బుధవారం 03 జూన్ 2020
Telangana - May 23, 2020 , 02:12:27

జాతులవారీగా మారుతున్న వైరస్‌ లక్షణాలు

జాతులవారీగా మారుతున్న వైరస్‌ లక్షణాలు

  • దేశాలవారీగా ఎందుకు భిన్న ప్రభావం!
  • మన దగ్గర మరణాలు ఎందుకు తక్కువ?
  • వాతావరణాన్ని బట్టి వైరస్‌ మారుతున్నదా?
  • కరోనా తీరుతెన్నులను శోధిస్తున్న సీసీఎంబీ
  • గాంధీ దవాఖానతో అవగాహన ఒప్పందం

హైదరాబాద్‌ సిటీబ్యూరో ప్రధాన ప్రతినిధి, నమస్తే తెలంగాణ: ప్రపంచవ్యాప్తంగా మానవాళి మనుగడకే సవాలు విసురుతున్న కరోనా వైరస్‌ దేశాల వారీగా, జాతుల వారీగా భిన్న ప్రభావాన్ని ఎందుకు చూపుతున్నది? భారత్‌లో మరణాల రేటు తక్కువగా ఉండటానికి కారణాలేమిటి? వాతావరణ పరిస్థితులను బట్టి వైరస్‌ స్వభావం మారుతున్నదా? అన్న అంశాలపై పరిశోధనను హైదరాబాద్‌లోని సెంటర్‌ ఫర్‌ సెల్యులర్‌ అండ్‌ మాలిక్యూలర్‌ బయాలజీ (సీసీఎంబీ) ముమ్మరం చేసింది. వివిధ దేశాలలో విస్తరిస్తున్న వైరస్‌, మనదేశంలోని వైరస్‌ జన్యుక్రమంలో పెద్ద తేడా లేకున్నా.. దాని తీవ్రతలో తేడాను గమనిస్తున్నామని సీసీఎంబీ డైరెక్టర్‌ రాకేశ్‌ మిశ్రా చెప్పారు. ఇప్పటికే ఇండియన్‌ ఇన్‌స్టిట్యూట్‌ ఆఫ్‌ వైరాలజీతోపాటు దేశ వ్యాప్తంగా 300కు పైగా రకరకాల నమూనాలను పరిశీలించి వాటి కణాలను వేరుచేశామని చెప్పారు. ఇప్పటివరకు జన్యువులను ఐసొలేట్‌(వేరు) చేశామన్నారు. దేశంలో ప్రబలుతున్న వైరస్‌ జన్యుక్రమంలో పెద్దగా తేడా ఉన్నట్టు ఇప్పటివరకు కనిపించకపోయినా మరణాల రేటు మాత్రం చాలా తక్కువగా ఉన్నది నిజమేనన్నారు. గాంధీ దవాఖానలో కోలుకుంటున్నవారి సంఖ్య ఎంతో మెరుగ్గా ఉందని చెప్పారు. త్వరలోనే వైరస్‌ జన్యు నిర్మాణంలో తేడాలపై స్పష్టమైన అవగాహనకు వస్తామని చెప్పారు. తద్వారా వ్యాక్సిన్‌ తయారీకి, మెరుగైన చికిత్సను అందించడానికి మరింత ఉపయోగం ఉంటుందని చెప్పారు. 

ఎండ తీవ్రతతో తగ్గుతున్న ప్రభావం

మనదేశంలో ప్రబలుతున్న కరోనా వైరస్‌ తీవ్రత తక్కువగా ఉన్నదని గాంధీ దవాఖాన సూపరింటెండెంట్‌ డాక్టర్‌ రాజారావు చెప్పారు. ఎండ తీవ్రత ఎక్కువగా ఉన్నప్పుడు వైరస్‌ విజృంభణ తక్కువగా ఉన్నట్టు ప్రాథమిక పరిశోధనలో తేలిందని ఆయన ‘నమస్తే తెలంగాణ’కు చెప్పారు. వైరస్‌ ప్రభావం వివిధ జాతులపై భిన్నంగా ఉందని చెప్పారు. భారతీయులు తరచుగా వైరస్‌లకు గురికావడం, బాల్యం నుంచే బీసీజీ వ్యాక్సిన్‌ వంటివి తీసుకోవడం కూడా మరణాలరేటు తక్కువగా ఉండటానికి కారణమని అన్నారు. మన ఆహారపు అలవాట్లు, భిన్నమైన జన్యు నిర్మాణం, గతంలో ఇటువంటి వ్యాధులను ఎదుర్కొన్నందున భారతీయుల్లో రోగ నిరోధక శక్తి అధికంగా ఉండవచ్చని అభిప్రాయపడ్డారు. కరోనా వైరస్‌ జాతులవారీగా కూడా ప్రభావం చూపుతున్నదని చెప్పారు. 

గాంధీతో ఒప్పందం

కరోనా వైరస్‌ జీనోమ్‌ సీక్వెన్స్‌పై పరీక్షలు చేస్తున్న సీసీఎంబీ ఇందుకు హైదరాబాద్‌లో కరోనా వ్యాధి చికిత్సకు నోడల్‌ దవాఖానగా ఉన్న ‘గాంధీ’ సహకారం తీసుకుంటున్నది. ఇప్పటివరకూ కరోనా నుంచి కోలుకున్నవారు, వ్యాధి బారిన పడినా లక్షణాలు కనిపించనివారు, ఎక్కువ ప్రభావానికి గురైన వారి రక్త నమూనాలను ఇవ్వాలని గాంధీ వైద్యులను కోరింది. కరోనా అసలు స్వరూపాన్ని కనుగొనడానికి తమ పరిశోధనలకు సహకరించాలని అభ్యర్థించింది. ఇందుకు గాంధీ దవాఖాన అధికారులు తమ సమ్మతి తెలిపారు. ఈ మేరకు సీసీఎంబీ, గాంధీ దవాఖాన మధ్య ఒక అవగాహన ఒప్పందం కుదిరింది. 


logo