జకర్తా : కొవిడ్-19 టీకాపై ఇండోనేషియా ముస్లింల ఆందోళనను ఆస్ట్రాజెనెకా కౌంటర్ చేసింది. ఆస్ట్రాజెనెకా వ్యాక్సిన్ “హరామ్” అని ఇండోనేషియా అత్యున్నత ముస్లిం మత పెద్దల కౌన్సిల్ ఆందోళన వ్యక్తం చేసింది. ఈ నేపథ్యంలో సదరు ఔషధ ఉత్పత్తి సంస్థ తమ ఆస్ట్రాజెనెకా వ్యాక్సిన్పై వచ్చిన ఆరోపణలను ఆదివారం కొట్టిపారేస్తూ ప్రకటన విడుదల చేసింది.
తమ కొవిడ్-19 వ్యాక్సిన్లో పంది మాంసం ఉత్పన్న పదార్థాలు వేటినీ వాడలేదని స్పష్టం చేసింది. ప్రపంచంలో అత్యధిక జనాభా కలిగిన ముస్లిం దేశమైన ఇండోనేషియాలో ఆస్ట్రాజెనెకా వ్యాక్సిన్ ఇస్లామిక్ చట్టాన్ని ఉల్లంఘిస్తున్నదని ఇండోనేషియా అత్యున్నత ముస్లిం మత పెద్ద కౌన్సిల్, ఇండోనేషియా ఉలేమా కౌన్సిల్ ఆందోళన వ్యక్తం చేసింది. శుక్రవారం తమ వెబ్సైట్లో ఈ టీకా “హరామ్” అని వెల్లడించారు.
ఈ వ్యాక్సిన్ తయారీ ప్రక్రియలో “పంది ప్యాంక్రియాస్ నుంచి తీసిన ట్రిప్సిన్”ను ఉపయోగిస్తున్నట్లు వారు ఆరోపించారు. ఈ వ్యాక్సిన్ను అత్యవసర పరిస్థితుల్లో వినియోగించేందుకు అక్కడి మెడికల్ కౌన్సిల్ ఆమోదించింది.
“ఉత్పత్తి ప్రక్రియ యొక్క అన్ని దశలలో ఈ వైరస్ వెక్టర్ వ్యాక్సిన్ పంది మాంసం-ఉత్పన్న ఉత్పత్తులు లేదా ఇతర జంతు ఉత్పత్తులతో సంబంధం కలిగి లేదు” అని ఆస్ట్రాజెనెకా ఇండోనేషియా ప్రతినిధి రిజ్మాన్ అబుడెరి ఒక ప్రకటనలో పేర్కొన్నారు. ఐరోపాలో కొంతమంది టీకా తీసుకున్నవారిలో రక్తం గడ్డకట్టడానికి కారణమైందనే నివేదికలను సమీక్షించిన తరువాత ఆస్ట్రాజెనెకా వ్యాక్సిన్ వాడకాన్ని ఇండోనేషియా అధికారులు శుక్రవారం ఆమోదించినట్లుగా తెలుస్తున్నది.