శుక్రవారం 10 జూలై 2020
Telangana - Jun 03, 2020 , 00:48:20

తెలంగాణలో సమస్యలన్నీ పరిష్కారం

తెలంగాణలో సమస్యలన్నీ పరిష్కారం

  • రాష్ర్టావతరణ వేడుకల్లో ముఖ్యమంత్రి కేసీఆర్‌
  • గన్‌పార్కు వద్ద అమరవీరులకు నివాళులర్పించిన సీఎం

హైదరాబాద్‌, నమస్తే తెలంగాణ: తెలంగాణ రాష్ట్రం ఏర్పడితే ఏ సమస్యలు తీరుతాయని ఆశించామో, అవి పరిష్కారం అవుతున్నాయని  ముఖ్యమంత్రి కే చంద్రశేఖర్‌రావు చెప్పారు. రాష్ర్టావతరణ దినోత్సవం సందర్భంగా ఆయన తెలంగాణ ప్రజలకు శుభాకాంక్షలు తెలిపారు. గన్‌పార్కులోని తెలంగాణ అమరవీరుల స్థూపం వద్ద నివాళులు అర్పించారు. అనంతరం ప్రగతిభవన్‌లో జాతీయ పతాకావిష్కరణ చేశారు. ఈ సందర్భంగా సీఎం మాట్లాడుతూ రాష్ట్రం ఏర్పడే నాటికి రైతులు, వ్యవసాయ పరిస్థితి దారుణంగా ఉండేదని, నేడు తెలంగాణ వ్యవసాయం దేశంలోనే అగ్రగామిగా ఉందని పేర్కొన్నారు. ఎండాకాలం వస్తే ప్రజలు మంచినీళ్ల కోసం గోస పడేవారని, నేడు మిషన్‌ భగీరథతో ఆ సమస్య పరిష్కారం అయ్యిందని చెప్పారు. విద్యుత్‌, సాగునీరు, విద్య, వైద్యం, పారిశ్రామిక, ఐటీ తదితర రంగాల్లో ఎంతో ప్రగతి సాధించామని సంతృప్తి వ్యక్తంచేశారు. తెలంగాణ రాష్ట్ర ప్రయాణం అనుకున్న రీతిలో ఎంతో ఆశావహంగా ప్రారంభమైందన్నారు. రాష్ట్ర సర్వతోముఖాభివృద్ధికి, ప్రజల సంక్షేమానికి పాటుపడడం కోసం ప్రభుత్వం పునరంకితం అవుతున్నదని సీఎం ప్రకటించారు. ఈ  వేడుకల్లో రాజ్యసభ సభ్యులు కే కేశవరావు, జోగినపల్లి సంతోష్‌కుమార్‌, కేఆర్‌ సురేశ్‌రెడ్డి, ప్రణాళికా సంఘ ఉపాధ్యక్షుడు వినోద్‌కుమార్‌, హైదరాబాద్‌ మేయర్‌ బొంతు రామ్మోహన్‌, డిప్యూటీ మేయర్‌ బాబా ఫసియుద్దీన్‌, ఎమ్మెల్యేలు జీవన్‌రెడ్డి, నాగేందర్‌, ఆత్రం సక్కు, రైతుబంధు సమితి అధ్యక్షుడు పల్లా రాజేశ్వర్‌రెడ్డి, ఎమ్మెల్సీలు కర్నె ప్రభాకర్‌, శ్రీనివాసరెడ్డి, కార్పొరేషన్ల చైర్మన్లు గ్యాదరి బాలమల్లు, మారెడ్డి శ్రీనివాసరెడ్డి, ప్రభుత్వ సలహాదారులు రాజీవ్‌శర్మ, అనురాగ్‌శర్మ, ప్రభుత్వ ప్రధాన కార్యదర్శి సోమేశ్‌కుమార్‌, డీజీపీ మహేందర్‌రెడ్డి, ఏసీబీ డీజీ పూర్ణచందర్‌రావు, సీఎంవో అధికారులు పాల్గొన్నారు. 


logo