ఎంపీ అర్వింద్‌కు మతిభ్రమించింది

• ఎమ్మెల్సీ కవితపై అనుచిత వ్యాఖ్యలతో వెల్లువెత్తిన నిరసనలు
  
• నిజామాబాద్‌, జగిత్యాల జిల్లాల్లో దిష్టిబొమ్మల దహనం

నమస్తే తెలంగాణ నెట్‌వర్క్‌: ఎమ్మెల్సీ కల్వకుంట్ల కవితపై అనుచిత వ్యాఖ్యలు చేసిన బీజేపీ నిజామాబాద్‌ ఎంపీ అర్వింద్‌పై నిరసనలు వెల్లువెత్తాయి. నిజామాబాద్‌ జిల్లావ్యాప్తంగా, జగిత్యాల జిల్లా మెట్‌పల్లి, జగిత్యాల, రాయికల్‌, సారంగాపూర్‌లో గురువారం ఆయన దిష్టిబొమ్మలను టీఆర్‌ఎస్‌ నాయకులు, కార్యకర్తలు దహనం చేశారు. ఈ సందర్భంగా టీఆర్‌ ఎస్‌ నాయకులు మాట్లాడుతూ.. పసుపు బోర్డు తెస్తానని మాయమాటలు చెప్పి ఎంపీగా గెలిచిన ఆయన ఇప్పుడు అన్నదాతలను మోసం చేశాడని నిప్పులు చెరిగారు. ఝూటా మాటలు చెప్పి ఎంపీగా గెలిచిన అర్వింద్‌కు మతిభ్రమించిందని టీఆర్‌ఎస్‌ నాయకులు మండిపడ్డారు. వెంటనే కవితకు క్షమాపణలు చెప్పాలని డిమాండ్‌ చేశారు. మరోసారి ఎమ్మెల్సీ కవితపై ఆరోపణలు చేస్తే సహించేదిలేదని హెచ్చరించారు.