హైదరాబాద్ : నేషనల్ అకాడమీ ఆఫ్ కన్స్ట్రక్షన్(న్యాక్), హైదరాబాద్కు 2020-21 ఏడాదిగాను నిర్మాణ నైపుణ్య అభివృద్ధి అచీవ్మెంట్ అవార్డు లభించింది. 12వ కన్స్ట్రక్షన్ ఇండస్ట్రీ డెవలప్మెంట్ కౌన్సిల్(సీఐడీసీ) అవార్డుల ప్రదానోత్సవం ఢిల్లీలోని లోధిరోడ్లో గల ఇండియా హాబిటాట్ సెంటర్, స్టెయిన్ ఆడిటోరియంలో ఆదివారం జరిగింది. ఈ కార్యక్రమంలో డైరెక్టర్, పీ అండ్ ఆర్ ఐ.శాంతి, డైరెక్టర్, పీజీ కోర్సెస్ కె. రాధాకృష్ణ పురస్కరాన్ని అందుకోవడం జరిగింది. సీఐడీసీ విశ్వకర్మ అవార్డులు భారతదేశ నిర్మాణ పద్ధతుల దేవుడు అయిన విశ్వకర్మ చేత పోషించబడిన నిర్మాణ సృష్టి స్ఫూర్తితో ప్రేరణ పొందాయి. ప్రతి సంవత్సరం ఈ కార్యక్రమాన్ని మార్చిలో సీఐడీసీ నిర్వహిస్తుంది.
మెరుగైన ఉత్పాదనలు, ప్రక్రియలను అందించడం, దేశ నిర్మాణానికి సహాయపడటానికి, పరిశ్రమకు అధిక ప్రమాణాలను సృష్టించడం కోసం సంస్థలు గుర్తించబడతాయి. ఈ ప్రతిష్టాత్మక జాతీయ పురస్కారం అందుకోవడంపై డీజీ, న్యాక్ అదేవిధంగా తెలంగాణ రాష్ట్ర రోడ్లు, భవనాలశాఖ మంత్రి వేముల ప్రశాంత్ రెడ్డి ఉద్యోగులను అభినందించారు. 13 వేల మందికి శిక్షణ ఇవ్వడం ద్వారా చేసిన ఉత్తమ కృషికి ఎన్ఏసీ ఈ అవార్డును అందుకుందన్నారు.