మంగళవారం 04 ఆగస్టు 2020
Telangana - Jul 24, 2020 , 01:27:39

టీకా.. ముందు ఎవరికి?

టీకా.. ముందు ఎవరికి?

  • కరోనా వ్యాక్సిన్‌ తొలిదశలో ఎవరికి వేయాలి?  l  పేద దేశాల్లోని ప్రజలకు అందుతుందా? 
  • l టీకా ధర సామాన్యులకు భారమైతే ఎలా? 
  • l వైరస్‌లో అనేక ఉత్పరివర్తనాలు..  ఒకే వ్యాక్సిన్‌ అన్నింటికీ పనిచేస్తుందా? 
  • l ప్రభుత్వాలు ఇప్పటి నుంచే కార్యాచరణ  ప్రారంభించాలంటున్న నిపుణులు  

హైదరాబాద్‌, నమస్తే తెలంగాణ: కరోనాకు మరికొన్ని నెలల్లో విరుగుడు రావడం ఖాయమైంది. ప్రపంచవ్యాప్తంగా వందకుపైగా బృందాలు కొవిడ్‌-19కు టీకా తయారుచేయడంలో నిమగ్నమయ్యాయి. దాదాపు 30 రకాల వ్యాక్సిన్లు క్లినికల్‌ ట్రయల్స్‌ దశకు చేరుకున్నాయి. మన దేశంలోనూ భారత్‌ బయోటెక్‌ రూపొందించిన కోవాగ్జిన్‌, జైడస్‌ కాడిలా సంస్థ అభివృద్ధి చేసిన వ్యాక్సిన్లు మానవులపై ప్రయోగాల దశలో ఉన్నాయి. ఆగస్టు రెండో వారంలో టీకా విడుదల చేస్తామని రష్యా ప్రకటించగా, ఈ ఏడాది చివరినాటికి లేదా వచ్చే ఏడాది ప్రథమార్ధంలో టీకా వస్తుందని నిపుణులు చెప్తున్నారు. ఈ సమయంలో ప్రపంచం ముందు ‘ప్రాధాన్యం’ ప్రధాన సమస్యగా మారింది. ఎందుకంటే ప్రజలంతా టీకా కోసం ఎదురుచూస్తున్నారు మరి.. 

1. ప్రపంచ జనాభాకు సరిపోవాలంటే ఎన్ని వ్యాక్సిన్లు ఉత్పత్తి చేయాలి? 

2. టీకా ముందు ఏ వయసువారికి వేయాలి? 

3. టీకా ధర అధికంగా ఉండి పేదలు, మధ్యతరగతివారు కొనలేకపోతే ఎలా? 

4. ఆఫ్రికా వంటి పేద దేశాలకు వ్యాక్సిన్‌ ఎప్పుడు చేరుతుంది? అప్పటివరకు వారి పరిస్థితి ఏంటి? 

5. కొవిడ్‌-19లో అనేక ఉత్పరివర్తనాలు కనిపిస్తున్నాయి. వ్యాక్సిన్‌ అన్నింటినీ ఎదుర్కోగలదా? 

ఇలాంటి ఎన్నో ప్రశ్నలు ఇప్పుడు ప్రపంచం ముందున్నాయి. వాటికి ఇప్పటి నుంచే సమాధానాలు వెతకాలని, సరైన కార్యాచరణ రూపొందించాలని నిపుణులు అభిప్రాయపడుతున్నారు.  

250 కోట్లు - 500 కోట్ల డోసులు? 

ప్రపంచ జనాభా ప్రస్తుతం 780 కోట్లు. టీకా అందుబాటులోకి వచ్చే నాటికి వైరస్‌ బారినపడి కోలుకున్నవారు, తెలియకుండానే ఇమ్యూనిటీ సాధించినవారు సుమారు 150-180 కోట్ల మంది ఉంటారని అంచనా. మిగతా 600 కోట్ల మందిలో ఎంతమందికి టీకా వేయాల్సి ఉంటుందన్ని ప్రశ్నగా మారింది. కనీసం సగం జనాభాలో ప్రతిరక్షకాలు ఉత్పత్తి అయితే హెర్డ్‌ ఇమ్యూనిటీ సాధ్యమని నిపుణులు చెప్తున్నారు. ఈ లెక్కన 250 కోట్ల మందికి టీకా వేయాల్సి రావొచ్చు. మరోవైపు ఒక్కో వ్యక్తికి కనీసం రెండుసార్లు/రెండు డోసులు టీకా వేస్తేనే కొవిడ్‌-19ను ఎదుర్కొనే సామర్థ్యం వస్తుందని అంచనా వేస్తున్నారు. ఇదే నిజమైతే 500 కోట్ల డోసులు ఉత్పత్తి చేయాల్సి ఉంటుంది. ఇంతమొత్తంలో ఉత్పత్తి, సరఫరాకు ఎంత సమయం పడుతుందో ప్రభుత్వాలు అంచనా వేయాల్సి ఉంటుంది. 

