ఆగ్రా : నేరగాళ్లు చెలరేగిపోతున్న యూపీలో మహిళలు, బాలికలపై లైంగిక వేధింపుల ఘటనలు కొనసాగుతున్నాయి. ఆగ్రాకు సమీపంలోని గ్రామంలో 14 ఏండ్ల బాలికను ఓ మైనర్ బాలుడు సహా ఇద్దరు లైంగిక దాడికి పాల్పడి దారుణంగా హత్య చేసిన ఉదంతం వెలుగుచూసింది. శుక్రవారం మద్యాహ్నం గ్రామంలోని ఇంటి నుంచి బయటకు వచ్చిన బాలికను యువకుడు సమీప అటవీ ప్రాంతానికి బలవంతంగా తీసుకువెళ్లి లైంగికదాడికి పాల్పడ్డాడు. ఆపై 15 ఏండ్ల బాలుడు కూడా బాలికపై దారుణానికి ఒడిగట్టాడు. బాధితురాలిని దుస్తులతో గుంజడంతో ఊపిరాడక బాలిక మరణించి ఉండవచ్చని పోలీసులు భావిస్తున్నారు.
బాలిక మృతదేహాన్ని చెరువులో పడవేసి నిందితులు పారిపోయారు. ఎంతసేపటికీ బాలిక ఇంటికి రాకపోవడంతో కుటుంబ సభ్యులు ఆమె కోసం గాలింపు చేపట్టగా ఘటనా ప్రాంతంలో మృతదేహాన్ని గుర్తించారు. పోలీసులకు సమాచారం అందించడంతో కేసు నమోదు చేసి దర్యాప్తు ముమ్మరం చేశారు. పోస్టుమార్టం నివేదికలో బాలికపై లైంగిక దాడి జరిగిందని, పెనుగులాటలో ఊపిరాడక మరణించినట్టు వెల్లడైంది. నిందితుడిని బాధితురాలి తండ్రి వద్ద దినసరి కార్మికుడిగా పనిచేసే రాహుల్గా గుర్తించారు. మరో నిందితుడు గ్రామానికి చెందిన 15 ఏండ్ల బాలుడిగా వెల్లడైంది. వారిద్దరినీ కస్టడీలోకి తీసుకున్నామని పోలీసులు తెలిపారు. రాహుల్ను ఓ విషయంలో పని నుంచి తొలగించడంతో కక్ష పెంచుకుని ఈ దారుణానికి ఒడిగట్టాడని పోలీసులు భావిస్తున్నారు. మైనర్ నిందితుడిని జువెనల్ కోర్టులో హాజరుపరుస్తామని పోలీసులు తెలిపారు.