కోరుకున్న వెంటనే కొనుగోలు చేసే సౌలభ్యాన్ని ఇచ్చే క్రెడిట్ కార్డ్ అంటే అందరికీ ఇష్టమే. తక్షణమే కొని తరువాత చెల్లించే వెసులుబాటు ఇచ్చే క్రెడిట్ కార్డ్ ప్రయోజనాలు ఇంకా చాలానే ఉన్నాయి. ఎప్పటికప్పుడు చేసిన ఖర్చును తిరిగి చెల్లిస్తే క్రెడిట్ కార్డుతో ప్రయోజనాలు ఎన్నో ఉన్నాయి. క్యాష్ బ్యాక్, రివార్డ్ పాయింట్లు లాంటివి చాలామందికి తెలిసినవే. కానీ కొన్ని ఎంపిక చేసిన క్రెడిట్ కార్డుల మీద ఇన్సూరెన్స్ కూడా ఉంటుందన్న అంశం చాలా తక్కువ మందికే తెలుసు. క్రెడిట్ కార్డ్ జారీ చేసినప్పుడు దాని నియమాలు, నిబంధనలతోపాటే ఆ కార్డుతో ప్రయోజనాలేమున్నాయో తెలిపే ఓ బుక్లెట్ కూడా వస్తుంది. అన్నింటికన్నా ముఖ్యమైన ప్రయోజనం కార్డుతోపాటే ఇన్సూరెన్స్ కూడా ఉండటం. ఈ ఇన్సూరెన్స్ కోసం మనం ప్రత్యేకంగా ప్రీమియం చెల్లించాల్సిన పనే లేదు. దాదాపు అన్ని రకాల క్రెడిట్ కార్డులపై పర్సనల్ యాక్సిడెంట్ ఇన్సూరెన్స్ ఉంటుంది. ఇవేకాకుండా జీవిత బీమా, చేసిన కొనుగోళ్లకు ప్రొటెక్షన్ ఇన్సూరెన్స్, ట్రావెల్ ఇన్సూరెన్స్, మోసపూరిత లావాదేవీలపై రక్షణ బీమా ఇలా రకరకాల బీమా సదుపాయాలు క్రెడిట్ కార్డ్ ద్వారా పొందవచ్చు. మీరు తీసుకున్న కార్డ్ వెరైటీ, క్రెడిట్ లిమిట్లనుబట్టి బీమాలుంటాయి. అవేంటో చూద్దాం..
క్రెడిట్ కార్డుదారు ప్రమాదంలో చనిపోతే క్రెడిట్ కార్డ్ బిల్ పేమెంట్లను మాఫీ చేసేందుకు ఉద్దేశించిందే క్రెడిట్ ఇన్సూరెన్స్. అయితే ఈ ఇన్సూరెన్స్ కింద సాధారణంగా రూ. 50 వేలవరకు మాఫీ చేస్తారు. ఇందుకోసం నామినీలు డెత్ సర్టిఫికెట్ను సమర్పించాల్సి ఉంటుంది. ఇందుకు అదనంగా ఇన్సూరెన్స్ కంపెనీ కూడా కొంత బెనిఫిట్ను అందించవచ్చు. క్రెడిట్ కార్డ్ బ్యాలెన్స్ను ఇన్సూరెన్స్ కంపెనీ కార్డ్ జారీ చేసిన కంపెనీకి చెల్లిస్తుంది. అందువల్ల కార్డ్ హోల్డర్ కుటుంబ సభ్యులు అందోళన చెందాల్సిన అవసరముండదు. ఇక పర్సనల్ యాక్సిడెంట్ ఇన్సూరెన్స్
బీమాను చాలా కార్డులు ఆఫర్ చేస్తున్నాయి. కార్డుదారు అకస్మాత్తుగా యాక్సిడెంట్లో చనిపోతే నామినీ ఈ బీమాను పొందవచ్చు. సాధారణంగా దాదాపు అన్ని కార్డులు రూ.2లక్షల నుంచి 4లక్షల వరకు ఈ ఇన్సూరెన్స్ను అందిస్తున్నాయి. కార్డు రకాన్నిబట్టి, క్రెడిట్ లిమిట్నుబట్టి రూ.40లక్షల వరకూ ఇన్సూరెన్స్ కవరేజీ లభిస్తుంది. విమాన ప్రమాదాల్లో మరణిస్తే రూ.20లక్షల నుంచి 3 కోట్లదాకా కూడా కవరేజీ ఉంటుంది. ఐసీఐసీఐ బ్యాంక్ రూబిక్స్ కార్డ్ ఆ కోవలోనిదే.
