విష సర్పమైన నాగుపామును చూస్తేనే గుండెల్లో వణుకు పుడుతోంది. కాసేపు చెమటలు పట్టేస్తాయి. అలాంటి కింగ్ కోబ్రా.. ఓ బుడ్డోడి వెనుకాలే పరుగులు పెట్టింది. ఆ దృశ్యాన్ని చూస్తుంటే.. ఆ బుడతడిపై నాగుపాము పగబట్టిందా? అనే సందేహం తప్పక కలుగుతోంది.
ఆ స్టోరీ ఏంటో తెలుసుకోవాలంటే వియత్నాం వెళ్లాల్సిందే.. వియత్నాంలోని ఓ ఇంటి ఆవరణలో ఓ పిల్లాడు ఆడుకుంటూ ఉన్నాడు. తన తాత కూడా అక్కడే నిల్చున్నాడు. తండ్రేమో ఇంటి ద్వారం వద్ద ఏదో పనిలో నిమగ్నమై ఉన్నాడు. అంతలోనే నాగుపాము బుసలు కొడుతూ బాలుడి వైపుకు దూసుకొచ్చింది. ఆ పామును చూసిన తాత తీవ్ర భయాందోళనకు గురయ్యాడు. పిల్లాడిని తీసుకునేందుకు ప్రయత్నం చేశాడు.. కానీ తనకు ఇటీవలే స్ట్రోక్ రావడంతో అంతగా స్పందించలేకపోయాడు.
ఇక అప్రమత్తమైన తండ్రి.. పరుగెత్తి బాలుడిని ఎత్తుకుని ఇంట్లోకి వెళ్లిపోయాడు. నాగుపాము మాత్రం ఆ పిల్లాడి వెంటనే పరుగెత్తింది. కింగ్ కోబ్రాను చంపేందుకు తాత కర్ర తీసుకున్నప్పటికీ.. ధైర్యం చేయలేదు. ద్వారం వద్దకు దూసుకొస్తున్న పామును చూసి తాత కూడా ఇంట్లోకి వెళ్లిపోయాడు. మొత్తానికి గ్లాస్ డోర్ను మూసేయడంతో.. పాము ఇంట్లోకి వెళ్లలేకపోయింది. కాసేపు అక్కడ తచ్చాడుతూ.. తిరిగి వెనక్కి వెళ్లిపోయింది. ఈ తతంగమంతా అక్కడున్న సీసీటీవీ కెమెరాల్లో రికార్డు అయింది. ఆ తర్వాత ఈ వీడియో సామాజిక మాధ్యమాల్లో వైరల్ అయింది.