కరోనా వైరస్ దాడి నుంచి విముక్తి
శారీరక, మానసిక సమస్యలూ దూరం
ఆసనాలు, ప్రాణాయామం చేయాలంటున్న నిపుణులు
క్రమశిక్షణతో కూడిన జీవనవిధానమూ ముఖ్యమే
మందమర్రి, మే 5 : ప్రస్తుతం కరోనా కోరల్లో చిక్కుకొని ప్రపంచం తల్లడిల్లుతున్నది. అంతుచిక్కని ఈ వైరస్ అంతకంతకూ వ్యాప్తి చెందుతుండగా, మానవాళీ భయాందోళనకు లోనవుతున్నది. మహమ్మారిని ఎదుర్కొనేందుకు వైద్య నిపుణులు వివిధ సూచనలు చేస్తుండగా, నిత్యం యోగా చేయడం ద్వారా కొంత మేలు కలుగుతుందనే అభిప్రాయం వ్యక్తమవుతున్నది. క్రమశిక్షణ గల జీవన విధానం, ఆహారపు అలవాట్లు, మనోనిబ్బరంతో పాటు మానసిక, శారీరక సంసిద్ధత కూడా కొవిడ్ అంతానికి సహకరిస్తుందనే వాదనలు వినిపిస్తున్నాయి. అందుకే యోగాపై పలువురు అభ్యాసకులు చెబుతున్న సూచనలు, సలహాలపై ‘నమస్తే తెలంగాణ’ ప్రత్యేక కథనం
ఇప్పుడున్నది కరోనా కాలం.. ముప్పేట వైరస్ దాడి. అంతుచిక్కని శత్రువు ఎటు నుంచి ఎలా వ్యాప్తి చెందుతుందో తెలియని పరిస్థితి.ఇలాంటి సమయంలో డాక్టర్లు, మందుల మీద ఆధారపడడం కంటే మన రక్షణ కోసం మనం ఏం చేస్తున్నామనే ఆలోచన రావాలి. దీనిని అధిగమించాలంటే ముందు నుంచే యోగా సాధనను అలవాటు చేసుకోవాలి. సంపూర్ణ ఆరోగ్యానికి యోగా ఒక్కటే మార్గమని పెద్దలు, పూర్వీకులు చెబుతున్నారు. కరోనా లాంటి ప్రాణాంతకమైన మహమ్మారి ముప్పు నుంచి సురక్షితంగా ఉండాలంటే మన శరీరం బలంగా తయారవ్వాలి. శారీరకంగా, మానసికంగా సంసిద్ధమై ఉండాలి. కాగా, కరోనా ముఖ్యంగా మనిషి ఊపిరితిత్తులపై దాడి చేస్తున్నది. శరీరానికి ప్రాణవాయువు అందకుండా పోతున్నది. దీంతో గుండె, మెదడు, కిడ్నీలు, జీర్ణాశయం పని చేయకుండా పోతున్నాయి. ప్రాణవాయువు సరఫరా కాకపోవడంతో రక్తం కదలికలకు ఆటంకం కలుగుతున్నది. దీంతో మనిషి కొద్ది రోజుల్లోనే మరణిస్తున్నాడు. మనిషి శరీరంలో కరోనా వికృత చేష్టలకు అడ్డుకట్ట వేయాలంటే యోగా ఒక్కటే చక్కటి మార్గం. ఇందుకు కొన్ని బ్రీతింగ్ ఎక్సర్సైజ్లు నిత్యం చేస్తే సరిపోతుంది. భస్త్రిక, కపాలభాతి, అనులోమ విలోమ, శీతలి, బ్రామరీ, సూర్యభేదిలు ఉపయోగపడుతాయి. వాటిని ఇప్పుడు చూద్దాం..
అనులోమ విలోమ విధానం
అనులోమ విలోమ ప్రాణాయామాన్ని సుఖ ప్రాణాయామం, నాడీ శోధన అని కూడా అంటారు. నిటారుగా కూర్చొని ముందుగా ఎడమ ముక్కు రంధ్రం నుంచి గాలి పీల్చి కుడి ముక్కు రంధ్రం ద్వారా వదలాలి. ఆ తర్వాత అదే కుడి ముక్కు రంధ్రం నుంచి గాలి పీల్చి ఎడమకు వదలాలి. ఇలా కుడి నుంచి ఎడమకు ఎడమ నుంచి కుడికి గాలిని తీస్తూ వదులుతూ ఉండాలి. ఇలా తొమ్మిది సార్లు చేయాలి. అతి వేగంగా చేయకూడదు. తొమ్మిది సార్లు చేసేందుకు కనీసం 15 నిమిషాలు పట్టాలి. చిన్న పిల్లల నుంచి వృద్ధుల వరకు ఈ ప్రాణాయామాన్ని చేయవచ్చు.
సూర్య అనులోమ విలోమ..
వెన్నెముక నిటారుగా పెట్టి కూర్చొని ముక్కు ఎడమ రంధ్రాన్ని మూసి, కుడి ముక్కు రంధ్రం ద్వారా గాలిని లోపలికి పీల్చాలి. అదే ముక్కు రంధ్రం ద్వారా వదలాలి. ప్రారంభంలో ఇలా తొమ్మిది సార్లు చేయాలి. సూర్య అనులోమ విలోమ మన శరీరంలో హాని చేసే ఎలాంటి సూక్ష్మ క్రిములనైనా నెట్టి వేసేందుకు చాలా ఉపయోగపడుతుంది. ఈ విధానం ద్వారా శరీరంలో వేడి పుట్టి శ్వాస నాళాలు, ఊపిరి తిత్తులు, పొట్టలో ఉన్న వైరస్లు నశిస్తాయి.
వజ్రాసనంలో మోకాళ్లపై కూర్చొని కొద్దిగా ముందుకు జరిగి అర చేతులను నేలకు ఆనించాలి. నడుము, వెన్నెముక భాగాన్ని కొద్దిగా పల్లముగా వంచి డాగ్ పొజిషన్లో ఉండాలి. ఆ తర్వాత నాలుకను ముందుకు చాచి పొట్ట కదిలే విధంగా శ్వాసను వేగంగా బయటకు నెట్టాలి. ముందుకు చాచి ఉన్న నాలుక డ్రై అయ్యేంత వరకు బ్రీతింగ్ చేస్తూనే ఉండాలి. దీంతో ఊపిరితిత్తులు శుభ్రమవుతాయి. వైరస్ ఊపిరితిత్తుల్లో ఏమూలన ఉన్నా నాశనమవుతుంది.
వెనక్కి కదుపుతూ..
ముందుగా నిటారుగా నిలబడాలి. రెండు పాదాల మధ్యలో కొంత దూరం ఉంచుకొని, రెండు చేతులను భుజాలకు సమానంగా తీసుకురావాలి. ఆ తర్వాత రెండు అర చేతులు ముందుకు కదపాలి. అప్పుడు శ్వాసను పూర్తిగా వదలాలి. తిరిగి చేతులు వెనక్కి తీసుకుపోవాలి. ఈ సారి గాలి గట్టిగా ఊపిరితిత్తుల నిండా పీల్చుకోవాలి. ఇలా పది సార్లు చేయాలి. ఊపిరితిత్తుల్లోకి సంపూర్ణంగా ప్రాణవాయువు నిండి, శ్వాసకు సంబంధించిన ఎలాంటి వ్యాధులు రావు.