ఇక మొబైల్‌లోనే ఓటరు గుర్తింపు కార్డు డౌన్‌లోడ్‌ చేసుకోవచ్చు..

హైదరాబాద్ :  ఓటరు గుర్తింపు కార్డును ఓటర్లు తమ మొబైల్‌లోనే డౌన్‌లోడ్‌ చేసుకొనే వెసులుబాటును భారత ఎన్నికల సంఘం కల్పించింది.  రిజిస్టర్డ్ మొబైల్ నెంబర్‌ ద్వారా పీడీఎఫ్ ఫార్మాట్‌లో డౌన్‌లోడ్ చేసుకొని ప్రింట్ సైతం తీసుకోవచ్చు. ఇప్పటి వరకూ ఓటరు గుర్తింపు కార్డును మీసేవా కేంద్రాల ద్వారానే పొందే అవకాశం ఉండేది. జాతీయ ఓటర్ల దినోత్సవం సందర్భంగా ఈ నెల 25న ఈ-ఎపిక్‌ (ఎలక్ట్రానిక్‌ ఫొటో ఐడెంటిటీ ఓటరు కార్డు) కార్యక్రమాన్ని లాంఛనంగా ప్రారంభించనున్నామని రాష్ట్ర ఎన్నికల ముఖ్య అధికారి కార్యాలయం తెలిపింది.

ఓటరు తమ మొబైల్‌లోనే ఓటరు కార్డును డౌన్‌లోడ్‌ చేసుకోవచ్చునని, ఎక్కడైనా ప్రింట్‌ తీసుకోవచ్చునని వెల్లడించింది. ఈ-ఎపిక్ విధానంపై ఓటర్లలో అవగాహన పెంచాలని ఎన్నికల అధికారులను ఆదేశించింది. కొత్తగా నమోదైన ఓటర్లు ఈ నెల 25 నుంచి 31 వరకు తాము రిజిస్టర్ చేసుకున్న మొబైల్ నెంబర్‌ ద్వారా ఈ- ఎపిక్ కార్డులు డౌన్‌లోడ్ చేసుకొనేందుకు అవకాశం కల్పించారు. ఫిబ్రవరి 1 నుంచి ఓటర్లందరూ డౌన్లోడ్ చేసుకోవచ్చు. నూతన విధానంపై  ‘ఈ-ఓటర్ హువా డిజిటల్, క్లిక్ పర్ ఏపిక్’ పేరుతో అవగాహన కార్యక్రమాలు నిర్వహించాలని నిర్ణయించింది. 

‌పోర్టల్ :  http://voterportal.eci.gov.in, NVSP:https://nsvp.in 

ఓటర్ హెల్ప్ లైన్, మొబైల్ యాప్ ఆండ్రాయిడ్ https://play.google.com/store/apps/details?id=com.eci citizen

ఐఓఎస్ ద్వారానైతే http://apps.apple.com/in/app/voter-helpline/id1456535004 ల ద్వారా ఎలక్ట్రానిక్ ఓటరు గుర్తింపు కార్డు డౌన్ లోడ్ చేసుకోవచ్చని తెలిపింది.కాగా, ఈ నెల 25న జాతీయ ఓటర్ల దినోత్సవం సందర్భంగా ప్రజాప్రతినిధులు, ఎన్జీఓలను భాగస్వాములను చేసి కొత్త ఓటర్ల నమోదుకు విస్తృత ప్రచారం చేయాలని ఎన్నికల సంఘం పేర్కొంది.

లోకల్ టు గ్లోబల్.. వార్త ఏదైనా.. అన్నీ ఒకే యాప్లో నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.