శనివారం 06 జూన్ 2020
Telangana - May 07, 2020 , 02:20:04

రాజధాని దిగ్బంధం

రాజధాని దిగ్బంధం

  • హైదరాబాద్‌వారు బయటకు వెళ్లొద్దు.. బయటివారు హైదరాబాద్‌ రావద్దు
  • వ్యాప్తి తీవ్రంగా ఉన్నచోట్ల కట్టుదిట్టం
  • కర్నూలు, గుంటూరు సరిహద్దుల్లో చెక్‌
  • హైదరాబాద్‌ చుట్టుపక్కలే కొత్తకేసులు
  • వైరస్‌ నియంత్రణకు పకడ్బందీ చర్యలు
  • చురుకైన అధికారులను నియమించండి
  • అధికారులకు సీఎం కేసీఆర్‌ ఆదేశాలు

హైదరాబాద్‌, నమస్తే తెలంగాణ: కరోనా వైరస్‌ వ్యాప్తి తీవ్రత ఎక్కువగా ఉన్న హైదరాబాద్‌, దాని చుట్టుపక్కల ప్రాంతాల్లో కట్టుదిట్టమైన నియంత్రణ చర్యలు పాటించాలని ముఖ్యమంత్రి కే చంద్రశేఖర్‌రావు అధికారులను ఆదేశించారు. హైదరాబాద్‌ నగరంతోపాటు కర్నూలు, గుంటూరు జిల్లాలకు సరిహద్దులోని గ్రామాల్లో అప్రమత్తంగా ఉండాలని చెప్పారు. వైరస్‌ వ్యాప్తి నివారణ, లాక్‌డౌన్‌ అమలు, సహాయక చర్యలపై బుధవారం ముఖ్యమంత్రి కేసీఆర్‌ ప్రగతిభవన్‌లో ఉన్నతస్థాయి సమీక్ష నిర్వహించారు. ‘హైదరాబాద్‌ దాని చుట్టుపక్కల జిల్లాలు మినహా రాష్ట్రంలోని మిగతా జిల్లాల్లో పరిస్థితి అదుపులోనే ఉన్నది.

 ఆ ప్రాంతాల్లో వ్యాప్తి చాలా తక్కువగా ఉన్నది. కొత్తగా నమోదవుతున్న కేసులన్నీ హైదరాబాద్‌, మేడ్చల్‌, రంగారెడ్డి, వికారాబాద్‌ జిల్లాల్లోనే ఉన్నాయి. కాబట్టి అధికారులు హైదరాబాద్‌పై ఎక్కువ దృష్టి కేంద్రీకరించాలి. ఎవరికి వ్యాధి లక్షణాలు కనిపించినా వెంటనే పరీక్షలు జరిపి అవసరమైన చికిత్సచేయించాలి. ఎవరికి పాజిటివ్‌ అని తేలినా.. ఆ వ్యక్తిని కలిసిన వారందరినీ క్వారంటైన్‌చేయాలి. హైదరాబాద్‌లోని వారు బయటకు పోకుండా, బయటి వారు హైదరాబాద్‌లోకి రాకుండా నియంత్రణ చర్యలు పకడ్బందీగా చేపట్టాలి. చురుకైన  ఐఏఎస్‌, పోలీస్‌, వైద్య ఆరోగ్యశాఖ అధికారులను ప్రత్యేకాధికారులుగా నియమించాలి. మొత్తం హైదరాబాద్‌ను చుట్టుముట్టాలి. వైరస్‌ను తుదముట్టించాలి’ అని ముఖ్యమంత్రి చెప్పారు. ‘పక్క రాష్ట్రంలోని కర్నూలు, గుంటూరు జిల్లాల్లో కరోనా వ్యాప్తి ఎక్కువగా ఉన్నది. వాటికి సరిహద్దుల్లోనే తెలంగాణ గ్రామాలున్నాయి. 


ఈ రెండు జిల్లాల సరిహద్దు గ్రామాల్లో ప్రత్యేకాధికారులను నియమించి నియంత్రణ చర్యలు చేపట్టాలి. అటు వారెవరూ ఇటు రాకుండా, ఇటు వారెవరూ అటు పోకుండా ఆపాలి. వైరస్‌ మన దగ్గర పుట్టింది కాదు. ఇతర ప్రాంతాల నుంచి వ్యాప్తి చెందేదే, కాబట్టి ప్రజల రాకపోకలను ఎంత కట్టడి చేయగలిగితే వైరస్‌ వ్యాప్తిని అంత బాగా అరికట్టవచ్చు’ అని సీఎం కేసీఆర్‌ చెప్పారు. ఈ సమీక్షాసమావేశంలో వైద్యారోగ్యశాఖ మంత్రి ఈటల రాజేందర్‌, ప్రభుత్వ ముఖ్య సలహాదారు రాజీవ్‌శర్మ, ప్రభుత్వ ప్రధాన కార్యదర్శి సోమేశ్‌కుమార్‌, డీజీపీ మహేందర్‌రెడ్డి, ఆరోగ్యశాఖ ప్రత్యేక ప్రధాన కార్యదర్శి శాంతికుమారి, ముఖ్య కార్యదర్శులు నర్సింగ్‌రావు, రామకృష్ణారావు పాల్గొన్నారు.


logo