కొనుగోళ్లకూ ఇన్సూరెన్స్
చాలా కార్డులు ఈ ఇన్సూరెన్స్ను ఇస్తాయి. ఒకవేళ మీ దగ్గర కార్డు ఈ ఇన్సూరెన్స్ను ఇస్తున్నట్టయితే.. కార్డును ఉపయోగించి కొనుగోలు చేసిన వస్తువులు 180 రోజుల్లోపు దొంగతనానికి గురైనా లేదా డ్యామేజీ అయినా లేదా అగ్నిప్రమాదంలో నష్టపోయినా బీమా వర్తిస్తుంది.
ఇంకా..: పాస్పోర్టును పోగొట్టుకున్నా, ప్రయాణిస్తు న్న విమానం హైజాకైనా క్రెడిట్ కార్డుదారులు ఇన్సూరెన్స్ పొందవచ్చు. అన్ని సంస్థలూ క్రెడిట్ కార్డ్ పోయినప్పు డు జీరో లయబిలిటి ఇస్తున్నాయి. దాంతో కార్డ్ పోగొట్టుకున్నట్టు ఫిర్యాదు చేసిన తర్వాత జరిగే లావాదేవీలకు మన బాధ్యత ఉండదు. అందుకే కార్డ్ పోయిన వెంటనే ఫిర్యాదు చేయడం మరువకండి.
బ్యాగేజీ పోతే…
విమానాశ్రయంలో చెక్ ఇన్ చేసిన తర్వాత బ్యాగేజీ పోతే ఇన్సూరెన్స్ కవరేజీ ఇచ్చే కార్డులు కూడా ఉన్నాయి. అయితే ఎయిర్లైన్స్తో ఒప్పందం చేసుకుని ఇచ్చే క్రెడిట్ కార్డుల్లోనే ఈ సదుపాయం ఎక్కువగా ఉంటుంది. అందుకే తరచూ ప్రయాణాలు చేసేవారే ఈ కార్డును ఉపయోగిస్తారు. దేశీయ, విదేశీ ప్రయాణాల్లో చెక్ అయిన తర్వాత బ్యాగేజీ పోతే దాదాపుగా 1,200 డాలర్ల వరకు ఇన్సూరెన్స్ కవరేజిని అందుకోవచ్చు.
ఎలా క్లెయిమ్ చేసుకోవాలి?
క్రెడిట్ కార్డుపైన పేర్కొన్న ఇన్సూ రెన్స్లను క్లెయిమ్ చేయాలంటే కొన్ని పద్ధతులున్నాయి. అది ఏ రకమైన కార్డ్, దాని క్రెడిట్ లిమిట్ ఎంత?, కార్డ్ జారీచేసిన సంస్థనుబట్టి కవరేజి, క్లెయిమ్ల నియమాలు మారవచ్చు. ఇందుకు సంబంధించి పూర్తి వివరాలు కార్డ్ బుక్లెట్లోగానీ, దాన్ని జారీచేసిన సంస్థ వెబ్సైట్లోగానీ ఉంటాయి. పర్సనల్ యాక్సిడెంట్ కవరేజీ అయితే నామినీ క్లెయిమ్ చేస్తారు. డెత్ సర్టిఫికెట్, ఎఫ్ఐఆర్, పోస్ట్మార్టమ్ రిపోర్టు, మెడికల్ ఆఫీసర్ రిపోర్టులను జతచేసి క్లెయిమ్ చేయాల్సి ఉంటుంది. ఈ డ్యాక్యుమెంట్లు ఇంగ్లీషులో ఉంటే సరి, లేదంటే ఇంగ్లీష్ కాపీ తీసుకోండి. ఈ ఇన్సూరెన్స్లకు ఎలాంటి ప్రీమియంలను చెల్లించాల్సిన అవసరం లేదు. అయితే ఇవన్నీ మీ వార్షిక చార్జీల్లోనే ఉంటాయి.
