పర్యాటక ప్రాంతాలుగా రిజర్వాయర్లు

• మంత్రి శ్రీనివాస్‌గౌడ్‌  
  

హైదరాబాద్‌, నమస్తే తెలంగాణ: రాష్ట్రంలోని కాళేశ్వరం, మేడిగడ్డ, అన్నారం, మిడ్‌మానేరు, కోయిల్‌సాగర్‌, కరివేన, ఉదండాపూర్‌, లక్నవరం వంటి రిజర్వాయర్ల వద్ద టూరిజం అభివృద్ధికి కృషి చేస్తున్నామని పర్యాటక శాఖ మంత్రి వీ శ్రీనివాస్‌గౌడ్‌ తెలిపారు. సోమశిల, పాకాలలో టూరిజం అభివృద్ధి చేశామని చెప్పారు. ప్రపంచ పర్యాటక దినోత్సవం సందర్భంగా ఆదివారం పర్యాటకం-గ్రామీణాభివృద్ధిపై టూరిజం అనుబంధ సంస్థల వారితో వెబ్‌నార్‌ నిర్వహించనున్నట్లు మంత్రి శ్రీనివాస్‌గౌడ్‌ తెలిపారు. శనివారం రవీంద్రభారతిలోని కార్యాలయంలో మంత్రి శ్రీనివాస్‌గౌడ్‌ మీడియాతో మాట్లాడు తూ.. ప్రపంచ పర్యాటక దినోత్సవం సందర్భంగా.. పర్యాటకుల కోసం విశేషసేవలు అందించిన టూరిజం అనుబంధ సంస్థలకు అవార్డులను అందించనున్నామని తెలిపారు. రాష్ట్రంలో పర్యాటక అభివృద్ధికి సీఎం కేసీఆర్‌ ప్రణాళికలను రూపొందిస్తున్నారని పేర్కొన్నారు. 

రాష్ట్రంలో టూరిజం అభివృద్ధికి అద్భుత అవకాశాలు ఉన్నాయన్నారు. బుద్ధవనం ప్రాజెక్టులో భాగంగా నాగార్జునసాగర్‌, ఫణిగిరి, కోటిలింగాలలో అనేక ప్రణాళికలు రూపొందించినట్లు చెప్పారు. మహబూబ్‌నగర్‌లోని అతిపెద్ద కేసీఆర్‌ అర్బన్‌ ఎకో టూరిజం పార్క్‌, వికారాబాద్‌లోని అనంతగిరి నుంచి నల్లమల వరకు ఉన్న ఎకో పార్కులు, బొగత, కుంటాల, పొచ్చెర వంటి జలపాతాలు, ప్రకృతి రమణీయ దృశ్యాలు ఎన్నో ఉన్నాయని చెప్పారు.