ఆదివారం 12 జూలై 2020
Telangana - Jun 20, 2020 , 02:27:17

గ్రామాలకూ ఈ-కామర్స్‌ పార్సిల్స్‌

గ్రామాలకూ ఈ-కామర్స్‌ పార్సిల్స్‌

  • అదనపు ఆదాయం కోసమే కార్గో సేవలు
  • తొలిదశలో 104 కార్గో బస్సులు 
  • 140 బస్‌స్టేషన్లలో పార్సిల్‌ సర్వీసులు 
  • రవాణాశాఖ మంత్రి పువ్వాడ అజయ్‌ 
  • టీఎస్‌ ఆర్టీసీ పార్సిల్స్‌, కొరియర్‌,  కార్గో సేవలు ప్రారంభం

హైదరాబాద్‌, నమస్తే తెలంగాణ: రాష్ట్రంలో ప్రతి మారుమూల ప్రాంతాలకు బస్సు సౌకర్యం ఉన్నందున ఈ-కామర్స్‌ సంస్థలకు మరింత నమ్మకంగా సేవలు అందించేందుకు ప్రణాళికలు సిద్ధం చేస్తున్నట్టు రవాణాశాఖ మంత్రి పువ్వాడ అజయ్‌కుమార్‌ చెప్పారు.ఆర్టీసీకి అదనపు ఆదాయాన్ని సమకూర్చేందుకే పీసీసీ (పార్సిల్‌, కొరియర్‌, కార్గో) సేవలను విస్తృతం చేస్తున్నట్టు వివరించారు. వినియోగదారులు చిన్నపాటి కవర్లతోపాటు పార్సిల్స్‌, కొరియర్‌ సేవలను సులభంగా బుక్‌ చేసుకునేందుకు వీలుగా మొబైల్‌ అప్లికేషన్‌ను సైతం అందుబాటులోకి తెస్తామని చెప్పారు. శుక్రవారం ఖైరతాబాద్వ్రాణాశాఖ కార్యాలయంలో ఆర్టీసీ పార్సిల్స్‌, కొరియర్‌, కార్గో సేవలను ఆర్టీసీ ఎండీ సునీల్‌శర్మ, పీసీసీ ప్రత్యేక అధికారి ఎస్‌ కృష్ణకాంత్‌తో కలిసి ప్రారంభించారు.

చార్జీల వివరాలతో కూడిన కరపత్రాన్ని ఆవిష్కరించారు. ఈ సందర్భంగా మంత్రి మాట్లాడుతూ.. ప్రయాణికులకు మెరుగైన సేవలు అందిస్తూనే ఆర్టీసీ ఆర్థికంగా బలపడేందుకు ప్రణాళికలు రూపొందించి అమలుచేస్తున్నట్టు చెప్పారు. లాక్‌డౌన్‌ తర్వాత ప్రయాణికుల సంఖ్య తక్కువగా ఉండటంతో ఆదాయం గణనీయంగా తగ్గిందని పేర్కొన్నారు. ప్రస్తుత పరిస్థితుల్లో పార్సిల్‌, కొరియర్‌, కార్గో సేవలు ఉపకరిస్తాయని తెలిపారు. అన్ని బస్‌స్టేషన్లలో సంస్థ ఉద్యోగులతో ఈ పీసీసీ సెంటర్లు నిర్వహిస్తున్నామని, తొలిదశలో 104 కార్గో బస్సు సేవలు అందుబాటులోకి వచ్చాయని, 140 బస్‌స్టేషన్లలో పార్సిల్‌ సేవలు అందిస్తున్నట్టు వెల్లడించారు. ప్రభుత్వ సంస్థలతోపాటు ప్రైవేటు కంపెనీలకు సేవలను విస్తరిస్తామని చెప్పారు. కార్యక్రమంలో రవాణాశాఖ కమిషనర్‌ ఎంఆర్‌ఎం రావు, అధికారులు పాల్గొన్నారు. 

సేవలు ఇలా.. 

  • సరుకుల రవాణాకోసం ఏసీ బస్సుల్లోని డిక్కీలను నెలవారీ ప్రాతిపదికన కూడా కేటాయిస్తారు. రాత్రి వేళ కిలోమీటరుకు కనీస చార్జీ రూ.3, పగటి పూట కనిష్ఠంగా రూ. 2 చొప్పున వసూలు చేస్తారు. నెలవారీగా డిక్కీలను పొందేందుకు నెల రోజులకు సంబంధించిన డబ్బును పూచీకత్తుగా జమచేయాలి. రోజూవారీ బుకింగ్‌ కోసం కిలోమీటర్‌కు రూ.5 చొప్పున నిర్ణయించారు.
  • కార్గో బస్సుల్లో కిలోమీటరు, బరువు ఆధారంగా చార్జిలను నిర్ణయించారు. కనిష్ఠంగా 75 కిలోల బరువున్న వస్తువులు పది కిలోమీటర్ల మేర రవాణాకు రూ.50 నుంచి.. గరిష్ఠంగా క్వింటాలు బరువున్న వాటిని వెయ్యి కిలోమీటర్ల మేర రవాణాకు రూ.445గా టారిఫ్‌ రూపొందించారు. వీటికి అదనంగా ఇన్సూరెన్స్‌, హమాలీ, సిబ్బంది, తదితర చార్జీలను జోడిస్తారు.
  • 50 కిలోల ఒక పార్సిల్‌ను 180 కిలోమీటర్ల మేర రవాణాకు రూ.165, ఆరు పార్సిల్స్‌గా ఉంటే రూ.882-రూ.908 వరకు వసూలు చేస్తారు. ఆహార పదార్ధాలైతే అదనంగా రూ.60 చార్జి చేస్తారు.
  • పూర్తిగా ఆహార పదార్థాల రవాణాకు బరువు ఆధారంగా చార్జీతోపాటు హమాలీ, సిబ్బంది చార్జీలను కూడా వసూలు చేస్తారు. 
  • రాష్ట్ర పరిధిలో కొరియర్‌ సేవలకు.. 250 గ్రాముల వరకు రూ.68, 500 గ్రాములకు రూ.93, కిలో వరకు రూ.118, అంతర్రాష్ట్ర రవాణాకు రూ.75, రూ.100, రూ.125 వసూలు చేస్తారు. 
  • బల్క్‌ కొరియర్స్‌ సరఫరా కోసం ప్రతి టన్నుకు వంద కిలోమీటర్ల వరకు రూ.824 వసూలుచేస్తారు. 



logo