వేసవికు పవర్ పుల్ విద్యుత్
భద్రాద్రి జిల్లాలో విద్యుత్ లైన్లకు మరమ్మతులు
వినియోగదారులకు నాణ్యమైన విద్యుత్
సరఫరాకు అంతరాయం లేకుండా చర్యలు
లక్ష్మీదేవిపల్లి, మార్చి 20: భద్రాద్రి జిల్లాలో ఈ వేసవిలో విద్యుత్ సమస్యలు అధిగమించడానికి అధికారులు చర్యలు తీసుకుంటున్నారు. తెలంగాణ ప్రభుత్వం ఐదారేళ్ల నుంచి విద్యుత్ సమస్యలను పరిష్కరించుకుంటూ ముందుకు వెళ్తున్నది. సాగుకు, గృహ అవసరాలకు నాణ్యమైన విద్యుత్ అందిస్తున్నది. దీనిలో భాగంగా ఈ వేసవిలో కూడా విద్యుత్ సమస్యలు లేకుండా చర్యలు తీసుకుంటున్నది. భద్రాద్రి జిల్లాలో 5 లక్షల గృహాలు ఉండగా వినియోగదారులు నెలకు 5 లక్షల మెగావాట్ల విద్యుత్ వాడుతున్నారు. ఈ వేసవిలో వినియోగం మరింత పెరిగే అవకాశం ఉన్నందున డిమాండ్కు తగినట్లు అధికారులు చర్యలు తీసుకుంటున్నారు. విద్యుత్ లైన్లను పరిశీలిస్తున్నారు. వెంటనే మరమ్మతులు నిర్వహిస్తున్నారు. వాలిన విద్యుత్ స్తంభాలను గుర్తిస్తున్నారు. వాటి స్థానంలో కొత్తవి ఏర్పాటు చేస్తున్నారు. సబ్ స్టేషన్లు, ట్రాన్స్ఫార్మర్లు పూర్తిస్థాయిలో పనిచేసేలా చూస్తున్నారు.
విద్యుత్ సమస్యలకు చెక్..
గత ఏడేళ్ల నుంచి ప్రజలకు నాణ్యమైన విద్యుత్ సరఫరా అవుతున్నది. ఈ క్రమంలోనే ఇటీవల ప్రభుత్వం పల్లెప్రగతి కార్యక్రమం చేపట్టింది. దీంతో ప్రజలు తాము ఎదుర్కొంటున్న విద్యుత్ సమస్యలను అధికారుల దృష్టికి తీసుకువచ్చారు. అధికారులు వెంటనే స్పందించి విద్యుత్ సమస్యలను పరిష్కరించారు. కొత్త లైన్లు ఏర్పాటు చేశారు. ధ్వంసమైన విద్యుత్ స్తంభాల స్థానంలో కొత్తవి బిగించారు. ఈ వేసవిలో విద్యుత్ సరఫరాకు అంతరాయం లేకుండా ఉండేందుకు చర్యలు తీసుకుంటున్నారు. ఇప్పటికే కొత్తగూడెం, పాల్వంచ పట్టణాల్లో నాణ్యమైన విద్యుత్ సరఫరా చేసేందుకు సబ్ స్టేషన్ల నిర్మాణం చేపట్టారు.
జిల్లాలో విద్యుత్ లైన్లు ఇవీ..
కేటగిరీ -1లో గృహావసరాలకు 3,17,753 కనెక్షన్లు, కేటగిరీ-2లో నాన్ డొమెస్టిక్ 31,857, కేటగిరీ-3లో పరిశ్రమలకు 1,537 , కేటగిరీ-4లో చిన్న పరిశ్రమలు 382, కేటగిరీ-5లో వ్యవసాయ అవసరాలకు 42,115, కేటగిరీ 6(ఏ)లో వీధి దీపాలు 3,506 , కేటగిరీ-6(బీ) 1,764 , కేటగిరీ-7లో జనరల్ పర్చేజ్ కింద 2,552 , కేటగిరీ-8లో టెంపరరీ సర్వీసెస్ 52.. ఇలా విద్యుత్శాఖ అధికారులు మొత్తం 4,01,518 కనెక్షన్లు ఇచ్చారు. వీటి పరిధిలో 174 హెటీ లైన్లు ఉన్నాయి.
ఆటంకాలు ఉండవు..
వేసవిలో విద్యుత్ సరఫరాకు ఎలాంటి అంతరాయం ఉండకుండా చర్యలు తీసుకుంటున్నాం. లోవోల్టేజీ సమస్యలను ఎప్పటికప్పుడు పరిష్కరిస్తున్నాం. వేసవిలో తలెత్తే సమస్యలను పరిష్కరించడానికి విద్యుత్శాఖ సిద్ధంగా ఉంది. ఇప్పటికే విద్యుత్లైన్లను పరిశీలించాం. మరమ్మతులు అవసరమైన చోట యుద్ధప్రాతిపదికన చేయిస్తున్నాం. వినియోగదారులకు నాణ్యమైన విద్యుత్ అందిస్తాం.