కొవిడ్పై భయాందోళనలకు తప్పుడు సమాచారమే ప్రధాన కారణం
పేషెంట్ గైడ్ను విడుదల చేసిన ఏఐజీ చైర్మన్ డాక్టర్ నాగేశ్వర్రెడ్డి
హైదరాబాద్, మే10 (నమస్తే తెలంగాణ): కరోనా సెకండ్ వేవ్ దేశాన్ని కుదిపేస్తుండటంతో జనం బెంబేలెత్తుతున్నారు. మౌలిక సదుపాయాలు, ఆక్సిజన్ కొరతతో పాటు తప్పుడు సమాచారం ప్రజల్లో భయాందోళనలకు ప్రధాన కారణంగా నిలుస్తున్నదని ఏఐజీ దవాఖానల చైర్మన్ డాక్టర్ డీ నాగేశ్వర్రెడ్డి అన్నారు. కరోనా సెకండ్ వేవ్పై అవగాహన పెంచేలా రూపొందించిన పేషెంట్ గైడ్ను సోమవారం ఆయన సైబరాబాద్ పోలీస్ కమిషనర్ వీసీ సజ్జనార్, ఏఐజీ దవాఖానల డైరెక్టర్ జీవీ రావుతో కలిసి ఆవిష్కరించారు. ఈ సందర్భంగా డాక్టర్ నాగేశ్వర్రెడ్డి మాట్లాడుతూ.. దవాఖానల్లో అయినా, ఇంట్లో అయినా శాస్త్రీయ పద్ధతిలోనే కరోనా వైరస్ను ఎదుర్కోవడం సాధ్యమవుతుందన్నారు. కొవిడ్ ముందస్తు లక్షణాలను గుర్తించి అప్రమత్తం కావాలని, వైద్యులను సంప్రదించకుండా సొంత వైద్యం (సెల్ఫ్ మెడికేషన్) చేసుకోవడం మంచిది కాదని స్పష్టం చేశారు. కొవిడ్ను ఎదుర్కోవడంపై ఇంటర్నెట్లో ఎంతో సమాచారం ఉన్నప్పటికీ సోషల్ మీడియాలో తప్పుడు సమాచారం వ్యాప్తి వల్ల సమస్యలు ఉత్పన్నమవుతున్నాయన్నారు. ఇలాంటి సమస్యలకు తాము రూపొందించిన పేషెంట్ గైడ్ చక్కటి పరిష్కారంగా నిలుస్తుందని డాక్టర్ నాగేశ్వర్రెడ్డి చెప్పారు. అందరికీ సులభంగా అర్థమయ్యే రీతిలో ఏఐజీ కొవిడ్ గైడ్ను రూపొందించడం అభినందనీయమని సైబరాబాద్ సీపీ సజ్జనార్ అన్నారు.
ఏఐజీ పేషెంట్ గైడ్లోని ముఖ్య వివరాలు…
కొవిడ్-19 టెస్టింగ్, ఐసోలేషన్, ట్రీట్ మెంట్, స్వల్ప లక్షణాలున్నవారు ఇంట్లోనే చికిత్స పొందడం, దవాఖానకు వెళ్లడం, సొంతంగా లాక్డౌన్ విధించుకోవడం, వ్యాక్సిన్ తీసుకోవడం లాంటి అంశాల గురించి ఇందులో వివరించారు.
జ్వరం, దగ్గు, ఊపిరి సమస్య, కండరాల నొప్పులు, తలనొప్పి, గొంతు నొప్పి, వాసన, రుచి కోల్పోవడం, ముక్కు కారడం, వాంతులు, డయారేయా లాంటి లక్షణాలుంటే వెంటనే అప్రమత్తం కావాలి. వైరస్ వ్యాపించిన 2 నుంచి 14 రోజుల్లో ఎప్పుడైనా ఈ లక్షణాలు కనిపించవచ్చు. ఈ లక్షణాల్లో ఒకటి లేదా ఎక్కువ కనిపించినా వెంటనే ఐసోలేట్ అవ్వాలి.
స్వల్ప లక్షణాలుంటే ఇంట్లోనే చికిత్స పొందాలి. ఈ సమయంలో థర్మామీటర్, ఆక్సీమీటర్, బ్లడ్ ప్రెజర్ (బీపీ) మానిటర్ (తప్పనిసరి కాదు), బ్లడ్ గ్లూకోజ్ మానిటర్ (డయాబెటిస్ వారికి) వంటివి వెంట ఉంచుకోవాలి. ప్రతి 8 గంటలకు ఉష్ణోగ్రతను, ప్రతి 4 గంటలకు ఆక్సిజన్ స్థాయిని, ప్రతి రోజు బీపీని చెక్ చేసుకోవాలి. ఈ సమయంలో పారాసిటామాల్ 650 ఎంజీ, బుడెసోనైడ్ ఇన్హెల్డ్, క్యాప్ అప్రైస్ డీ3 60కే (విటమిన్-డీ), విటమిన్-సీ 1 గ్రామ్ మందులు వెంట ఉంచుకోవాలి. ఐసోలేషన్లో ఉన్నపుడు మాస్కులు ధరించాలి, సెపరేట్ బాత్రూం ఉండేలా చూసుకోవాలి. వెంటిలేషన్ ఎక్కువగా ఉండాలి. కామన్ ఏసీ వినియోగించ కూడదు.
ఐసోలేషన్లో తీసుకోవాల్సిన ఆహారం…
డీహైడ్రేట్ కాకుండా నీరు ఎక్కువగా తాగాలి.
ఆకు కూరలు, కూరగాయలు, నిమ్మ (సిట్రస్) జాతి పండ్లు తీసుకోవాలి
పనీర్, తక్కువ కొవ్వు ఉండే మాంసం, చికెన్, చేపలు
ప్రాసెస్డ్, డీప్ ఫ్రైడ్ ఫుడ్స్కు దూరంగా ఉండాలి
రుచిని కోల్పోకుండా ఉండేందుకు నిమ్మకాయ పచ్చడి లాంటివి రుచి చూడాలి