బలమైన సంకల్పం ఉంటే ఒంట్లో ఓపిక అదే వస్తుందని నిరూపిస్తున్నది అసోంకు చెందిన తొంభై ఏండ్ల లతికా చక్రవర్తి. ఈ వయసులో కూడా ఆమె అందమైన పోత్లీ బ్యాగులు తయారు
చేస్తున్నది. బామ్మ భర్త కృష్ణలాల్ చక్రవర్తి సర్వే ఆఫ్ ఇండియాలో పనిచేసేవారు. ఉద్యోగరీత్యా వివిధ రాష్ర్టాల్లో నివసించిన లతిక, ఆయా ప్రాంతాల్లోని ప్రత్యేక వస్ర్తాలను సేకరించేది. అంతేకాదు, తన బిడ్డకు తానే దుస్తులు కుట్టేది. కొడుకు పెద్దయ్యాక మరింత తీరిక దొరికింది. బొమ్మల తయారీ మీద దృష్టి పెట్టింది బామ్మ. ఇన్నేండ్లయినా కుట్టుమిషన్ వదలకుండా.. టిక్కుటిక్కుమంటూ ఏదో ఒకటి కుడుతూనే ఉంటుంది. అయితే, నాలుగేండ్ల క్రితం కోడలు సుమిత సాయంతో ఇంట్లోని పాత చీరలు, కుర్తీలు కత్తిరించి చిన్నచిన్న పోత్లీ బ్యాగులు కుట్టడం మొదలు పెట్టింది. వందలకొద్దీ బ్యాగుల్ని తయారుచేసి స్నేహితులు, బంధువులకు ఇచ్చింది. జర్మనీలో ఉండే బామ్మ మనవడు జాయ్ చక్రవర్తి వాటిని చూసి ఆశ్చర్యపోయాడు. తన నానమ్మ పనితనాన్ని ప్రపంచానికి చూపించాలనుకున్నాడు. వెంటనే ‘లతికాస్ బ్యాగ్స్.కామ్’ పేరుతో ఓ సైట్ ఓపెన్ చేసి ఆన్లైన్లో అమ్మకానికి పెట్టాడు. ఇంకేముంది? ప్రపంచవ్యాప్తంగా బామ్మ బ్యాగులను కొనేసుకుంటున్నారు. ధర కూడా తక్కువే. ఐదు వందల నుంచి పదిహేను వందల వరకూ పలుకుతున్నాయి.