మంగళవారం 01 డిసెంబర్ 2020
Telangana - Oct 29, 2020 , 19:52:50

సీఎం కొడ‌కండ్ల ప‌ర్య‌ట‌న ఏర్పాట్ల ప‌రిశీల‌న‌

సీఎం కొడ‌కండ్ల ప‌ర్య‌ట‌న ఏర్పాట్ల ప‌రిశీల‌న‌

జ‌న‌గాం : ఈ నెల 31న సీఎం కేసీఆర్ జ‌న‌గామ జిల్లా కొడ‌కండ్ల ప‌ర్య‌ట‌న‌కు వెళ్ల‌నున్న నేప‌థ్యంలో సీఎం ప‌ర్య‌ట‌న ఏర్పాట్ల‌ను మంత్రి ఎర్ర‌బెల్లి ద‌యాక‌ర్ రావు గురువారం ప‌రిశీలించారు. రైతు వేదిక, పల్లె ప్రకృతి వనం, సభా స్థలం, డబుల్ బెడ్ రూం ఇండ్లు, హెలిప్యాడ్ నిర్మాణ పనులను మంత్రి ప‌రిశీలించారు. ఈ సందర్భంగా మంత్రి మాట్లాడుతూ... కొడకండ్ల మండల కేంద్రంలోని రైతు వేదికను సీఎం ఈ నెల 31న ప్రారంభించనున్న‌ట్లు తెలిపారు. అనంతరం పల్లె ప్రకృతి వనాన్ని సందర్శిస్తార‌న్నారు. స్థానిక మార్కెట్ ఆవరణలో ఏర్పాటు చేసే సభలో 5 వేల మంది రైతులతో సీఎం ముఖాముఖి మాట్లాడనున్న‌ట్లు తెలిపారు. ఈ రైతు సభా వేదిక ద్వారా రైతు వేదికల ముఖ్య ఉద్దేశ్యాలను నేరుగా రైతులకు, తద్వారా రాష్ట్రంలోని రైతాంగానికి వివరించనున్న‌ట్లు చెప్పారు. 


రూ. 573 కోట్లతో రాష్ట్రంలో 2604 రైతు వేదికలను నిర్మిస్తున్న‌ట్లు వెల్ల‌డించారు. ప్రతి 5 వేల మంది రైతులకు ఒక రైతు వేదికను ప్రభుత్వం ఏర్పాటు చేస్తుంద‌న్నారు. రైతు వేదికల ద్వారా రైతు లను సంఘటితం చేయడం, సమావేశాల ద్వారా గిట్టుబాటు ధరలు తెలుసుకోవడం, వ్యవసాయ మెలకువలు నేర్చుకుని, మంచి దిగుబడులు సాధించే అవకాశం ఉంటుందన్నారు. వ్యవసాయరంగ అభివృద్ధికి మన రాష్ట్రంలో సీఎం కేసీఆర్ తీసుకున్నన్ని చర్యలు దేశంలో మరెవరూ తీసుకోలేద‌న్నారు. రెవెన్యూ నూతన చట్టం రైతులకు వరంగా మార‌నున్న‌ట్లు చెప్పారు. సాగునీరు, 24 గంటల ఉచిత విద్యుత్, రైతు బంధు, రుణాల మాఫీ, బీమా వంటి పథకాలు ఎక్కడా అమలు కావడం లేదన్నారు. తెలంగాణలో ప‌రిస్థితి ఇలా ఉంటే, వ్యవసాయానికి కేంద్రం ఇబ్బందులు పెట్టే పథకాలు చేపడుతున్న‌ద‌ని విమ‌ర్శించారు.