ఆదివారం 20 సెప్టెంబర్ 2020
Telangana - Sep 12, 2020 , 08:10:51

శ్రీశైలానికి భారీగా ఇన్‌ఫ్లో.. 8 గేట్లను ఎత్తి దిగువకు నీటి విడుదల

శ్రీశైలానికి భారీగా ఇన్‌ఫ్లో.. 8 గేట్లను ఎత్తి దిగువకు నీటి విడుదల

నాగర్‌ కర్నూల్‌ : ఆగష్టులో కురిసిన భారీ వర్షాలకు కృష్ణానదిపై ఉన్న అన్ని ప్రాజెక్టులు ఇప్పటికే నిండుకుండలను తలపిస్తున్నాయి. కర్ణాటకలో రెండురోజులుగా కురిసిన భారీ వర్షాలకు ఇందిరా ప్రియదర్శిని (జూరాల) ప్రాజెక్టుకు లక్షా 22 వేల క్యూసెక్కులపైగా ఇన్‌ఫ్లో వస్తుండగా దిగువకు లక్షా 20 వేల క్యూసెక్కులను విడుదల చేస్తున్నారు. ఇటు తుంగభద్ర నుంచి ప్రవాహం పెరగడంతో శ్రీశైలం జలాశయానికి 2 లక్షల 89వేల క్యూసెక్కుల ఇన్‌ఫ్లో వచ్చి చేరుతోంది. ఇప్పటికే ప్రాజెక్టు నిండుకుండలా మారడంతో అధికారులు 8 గేట్లను 10 అడుగుల మేర ఎత్తి స్పిల్‌ వే ద్వారా దిగువ నాగార్జున సాగర్‌కు 2 లక్షల 22 వేల క్యూసెక్కులు విడుదల చేస్తున్నారు.

శ్రీశైలం జలాశయం పూర్తిస్థాయి నీటిమట్టం 885 అడుగులు కాగా ప్రస్తుతం 884.50 అడుగులు (212.91 టీఎంసీలు)గా ఉంది. కుడిగట్టు జలవిద్యుత్‌ కేంద్రం ద్వారా విద్యుత్‌ ఉత్పత్తి కొనసాగుతుంది. విద్యుత్‌ ఉత్పత్పి కేంద్రం ద్వారా 31 వేల క్యూసెక్కులు వస్తోంది. శ్రీశైలం నుంచి సాగర్‌ జలాశయానికి లక్షా 73 వేల క్యూసెక్కులు వస్తుండటం.. ఇప్పటికే ప్రాజెక్టు పూర్తిస్థాయిలో నిండటంతో 14 గేట్లను 10 అడుగుల మేర ఎత్తి స్పిల్‌ వే ద్వారా లక్షా 56 వేల క్యూసెక్కులు విడుదల చేస్తున్నారు. నాగార్జునసాగర్‌ జలాశయం పూర్తిస్థాయి నీటిమట్టం 590 అడుగులు (312.4 టీఎంసీలు) కాగా ప్రస్తుతం 589.50 అడుగులు (311.55) టీఎంసీల నీరుంది. జల విద్యుత్‌ కేంద్రం, ఎస్‌ఎల్‌బీసీ, కుడి కాల్వ ద్వారా 34 వేల క్యూసెక్కులు విడుదల చేస్తున్నారు.

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలంగాణ ఆండ్రాయిడ్ యాప్ డౌన్‌లోడ్ చేసుకోండి.


logo