ఆదిత్యా కొత్త పాలసీ
జీవిత బీమాతోపాటు రెగ్యులర్ ఆదాయం, ఫ్లెక్సిబుల్ బోనస్, వం దేండ్ల వరకు బీమాను రైడర్స్ ద్వారా పెంచుకునేందుకు కూడా అవకాశం ఉండేలా ఓ సరికొత్త జీవిత బీమా పాలసీని ఆదిత్యా బిర్లా సన్ లైఫ్ ఇన్సూరెన్స్ జారీ చేసింది. ఈ బీమా పాలసీని వివిధ రకాల ఆప్షన్లతో మన అవసరాలకు అనుకూలంగా రూపొందించుకునే వీలున్నది. ఇందులో స్పల్ప, మధ్య, దీర్ఘకాల ఆర్థిక అవసరాలకు తగ్గట్టు ఆదాయాన్ని పొందే అవకాశం ఉంది. బీమా మొత్తంలో ఒక శాతం గ్యారంటీ ఆదాయాన్ని పేఅవుట్ పీరియడ్ నుంచి పాలసీ టర్మ్ ముగిసే వరకు ఇస్తారు. ఒకవేళ బెనిఫిట్ పేఅవుట్ను సంవత్సరానికి ఒకసారి ఎంచుకుంటే ఆదాయాన్ని ఏటా చెల్లిస్తారు. గ్యారంటీడ్ వార్షిక ఆదాయాన్ని 20, 25, 30 సంవత్సరాలు బోనస్లతో కలిపి ఇస్తారు. వయసునుబట్టి ఇది ఉంటుంది. 20 ఏండ్ల కాలపరిమితికి అయితే 8.5%, 25 ఏండ్లకు 7%, 30 ఏండ్లకు 5.5% చొప్పున వార్షిక ఆదాయాలు ఉంటాయి. ఒకవేళ నెలసరి ఆదాయంగా కావాలనుకుంటే దాన్ని సమానంగా విభజించి చెల్లిస్తారు. ఇక హోల్ లైఫ్ బెనిఫిట్ కింద 85 ఏండ్లు లేదా 100 ఏండ్ల వరకు బోనస్లతో కలిపి ఇస్తారు. దీన్ని రిటైర్ ప్లాన్ కింద పరిగణిస్తారు.
డెత్ బెనిఫిట్
ఒకవేళ పాలసీ కాలపరిమితిలోగా పాలసీదారు చనిపోతే నామినీకి బీమా మొత్తాన్ని అందిస్తారు. అలాగే ప్రీమియం చెల్లింపులను రద్దు చేస్తారు. గ్యారంటీ ఆదాయం బెనిఫిట్లను కూడా వాటి సమయాన్ని బట్టి చెల్లిస్తారు.
మెచ్యూరిటీ బెనిఫిట్
పాలసీ టర్మ్ ముగిసేదాకా పాలసీదారు బతికే ఉంటే జీవిత బీమా మొత్తాన్ని చెల్లిస్తారు. అయితే ప్రీమియం బకాయిలు ఉండకూడదు. పెయిడ్ అప్ అడిషన్స్, టర్మినల్ బోనస్లనూ చెల్లిస్తారు. హోల్ లైఫ్ ఇన్కమ్ బెనిఫిటూ ఉంటుంది.
అప్పు తీసుకున్నాక మరణిస్తే..
ఏదో ఒక అవసరానికి అప్పు తీసుకోక తప్పదు. తీసుకున్న తర్వాత దాన్ని చెల్లించకా తప్పదు. వివిధ అవసరాల కోసం అనేక రకాల రుణాలను తీసుకోవడం సహజం. అయితే క్రెడిట్ బ్యాలెన్స్లు, హౌజింగ్, పర్సనల్ లోన్లు తీసుకున్న తర్వాత మరణిస్తే ఎలా?.. ఇంటికి కలెక్షన్ ఏజెంట్లు వచ్చిచేసే అల్లరి పరువు తీసేదిగా ఉంటుంది మరి. హౌజింగ్ లోన్ రికవరీకి చట్టపరమైన నిబంధనలు ఉన్నా మిగతా వాటి విషయంలో ఎలాంటి రెగ్యులేషన్స్ లేవు. తనఖా, గ్యారంటీదారు, కో-అప్లికెంట్ వంటి అంశాలు కూడా చాలా ముఖ్యం. అయితే అప్పు తీసుకున్న తర్వాత మరణిస్తే కుటుంబ సభ్యులు ఎలా ఆ సంక్షోభం నుంచి బయటపడాలో తెలుసుకుందాం.
పర్సనల్ లోన్ , క్రెడిట్ కార్డ్
ఈ రెండూ అన్సెక్యూర్డ్ లోన్లే. వాటిని తీసుకున్నవారు చనిపోతే అతని వారసులు చెల్లించాలని చట్టంలో లేదు. ఆ రుణాలను ఇచ్చిన సంస్థ వాటిని రద్దు చేస్తుంది. అందుకే పర్సనల్ లోన్ను జారీ చేసేటప్పుడే జీవిత బీమా ఉండేలా చూస్తున్నారు. రుణగ్రహీత చనిపోతే ఆ బీమా సొమ్ము నుంచి మినహాయించుకునేలా నిబంధనలను రూపొందిస్తున్నారు. అయితే కుటుంబ సభ్యులు రుణం చెల్లించేందుకు ముందుకు వస్తే రుణంపై ఉన్న పెనాల్టీలు, వడ్డీ రద్దు చేయడానికి బ్యాంకులు వెసులుబాటును ఇస్తున్నాయి.
