, ఎకరాకు రూ.5 వేల పెట్టుబడి సాయం, మృతిచెందిన రైతు కుటుంబాలను ఆదుకునేందుకుగాను అమలుచేస్తున్న రూ.5 లక్షల రైతుబీమా తదితర సంక్షేమ కార్యక్రమాలతో అన్ని వర్గాల ప్రజలు టీఆర్‌ఎస్‌ అభ్యర్థులకు సంపూర్ణ మద్దతు తెలుపుతున్నారు.

నమస్తే తెలంగాణ : పరిగి మున్సిపాలిటీ అభివృద్ధికి ఎలాంటి ప్రణాళికలను రూపొందించారు?

ఎమ్మెల్యే : పరిగి మున్సిపాలిటీకి భారీగా నిధులు తీసుకువచ్చి కనీవినీ ఎరుగని రీతిలో అభివృద్ధిలోకి తీసుకువస్తాం. అంతేకాకుండా మున్సిపాలిటీలో డబుల్‌ బెడ్‌రూం ఇండ్ల నిర్మాణాలను ప్రారంభించడంతోపాటు పేద ప్రజలకు కడుపు నిండా అన్నం పెట్టేందుకు త్వరలోనే రూ.5 భోజన పథకం కూడా ప్రారంభం కానుంది. మున్సిపాలిటీ అభివృద్ధికి ప్రభుత్వం రూ.15 కోట్ల నిధులను విడుదల చేసింది. రూ.8.44 కోట్ల నిధులను రోడ్ల నిర్మాణంతోపాటు రోడ్ల అభివృద్ధికి కేటాయించేందుకు ప్రతిపాదించాము. ఎమ్మార్వో కార్యాలయం నుంచి ఇందిరా గాంధీ విగ్రహం వరకు గల బీటీ రోడ్డు విస్తరణకు రూ.1.67 కోట్లు, గాంధీ విగ్రహం నుంచి అంబేద్కర్‌ విగ్రహం వరకు సీసీ రోడ్డు నిర్మాణానికి రూ.1.44 కోట్లు, బ్రిడ్జి నుంచి రెసిడెన్షియల్‌ కాలేజీ వరకు బీటీ రోడ్డు నిర్మాణానికి రూ.1.71 కోట్లు, కొడంగల్‌ రహదారిలోని పలు కాలనీల్లో సీసీ రోడ్ల నిర్మాణానికి రూ.1.28 కోట్లు, మున్సిపాలిటీలోని పలు కాలనీల్లో అంతర్గత సీసీ రోడ్లతోపాటు కాలువల నిర్మాణానికి రూ.1.85 కోట్లు, ఎమ్మార్వో కార్యాలయం నుంచి పోస్టాఫీస్‌ వరకు సింగిల్‌ డివైడర్‌తో కూడిన సీసీ రోడ్డు నిర్మాణానికి రూ.49 లక్షలు, రూ.85.50 లక్షలతో మున్సిపాలిటీ పరిధిలో ఎల్‌ఈడీ లైట్ల ఏర్పాటు, డ్రైనేజీ కాలువల నిర్మాణానికి రూ.20 లక్షలు, ప్రధాన కూడళ్ల విస్తరణకు రూ.కోటి, రూ.కోటితో డంపిండ్‌ యార్డు ఏర్పాటు, రూ.50 లక్షలతో తుంకులగడ్డ వద్దగల ముస్లింల వైకుంఠధామం నిర్మాణం, రూ.3 కోట్లతో కొత్త మున్సిపల్‌ కార్యాలయం నిర్మాణానికి ప్రతిపాదనలను పూర్తయ్యాయి. ఎన్నికలు పూర్తైన వెంటనే పనులు ప్రారంభిస్తాం.

నమస్తే తెలంగాణ : ఎన్ని వార్డుల్లో మీకు ప్రతిపక్షాలు పోటీనిస్తున్నాయి?

ఎమ్మెల్యే : ప్రచార సమయంలోనే ప్రతిపక్షాలు చేతులెత్తేశాయి. కనీసం పోటీ కూడా ఇచ్చే పరిస్థితి లేదు. ప్రతిపక్షాలు చెప్పే అవాస్తవాలను ప్రజలు నమ్మడం లేదు. ప్రచారానికి వెళ్లే ప్రతిపక్ష అభ్యర్థులకు ప్రజల నుంచి గెలిపిస్తే ఏం చేస్తారని ప్రశ్నిస్తుండడంతో ఏమీ చెప్పలేక వెనుదిరుగుతున్న పరిస్థితి ఉంది. పరిగి మున్సిపాలిటీలో టీఆర్‌ఎస్‌ పార్టీకి పోటీ లేదు.


తాజావార్తలు


logo