పిల్లలకా? పెద్దలకా? గర్భిణులకా?

వ్యాక్సిన్‌ అందుబాటులోకి వచ్చేనాటికి సుమారు 70-80 కోట్ల డోసులు సిద్ధంగా ఉంటాయని అంచనా. కరోనా అన్ని వయస్సుల వారిపై ప్రభావం చూపుతున్న నేపథ్యంలో టీకాను ముందుగా ఎవరికి వేయాలనేది పెద్ద చిక్కుప్రశ్నగా మారింది. పిల్లలు, వృద్ధులు, గర్భిణులు, దీర్ఘకాలిక రోగాలతో బాధపడుతున్నవారిని ‘వల్నరల్‌ గ్రూప్‌'గా పేర్కొంటారు. ముందుగా వీరికే ఇవ్వాలనే డిమాండ్‌ మొదలవుతున్నది. అయితే వల్నరల్‌ గ్రూప్‌ను కొన్ని నెలలు ఇంటికే పరిమితం చేసి.. ముందుగా యువత, మధ్యవయస్కులకు వేస్తే ఆర్థిక వ్యవస్థ చక్కబడుతుందని మరికొందరు వాదిస్తున్నారు. 

ప్లాన్‌ ఉంటేనే ప్రాణాలు దక్కేది 

వ్యాక్సిన్‌ అందుబాటులోకి రావడానికి పెద్దగా సమయం లేదని, వాటిని ఎలా వినియోగించాలో ప్రభుత్వాలు వెంటనే ప్రణాళికలు సిద్ధం చేసుకోవాలని నిపుణులు సూచిస్తున్నారు. ఈ దిశగా అమెరికా ఇప్పటికే ఒక కమిటీని నియమించింది. ప్రస్తుతం వ్యాక్సిన్ల ఉత్పత్తి సామర్థ్యం కొన్ని దేశాలకే ఉన్నది. ఉత్పత్తయిన డోసుల్లో ప్రధాన వాటా దానిని అభివృద్ధి చేసిన సంస్థ ఉన్న దేశానికి, ఉత్పత్తి చేస్తున్న దేశానికి వెళ్తాయి. కాబట్టి వ్యాక్సిన్‌ టెక్నాలజీని కొనుగోలు చేయడం, ముందస్తుగా ఆర్డర్లు ఇవ్వడం, వచ్చే డోస్‌లను ప్రణాళికాబద్ధంగా వినియోగించడం, వివిధ దశల్లో అవసరమైనవారికి వ్యాక్సిన్‌ అందేలా చర్యలకు ప్లాన్‌ రూపొందించాలని స్పష్టం చేస్తున్నారు. 

