భాగ్యనగరంలో బిజీ లైఫ్ గడిపేస్తున్న మీకు.. వీకెండ్లో ప్రశాంతత కావాలని కోరుకుంటున్నారా? పచ్చటి అడవిలో కాసేపు సేద తీరాలనుకుంటున్నారా? అయితే ఆలస్యమెందుకు.. ప్రకృతి సౌందర్యంతో పరవశించిపోదాం.. హైదరాబాద్కు కూతవేటు దూరంలో ఉన్న నర్సాపూర్ ఫారెస్టు ( Narsapur forest ) కు పదండి.
హైదరాబాద్ నగరానికి 45 కిలోమీటర్ల దూరంలో నర్సాపూర్ అడవి ( మెదక్ జిల్లా ) ఉంది. వీకెండ్ ఎంజాయ్మెంట్కు ఇది పర్ఫెక్ట్ ప్లేస్ అని చెప్పొచ్చు. సువాసనను వెదజల్లే వృక్షాలు, మనసును ఆహ్లాదపరిచే పక్షులు, సీతాకోక చిలుకలు, సహజశిల నిర్మాణాలు, చెరువులతో మనం మమేకం అయిపోవచ్చు. అడవిలో ఆయా మార్గాల గుండా కోతులతో సరదాగా ఎంజాయ్ చేయొచ్చు. అడవి అంతా షికారు చేయడంతో పాటు విశ్రాంతి తీసుకోవచ్చు.
అయితే చీకటి పడకముందే తిరిగి రావాలి. ఈ అడవి మార్గం దాదాపు 11 కిలోమీటర్లు ఉంటుంది. ఎక్కడా విరామం తీసుకోకుండా పర్యటిస్తే నాలుగు నుంచి ఐదు గంటల సమయం పడుతోంది. ఈ ఫారెస్టును సందర్శించడానికి ఇదే సరైన సమయం. అయితే అడవిలో తప్పిపోతామనే సందేహం అవసరమే లేదు. గూగుల్ మ్యాప్స్ ద్వారా సులభంగా మన గమ్యస్థానానికి చేరుకోవచ్చు. హైదరాబాద్ నుంచి ఆ ఫారెస్టుకు వెళ్లేందుకు అద్భుతమైన రహదారులు ఉన్నాయి. ఈ అడవిలోకి వెళ్లేవారు బొంతపల్లి దేవాలయం నుంచి తమ పర్యటనను ప్రారంభించొచ్చు.
అడవి అద్భుతమైన దృశ్యాన్ని చూడాలనుకుంటే నర్సాపూర్ ఫారెస్ట్ అర్బన్ పార్కును సందర్శించొచ్చు. ప్రవేశ రుసుం రూ. 50 చెల్లించి.. వాచ్ టవర్ నుంచి ఆ అద్భుత దృశ్యాన్ని వీక్షించొచ్చు.