ఆటో, ఎడ్యుకేషన్ లోన్
ఆటో లోన్.. మార్ట్గేజ్ రుణం. వాహనాలను రుణం ఇచ్చే కంపెనీలు.. తనఖా పెట్టుకునే ఇస్తాయి. రుణం తీసుకున్న వ్యక్తి చనిపోతే కుటుంబ సభ్యులు చెల్లించాలంటూ కోరవచ్చు. కుటుంబ సభ్యులు చెల్లించలేని స్థితిలో వాహనాన్ని జప్తుచేసి వేలం వేస్తారు. ఒకవేళ వారసులు చెల్లించడానికి ముందుకు వస్తే తీసుకున్న రుణాన్ని అతని పేరుకు బదలాయిస్తారు. ఇక విద్యా రుణం.. గ్యారంటీ లేకుండా ఏ బ్యాంకూ ఇవ్వదు. రూ.4లక్షలకన్నా ఎక్కువగా ఉంటే తనఖా తప్పనిసరి. విద్యార్థి చనిపోతే గ్యారంటీ ఇచ్చినవారు (సాధరణంగా తల్లిదండ్రులే) చెల్లించాల్సి ఉంటుంది. చెల్లించలేకపోతే తనఖా పెట్టిన వాటిని వేలం వేసి రుణాన్ని తీర్చుకుంటారు.
హౌజింగ్ లోన్
హోమ్ లోన్లు అన్నీ దీర్ఘకాలానికి తీసుకునేవే. గృహ రుణాలు ఇచ్చే కంపెనీలు సాధారణంగా అప్పు తీసుకున్న వ్యక్తి మరణిస్తే రికవరీకి ఇబ్బంది కలగకుండా ఉండేలా జాగ్రత్తలు తీసుకుంటాయి. ఇందులో భాగంగానే చాలా సంస్థలు.. జీవిత బీమా లేనిదే హౌజింగ్ లోన్లు ఇవ్వడం లేదు. అయితే లోన్ ఇచ్చే ముందే దానికి ఇన్సూరెన్స్ సదుపాయాన్నీ కల్పిస్తున్నాయి. దీనికి సంబంధించిన ప్రీమియం నెలసరి ఈఎంఐల్లోనే వసూలు చేస్తున్నాయి. దీంతో రుణగ్రహీత మరణించినా.. రుణ వసూలుకు ఢోకా ఉండదు. బాధితులకూ ఇది ఎంతో ఉపశమనం. కానీ ఈ సౌకర్యం లేనిపక్షంలో మృతుడి జీవిత బీమా మొత్తాలతో సెటిల్ చేసుకోవచ్చు. లేదంటే కో-బారోవర్, లీగల్ వారసులు రుణ చెల్లింపు బాధ్యతను తీసుకోక తప్పదు. అలా కుదరకపోతే చట్ట ప్రకారం ప్రాపర్టీని స్వాధీనం చేసుకుంటారు.
పవర్ ఆఫ్ అటార్నీ ఇస్తున్నారా?..
చాలా సందర్భాలలో వివాదాలకు దారితీసే అంశం ఇది. పవర్ ఆఫ్ అటార్నీ దుర్వినియోగం అయిన సందర్భాలు చాలానే ఉన్నాయి. దానిపై కోర్టుల్లో కేసులూ కోకొల్లలు. ఏవైనా లావాదేవీలను నిర్వహించలేని సందర్భంలో తన తరఫున మరొకరికి ఆ అధికారాన్ని కట్టబెట్టడమే పవర్ ఆఫ్ అటార్నీ.
తీసుకోవాల్సిన జాగ్రత్తలు
పవర్ ఆఫ్ అటార్ని ఇచ్చేటప్పుడు లీగల్ అటార్నీ జారీ చేయడం వల్ల కొన్ని చట్టపరమైన చిక్కుల నుంచి బయటపడవచ్చు. అలాగే సంబంధిత లావాదేవీకే పరిమితం చేస్తూ జారీచేయడం ఉత్తమం. ఉదాహరణకు అద్దె వసూలు కోసం జారీ చేసినట్టయితే అందుకోసమేన్న విషయాన్ని స్పష్టంగా పేర్కొనండి. అన్నింటి కన్నా ముఖ్యంగా కాలపరిమితిని విధిస్తూ జారీ చేయండి. అందువల్ల భవిష్యత్తులో దుర్వినియోగం కాకుండా ఉంటుంది. పవర్ ఆఫ్ అటార్నీ డాక్యుమెంట్ను తయారు చేయడానికి నిపుణుల సాయం తీసుకోండి.