చెన్నైలో కొవాగ్జిన్‌ ట్రయల్స్‌ మొదలు

భారత్‌ బయోటెక్‌ ఫార్మా సంస్థ అభివృద్ధి చేసిన ‘కొవాగ్జిన్‌' క్లినికల్‌ ట్రయల్స్‌ తమిళనాడులో ప్రారంభం అయ్యాయి. చెన్నైలోని ఎస్‌ఆర్‌ఎం మెడికల్‌ హాస్పిటల్‌ అండ్‌ రిసెర్చ్‌ సెంటర్‌లో గురువారం వలంటీర్లపై వ్యాక్సిన్‌ ప్రయోగించారు. దవాఖానకు చెందిన డాక్టర్‌ సత్యజిత్‌ మహాపాత్ర ఈ ప్రయోగాలకు నోడల్‌ ఆఫీసర్‌గా వ్యవహరిస్తున్నారు. ప్రస్తుతం వలంటీర్లు సంపూర్ణ ఆరోగ్యంతో ఉన్నారని సత్యజిత్‌ చెప్పారు. మరోవైపు ఢిల్లీకి చెందిన ప్రముఖ ‘డాక్టర్‌ డాంగ్స్‌ ల్యాబ్‌' కొవాగ్జిన్‌ ప్రయోగాల్లో భాగస్వామి అవుతున్నట్టు ప్రకటించింది. క్లినికల్‌ ట్రయల్స్‌కు సంబంధించి ఇది సెంట్రల్‌ ల్యాబ్‌గా పనిచేయనున్నది. కొవాగ్జిన్‌ ట్రయల్స్‌ను దేశవ్యాప్తంగా ఎంపికచేసిన 12 దవాఖానల్లో నిర్వహించనున్న విషయం తెలిసిందే. అక్కడ వలంటీర్ల నుంచి సేకరించిన రక్త నమూనాలను సెంట్రల్‌ ల్యాబ్‌కు పంపుతారు. వాటిని ల్యాబ్‌లో స్క్రీనింగ్‌, ప్రాసెసింగ్‌చేస్తారు. గుడ్‌ క్లినికల్‌ ల్యాబొరేటరీ ప్రాక్టీస్‌ మార్గదర్శకాల ప్రకారం శాంపిళ్లు ఉన్నాయో లేదో పరీక్షించి, వాటికి తగ్గట్టుగా మార్పులుచేస్తారు. అక్కడి నుంచి శాంపిళ్లను పరీక్షల నిమిత్తం పుణెలోని నేషనల్‌ ఇన్‌స్టిట్యూట్‌ ఆఫ్‌ వైరాలజీకి పంపుతారు.

ప్రపంచదేశాలు ఆదుకోవాలి 

పేద దేశాలతోపాటు యుద్ధాలతో ఆర్థిక వ్యవస్థలు కుప్పకూలిన సిరియా, ఇరాక్‌వంటి దేశాలకు టీకా కొని, ప్రజలకు అందించడం ఆర్థికంగా పెనుభారంగా మారుతున్నది. ఆఫ్రికా దేశాలకు టీకా అందజేస్తామని కంపెనీలు చెప్తున్నా.. ఆర్థికంగా భారం పడకుండా ఎలా చూస్తారనే ప్రణాళిక వెల్లడించడం లేదు. ఈ నేపథ్యంలో ఐక్యరాజ్యసమితి, జీ7, జీ 20, ఒపెక్‌ వంటి గ్రూప్‌లు, మిగతా ప్రపంచ దేశాలు ముందుకురావాలని అంతర్జాతీయంగా డిమాండ్లు వస్తున్నాయి.

ధరాభారమా? ఉచితమా? 

టీకా ధర రూ.1500-2000 వరకు ఉంటుందని అంచనా. ఒక్కో కుటుంబంలో సగటున ఐదుగురిని లెక్కవేసుకున్నా.. రూ.7,500-10 వేల వరకు ఖర్చవుతుంది. ఇది నిరుపేదలకు మోయలేని భారమే. ప్రపంచబ్యాంకు లెక్కల ప్రకారం 2019 చివరినాటికి సుమారు 64 కోట్ల మంది (ప్రపంచ జనాభాలో 8.2శాతం) నిరుపేదలు ఉన్నారు. వీరంతా వ్యాక్సిన్‌ ఖర్చులు భరించలేరు. అమెరికన్లందరికీ ఉచితంగా వ్యాక్సిన్‌ ఇస్తామని ట్రంప్‌ ఇప్పటికే ప్రకటించారు. ఇదే తరహాలో మిగతా దేశాలూ పేదలు, మధ్యతరగతి వారికి ఉచితంగా లేదా సబ్సిడీపై వ్యాక్సిన్‌ ఇచ్చే అవకాశాలు పరిశీలించాలని నిపుణులు సూచిస్తున్నారు.

ఒక్క వ్యాక్సిన్‌ సరిపోతుందా? 

అంతర్జాతీయంగా ఇప్పటివరకు కరోనా వైరస్‌లో సుమారు 6000 ఉత్పరివర్తనాలను గుర్తించారు. ఒక్క మన దేశంలోనే సుమారు 1500 మార్పులు గమనించారు. ఎక్కువగా ఏ2ఏ, ఏ3ఐ వైరస్‌ ఉన్నట్టు గుర్తించారు. ఇప్పుడు వ్యాక్సిన్‌ తయారీలో ఏ రకం వైరస్‌ను ఉపయోగించారు? అవి మిగతా ఉత్పరివర్తనాలపైనా పనిచేస్తాయా? అన్నది ఇప్పుడు తెరమీదికి వచ్చిన కొత్త ప్రశ్న. ఈ దిశగా పరిశోధనలు చేయాలని వైద్యనిపుణులు సూచిస్తున్నారు. 



logo