అచ్చంపేట, సెప్టెంబర్ 4: కిన్నెర కళకు సినీహీరో పవన్ కల్యాణ్ ప్రోత్సాహం అందించారు. నాగర్కర్నూల్ జిల్లా లింగాల మండలం అవుసలికుంట గ్రామానికి చెందిన జానపద కళాకారుడు, 12 మెట్ల కిన్నెర వాయిద్యకారుడు దర్శన మొగులయ్యకు సినీ నటుడు పవన్ కల్యాణ్ రూ.2 లక్షల ఆర్థిక సాయం ప్రకటించారు. భీమ్లానాయక్ సినిమాలోని గీతానికి కిన్నెర మెట్లపై స్వరాన్ని పలికించిన కళాకారుడికి సాయం అందిస్తున్నట్టు చెప్పారు. కనుమరుగవుతున్న ఇలాంటి జానపద కళారూపాలను యువతకు పరిచయం చేయాలనే తపన పవన్ కల్యాణ్లో ఉన్నదని జనసేన రాజకీయ కార్యదర్శి హరిప్రసాద్ శనివారం ఒక ప్రకటనలో పేర్కొన్నారు. పవన్ స్థాపించిన లెర్నింగ్ సెంటర్ ఫర్ హ్యూమన్ ఎక్సలెన్స్ సంస్థ ద్వారా మొగులయ్యకు సాయం అందజేస్తామని తెలిపారు. పవన్ ఆర్థిక సాయం ప్రకటించడంపై మొగులయ్య హర్షం వ్యక్తం చేశారు. ఈ డబ్బులతో సొంతూరిలోని తన ఇంటికి మరమ్మతు చేయిస్తానని పేర్కొన్నారు. ఈ సందర్భంగా పవన్కు ధన్యవాదాలు తెలిపారు.