వేరుశనగ క్వింటాల్‌ @ రూ.7,712

జోగుళాంబ గద్వాల :  జిల్లా కేంద్రంలోని వ్యవసాయ మార్కెట్‌లో వేరుశనగ పంట పండించిన రైతుకు మద్దతు ధర లభించింది. ఈ ఏడాది ఇదే అత్యధిక ధర కావడంతో రైతులు హర్షం వ్యక్తం చేశారు. వనపర్తి జిల్లా చిన్నంబావి మండలం కాలూరు గ్రామానికి చెందిన రైతు శ్రీనివాసులు మంగళవారం తాను పండించిన వేరుశనగను గద్వాల వ్యవసాయ మార్కెట్‌కు విక్రయానికి తీసుకొచ్చాడు. వేరుశనగ కాయ నాణ్యతగా ఉండటంతో ట్రేడరు అత్యధిక ధర చెల్లించారు. క్వింటాలుకు రూ.7,712 ధర లభించింది.

మార్కెట్‌కు 1,059 క్వింటాళ్ల వేరుశనగ రాగ క్వింటాలుకు గరిష్ఠంగా రూ.7,712 ధర రాగా.. కనిష్ఠంగా రూ.3,300 వచ్చింది. ఆముదాలు 18 క్వింటాళ్లు రాగా అత్యధికంగా రూ.4,130 ధర రాగా.. అత్యల్పంగా రూ.3,857 ధర వచ్చింది. వరి 17 క్వింటాళ్లు రాగా గరిష్ఠంగా రూ.1,782 పలకగా.. కనిష్ఠంగా రూ.1,551 ధర పలికింది. కందులు 230 క్వింటాళ్లు రాగా అత్యధికంగా రూ.5,826 ధర రాగా.. అత్యల్పంగా రూ.4,559 లభించింది. మార్కెట్‌లో పంటలకు మద్దతు ధరలు లభిస్తుండటంతో మార్కెట్‌ కమిటీ చైర్‌పర్సన్‌ రామేశ్వరమ్మ హర్షం వ్యక్తం చేశారు.