నిధులు విడుదలచేయండి మంత్రి హరీశ్‌రావుకు ట్రెసా ప్రతినిధుల వినతి

హైదరాబాద్‌, నమస్తే తెలంగాణ: తాసిల్దార్ల వెహికిల్‌ అలవెన్స్‌, నిర్వహణ ఖర్చులకు నిధులు విడుదలచేయాలని తెలంగాణ రెవెన్యూ ఎంప్లాయీస్‌ సర్వీసెస్‌ అసోసియేషన్‌ (ట్రెసా) ప్రతినిధులు ఆర్థికశాఖ మంత్రి హరీశ్‌రావుకు విజ్ఞప్తిచేశారు. శనివారం హైదరాబాద్‌లోని అరణ్యభవన్‌లో మంత్రిని ట్రెసా నేతలు కలిశారు. ఈ ఏడాది మార్చిలో ల్యాప్స్‌ అయిన నిధులతోపాటు ఈ ఆర్థిక సంవత్సరంలో పెండింగ్‌లో ఉన్న బడ్జెట్‌ను విడుదలచేయాలని కోరారు. అంతకుముందు సీఎంవో కార్యదర్శి స్మితా సబర్వాల్‌ను కలిసిన ట్రెసా నాయకులు.. నూతన రెవెన్యూ చట్టం నేపథ్యంలో సిబ్బంది సంఖ్య పెంచాలని, కొత్త బాధ్యతలకు అనుగుణంగా వసతులు కల్పించాలని కోరారు. కార్యక్రమాల్లో ట్రెసా అధ్యక్షుడు వంగ రవీందర్‌రెడ్డి, ప్రధాన కార్యదర్శి కే గౌతమ్‌కుమార్‌, అసోసియేట్‌ అధ్యక్షుడు రియాజుద్దీన్‌, కార్యదర్శులు రాంరెడ్డి, పల్నాటి శ్రీనివాస్‌రెడ్డి పాల్గొన్నారు.