శుక్రవారం 10 జూలై 2020
Telangana - Jun 02, 2020 , 10:52:50

గోదావరి జలాలతో అమరులకు నివాళి: హరీశ్‌రావు

గోదావరి జలాలతో అమరులకు నివాళి: హరీశ్‌రావు

హైదరాబాద్‌: తెలంగాణ రాష్ట్ర ఆవిర్భావ దినోత్సవ వేడుకలు రాష్ట్రవ్యాప్తంగా నిరాడంబరంగా జరగుతున్నాయి. జిల్లా కేంద్రాల్లో మంత్రులు జాతీయ జెండాను ఆవిష్కరించారు. అమర వీరులకు ఘనంగా నివాళులు అర్పించారు. సిద్దిపేటలో రాష్ట్ర ఆవిర్భావ వేడుకల్లో మంత్రి హరీశ్‌రావు పాల్గొన్నారు. గోదావరి జలాలతో అమరవీరుల స్తూపానికి నివాళులర్పించారు. అనంతరం జిల్లా కలెక్టర్‌ కార్యాలయంలో ఎగురవేశారు. రాష్ట్రం సాధించుకున్న ఫలాలు ఈ రోజు సిద్దిపేటకు అందాయని చెప్పారు. అమరుల ఆశయాలకు అనుగుణంగా రాష్ట్రం పురోగమిస్తున్నదని తెలిపారు. దేశానికి ఆదర్శంగా తెలంగాణ నిలుస్తుందని వెల్లడించారు. గాంధీ కలలుగన్న గ్రామీణ భారతాన్ని పల్లెప్రగతి ద్వారా సాధించామని చెప్పారు. అమరుల ఆశయాలకు అనుగుణంగా రాష్ట్రం పురోగమిస్తున్నదని చెప్పారు. 

రాజన్నసిరిసిల్ల జిల్లా కేంద్రంలో అమరవీరుల స్తూపం వద్ద మంత్రి కే తారకరామారావు నివాళులు అర్పించారు. అనంతరం కలెక్టరేట్‌లో జాతీయ జెండా ఎగురువేశారు. పెద్దపల్లి జిల్లాలో జరిగిన తెలంగాణ రాష్ట్ర ఆవిర్భావ ఆరో వార్షికోత్సవంలో మంత్రి ఈటల రాజేందర్‌ పాల్గొన్నారు. జిల్లా కేంద్రంలోని అమరవీరుల స్తూపానికి నివాళులర్పించారు. అనంతరం కలెక్టరేట్‌లో జాతీయ జెండా ఎగురవేశారు.  

సంగారెడ్డిలో జరిగిన రాష్ట్ర ఆవిర్భావ వేడుకల్లో హోం మంత్రి మహమూద్‌ పాల్గొన్నారు. తెలంగాణ తల్లికి పూలవేసిన అనంతరం కలెక్టరేట్‌లో జాతీయ జెండా ఆవిష్కరించారు. వికారాబాద్‌లో డిప్యూటీ స్పీకర్‌ టీ పద్మారావు గౌడ్‌ రాష్ట్ర అవతరణ వేడుకల్లో పాల్గొన్నారు. కలెక్టరేట్‌లో జాతీయ జెండా ఎగురవేశారు. రాష్ట్ర అవతరణ దినోత్సవాన్ని పురస్కరించుకుని రంగారెడ్డి జిల్లా సరూర్‌నగర్‌ స్టేడియంలో అమరవీరుల స్మారక చిహ్నానికి మంత్రి సబితా ఇంద్రారెడ్డి నివాళులు అర్పించారు.    

వరంగల్‌ రూరల్‌ జిల్లా కలెక్టర్‌ కార్యాలయంలో మంత్రి ఎర్రబెల్లి దయాకర్‌ రావు జెండా ఎగురవేశారు. హన్మకొండలోని అమరుల స్తూపం వద్ద నివాళులర్పించారు. ఉద్యమ నాయకుడు కేసీఆర్‌ నాయకత్వంలో అనేక మంది పోరాటాల ఫలితంగా తెలంగాణ సిద్ధించిందని అన్నారు. ప్రజల అవసరాలు, ఆకాంక్షలకు అనుగుణంగా పరిపాలన సాగుతున్నదని, సాగునీటితో తెలంగాణ సస్యశ్యామలమవుతుందని చెప్పారు. 

నిర్మల్‌లో జరిగిన రాష్ట్ర ఆవిర్భావ వేడుకల్లో మంత్రి అల్లోల ఇంద్రకరణ్‌ రెడ్డి పాల్గొన్నారు. కలెక్టర్‌ కార్యాలయ ప్రాంగణంలో జాతీయ జెండా ఎగురువేశారు. ప్రజలకు రాష్ట్ర అవతర దినోత్సవ శుభాకాంక్షలు తెలిపారు. ఎంతోమంది అమరులు తమ ప్రాణాలను త్యాగం చేయడంతో రాష్ర్టాన్ని సాధించుకోగలిగామన్నారు. వారి త్యాగాలను వృథా పోనీయకుండా సీఎం కేసీఆర్‌ రాష్ర్టాని బంగారు తెలంగాణగా రూపుదిద్దేందుకు చర్యలు తీసుకుంటున్నారని చెప్పారు. జగిత్యాల జిల్లా కేంద్రంలో మంత్రి కొప్పుల ఈశ్వర్‌ జాతీయ జెండాను ఆవిష్కరించారు. నిజామాబాద్‌ జిల్లా కలెక్టరేట్‌లో జరిగిన రాష్ట్ర అవతరణ వేడుకల్లో మంత్రి వేముల ప్రశాంత్‌ రెడ్డి పాల్గొన్నారు. మహబూబాబాద్‌ జిల్లా కలెక్టరేట్‌లో మంత్రి సత్యవతి రాథోడ్‌ జాతీయ జెండా ఎగురవేశారు. మెదక్‌లో జరిగిన రాష్ట్ర ఆవిర్భావ వేడుకల్లో మంత్రి తలసాని శ్రీనివాస్‌ యాదవ్‌ పాల్గొన్నారు. చిన్నశంకరంపేటలోని తెలంగాణ అమరవీరులకు నివాళులర్పించారు.


logo