శుక్రవారం 07 ఆగస్టు 2020
Telangana - Jul 16, 2020 , 02:20:26

టాయిలెట్‌ ఆన్‌ వీల్స్‌

టాయిలెట్‌ ఆన్‌ వీల్స్‌

  • ప్రతి మున్సిపాలిటీలో ఏర్పాటు
  • కోస్గి మున్సిపాలిటీ తరహాలో నిర్వహణ
  • ఆగస్టు 15 నాటికి లక్ష్యం పూర్తిచేయాలి
  • మంత్రి కేటీఆర్‌ ఆదేశాలతో ఉత్తర్వులు

హైదరాబాద్‌, నమస్తే తెలంగాణ: రాష్ట్రంలోని అన్ని మున్సిపాలిటీల్లో ‘టాయిలెట్‌ ఆన్‌ వీల్స్‌' ఏర్పాటుచేసేందుకు రంగం సిద్ధమవుతున్నది. బహిరంగ మలమూత్ర విసర్జన రహిత (ఓడీఎఫ్‌) పట్టణాల సాధనలో భాగంగా ఇప్పటికే ప్రభుత్వం భారీ సంఖ్యలో వ్యక్తిగత మరుగుదొడ్లను నిర్మించిన సంగతి తెలిసిందే. ప్రస్తుతం సామాజిక టాయిలెట్ల నిర్మాణంపై దృష్టిసారించింది. ఆగస్టు 15వ తేదీ నాటికి ప్రతి వెయ్యి మంది జనాభాకు ఒక పబ్లిక్‌ టాయిలెట్‌ నిర్మించాలని లక్ష్యంగా పెట్టుకున్నది. ఇందులో భాగంగా అవసరమైన చోట్ల ‘టాయిలెట్‌ ఆన్‌ వీల్స్‌' ఏర్పాటుచేయాలని మంత్రి కేటీఆర్‌ ఇటీవల ఆదేశించారు. నారాయణపేట జిల్లా కోస్గి మున్సిపాలిటీలో ఏర్పాటుచేసిన ‘స్త్రీ టాయిలెట్ల’ను ఆదర్శంగా తీసుకోవాలని సూచించారు. వీటిని తక్కువ వ్యవధిలో పూర్తిచేయడంతోపాటు కావాల్సినచోటికి తరలించే అవకాశం ఉంటుందని పేర్కొన్నారు. 

ఈ మేరకు పురపాలకశాఖ బుధవారం ఉత్తర్వులు జారీచేసింది. సమీప ఆర్టీసీ డిపోల నుంచి కాలంచెల్లిన బస్సులను తీసుకొని వాటిని ‘స్త్రీ టాయిలెట్లు’గా మార్చాలని సూచించింది. మహిళలు, బాలికలు, ట్రాన్స్‌జెండర్ల కోసం వసతులు కల్పించాలని స్పష్టంచేసింది. వీటిని రద్దీ మార్కెట్లు, పర్యాటకప్రాంతాలు, పార్కులు, ప్రార్థనా మందిరాలు, నిర్మాణాలు జరుగుతున్న ప్రాంతాలు, వారాంతపు అంగళ్లు వంటి ప్రాంతాలకు తరలించవచ్చని అధికారులు చెప్తున్నారు. వీటి నిర్వహణను స్లమ్‌ లెవల్‌ ఫెడరేషన్స్‌ (ఎస్‌ఎల్‌ఎఫ్‌) లేదా పట్టణ వికలాంగుల సమితి లేదా మహిళా సంఘాలు లేదా ఔట్‌ సోర్సింగ్‌ ఏజెన్సీకి అప్పగించాలని సూచించారు. టాయిలెట్‌ ఆన్‌ వీల్స్‌కు సంబంధించిన డిజైన్‌, ఏర్పాటుచేయాల్సిన వసతులను అడ్మినిస్ట్రేటివ్‌ స్టాఫ్‌ కాలేజ్‌ ఆఫ్‌ ఇండియా (ఏఎస్‌సీఐ) సూచించింది.  


ఈ టాయిలెట్లలోని వసతులు 

  • ఇండియన్‌, వెస్ట్రన్‌ కమోడ్‌
  • వ్యర్థాల నిర్వహణకు బయోటాయిలెట్‌ 
  • తగినంత గాలి, వెలుతురు వచ్చేలా ఏర్పాటు
  • శానిటరీ ప్యాడ్‌ డిస్పెన్సర్‌ ఏర్పాటు 
  • వాష్‌ బేసిన్‌, అద్దం, కియోస్క్‌ 
  • చంటిబిడ్డలకు తల్లులు పాలిచ్చేందుకు ప్రత్యేక స్థలం
  • టాయిలెట్‌ నిర్వాహకులకు ప్రత్యేక గది 
  • ప్రకటనల బోర్డ్‌లకు ప్రత్యేక స్థలం 
  • టాయిలెట్‌ను శుభ్రంచేసే సామగ్రిని దాచే స్థలం
  • సోలార్‌ ప్యానల్‌ (అవసరాన్ని బట్టి) 
  • దివ్యాంగులకు అనుకూలంగా ప్రత్యేకంగా ర్యాంపు, లోపలి సౌకర్యాలు

అదనపు పరికరాలు/సౌకర్యాలు 

  • శుభ్రమైన నీరు 
  • డోర్‌/కియోస్క్‌ వద్ద శానిటైజర్‌ 
  • డస్ట్‌బిన్‌, చేతులు కడుక్కోవడానికి సబ్బు/హ్యాండ్‌వాష్‌ 
  • డెయిలీ యూజ్‌, క్లీనింగ్‌, ఫీడ్‌బ్యాక్‌ రిజిస్టర్లు 
  • కంప్లయింట్‌ బాక్స్‌, హెల్ప్‌లైన్‌ నంబర్‌  
  • ఓడీఎఫ్‌, కరోనా వంటి అంశాలపై ప్రజలకు అవగాహన కల్పించేలా ఒక డిస్‌ప్లే 
  • ఈ టాయిలెట్లలో ఒక చిన్న దుకాణం వంటిది ఉంటుంది. ఇక్కడ శానిటరీ ప్యాడ్లు, మాస్కులు వంటివి అమ్ముతారు.


logo