మొదలైన దీర్ఘరాత్రులు

• పగలు కంటే రాత్రి సమయం అధికం
  
• శీతల ఐనము సంభవించడమే కారణం
• ఓయూ ఖగోళశాస్త్ర విభాగాధిపతి శాంతిప్రియ

హైదరాబాద్‌ సిటీబ్యూరో, నమస్తే తెలంగాణ: దీర్ఘరాత్రులు (లాంగెస్ట్‌ నైట్స్‌) మొదలయ్యాయి. డిసెంబర్‌ 22 నుంచి శీతల ఐనము ప్రవేశించడంతో పగలు కంటే రాత్రి సమయం ఎక్కువగా ఉండనున్నదని ఉస్మానియా యూనివర్సిటీ ఖగోళశాస్త్ర విభాగాధిపతి డాక్టర్‌ డీ శాంతిప్రియ తెలిపారు. సూర్యోదయ, సూర్యాస్తమయ సమయాలు క్రమంగా మారుతూ ఉంటాయని.. ఈ మార్పులను రెండు ఐనములుగా విభజిస్తారని పేర్కొన్నారు. డిసెంబర్‌ 22న వచ్చే ఐనము రెండవదని, శీతల ఐనము అని పేర్కొన్నారు. జూన్‌ 20 లేదా 21వ తేదీన వేసవి ఐనము ప్రవేశిస్తుందని చెప్పారు. ఆ రోజునుంచి పగటి సమయం రాత్రి సమయంకంటే ఎక్కువగా ఉంటుందని వివరించారు. కాగా, మార్చి 20 లేదా 21న, సెప్టెంబర్‌ 20 లేదా 21న విషువత్తు సంభవిస్తుందని ఆ రోజున పగలు, రాత్రి సమంగా ఉంటాయని చెప్పారు. ఈసారి సంభవించిన ఐనములో గురుడు, శని గ్రహాలు అతి దగ్గరగా వచ్చి ప్రకాశవంతంగా దర్శనమిచ్చాయని తెలిపారు. రంగారెడ్డి జిల్లా మంచాల మండలం జాపాల్‌-రంగాపూర్‌ అబ్జర్వేటరీ నుంచి ఉస్మానియా యూనివర్సిటీ ఖగోళశాఖ ఆధ్వర్యంలో ఆ మహా సముచ్ఛయాన్ని విద్యార్థులు వీక్షించారని.. టెలిస్కోప్‌ ద్వారా ఫొటోలు తీసి వారికి వివరించామని చెప్పారు.