మంగళవారం 26 మే 2020
Telangana - May 18, 2020 , 01:20:59

చెర్లన్నీ నింపాలి

చెర్లన్నీ నింపాలి

  • ఏడాది పొడవునా నీళ్లుండాలి.. వేగంగా కాల్వలకు తూములు.. డిస్ట్రిబ్యూటరీ కాల్వలు పూర్తిచేయాలి
  • అన్ని సాగునీటి ప్రాజెక్టుల వద్ద రివర్‌గేజ్‌లు
  • రియల్‌ టైమింగ్‌ డాటా ఆపరేటింగ్‌ సిస్టమ్‌
  • ఒకే గొడుగు కిందకు రాష్ట్ర సాగునీటి వ్యవస్థ
  • మే చివరికి కాళేశ్వరం పంపులను పూర్తిచేయాలి
  • కొండపోచమ్మసాగర్‌కు నీటిని పంప్‌చేయాలి
  • దేవాదులనుంచి ఏడాదంతా నీటి లిఫ్టింగ్‌
  • ఉన్నతస్థాయి సమీక్షలో సీఎం కేసీఆర్‌ ఆదేశాలు

కాళేశ్వరం ఎత్తిపోతల పథకంలో భాగంగా మొన్నటిదాకా నిరవధికంగా నీటిని నిల్వచేసిన మేడిగడ్డలోని లక్ష్మీబరాజ్‌ ఇది. మొన్నటి వర్షాకాలం నుంచి ప్రస్తుత ఎండాకాలం దాకా వందల టీఎంసీల ఎత్తిపోతకు కేంద్ర బిందువుగా నిలిచిన ఈ బరాజ్‌.. ప్రస్తుతం సాంకేతిక నిర్వహణ పరీక్షలు, దిగువన దేవాదుల ఎత్తిపోతల పథకం ఇన్‌టేక్‌ వెల్‌ వద్ద నీటిమట్టం పెంచడం ద్వారా వరంగల్‌కు తాగునీరు, పారిశ్రామిక అవసరాల కోసం నీటిని ఎత్తిపోయడం కోసం పూర్తిగా ఖాళీ చేయడంతో ఇలా కనిపిస్తున్నది. ప్రాజెక్టులోని మొత్తం 85 గేట్లను ఎత్తివేసి.. నీటిని దిగువకు వదిలారు. పరీక్షలన్నీ పూర్తయిన తర్వాత మళ్లీ యథావిధిగా నీటిని నిల్వచేసి.. గోదారమ్మను ఎగువకు తరలించేందుకు అధికారులు సమాయత్తమవుతున్నారు.


హైదరాబాద్‌,నమస్తే తెలంగాణ: వానకాలంలో సాగునీటి ప్రాజెక్టుల నుంచి నీటి పంపింగ్‌ ప్రారంభించిన వెంటనే ఆయా ప్రాజెక్టుల పరిధిలోని చెరువులన్నింటినీ నింపాలని ముఖ్యమంత్రి కే చంద్రశేఖర్‌రావు అధికారులను ఆదేశించారు. అన్ని ప్రాజెక్టుల వద్ద రివర్‌గేజ్‌లను పెట్టాలని సూచించారు. నీటి నిర్వహణకోసం ఆధునిక సాంకేతిక పరిజ్ఞానాన్ని వినియోగించి రియల్‌ టైమ్‌ డాటా ఆపరేటింగ్‌ సిస్టమ్‌ను ఏర్పాటుచేయాలన్నారు. వేల కోట్ల వ్యయంతో నిర్మిస్తున్న ప్రాజెక్టుల ద్వారా వచ్చే ప్రతి నీటిబొట్టును సద్వినియోగం చేసుకోవాలని స్పష్టంచేశారు. రాష్ట్రంలోని సాగునీటిరంగ వ్యవస్థను ఒకే గొడుగు కిందకు తీసుకొనిరావాలన్నారు.  

గోదావరినది పరీవాహక ప్రాంతంలో ఈ వానకాలం అవలంబించాల్సిన వ్యూహంపై చర్చించడానికి సీఎం కేసీఆర్‌ ఆదివారం ప్రగతిభవన్‌లో ఉన్నతస్థాయి సమీక్ష నిర్వహించారు. గోదావరి బేసిన్‌లోని ప్రతి ప్రాజెక్టుకు సంబంధించి ప్రస్తుత పరిస్థితిని, ఈ వానకాలంనాటికి ఎంత ఆయకట్టుకు నీరందించగలుగుతామనే విషయాలను సీఎం ఆరాతీశారు. ప్రాజెక్టుల భౌగోళిక స్థితిని బట్టి నీటిపారుదలశాఖను పునర్వ్యవస్థీకరించుకోవాలని సూచించారు. ప్రతి ప్రాజెక్టుకు నిర్వహణ (ఓ అండ్‌ ఎం) మాన్యువల్‌ రూపొందించాలని ఆదేశించారు. కాళేశ్వరం ప్రాజెక్టు పరిధిలోని అన్ని పంపుల నిర్మాణాన్ని మే నెలాఖరు నాటికి పూర్తిచేసి, కొండపోచమ్మసాగర్‌ వరకు నీటిని పంప్‌చేయాలన్నారు. నీటిపారుదలశాఖకు చెందిన భూములు, కట్టల ఆక్రమణను తీవ్రంగా పరిగణించాలన్నారు.  ఈ సందర్భంగా సీఎం కేసీఆర్‌ అధికారులకు పలు ఆదేశాలు, సూచనలు చేశారు. 

చెరువుల్లో ఏడాదంతా నీళ్లుండాలి

వానకాలంలో ప్రాజెక్టుల నుంచి నీటి విడుదల ప్రారంభం కాగానే మొదట అన్ని చెరువులు, కుంటలను నింపాలని సీఎం కేసీఆర్‌ ఆదేశించారు. ‘చెరువులను నింపడానికి అవసరమైన ఓటీలను, డిస్ట్రిబ్యూటరీ కెనాళ్లను వెంటనే నిర్మించాలి. చెరువులు, కుంటల్లో నీళ్లు ఏడాదంతా నిండి ఉండేలా వ్యూహం అవలంబించాలి. చెరువులకు నీళ్లివ్వడానికి అడ్డంకులుంటే వాటిపై చర్చించడానికి ఆయా జిల్లాల మంత్రులు, అధికారులు రెండుమూడు రోజుల్లోనే సమావేశం కావాలి. చెరువులు నింపడంవల్ల భూగర్భజలాల మట్టం పెరుగుతుంది. ఫలితంగా బోర్ల ద్వారా కూడా వ్యవసాయం సాగుతుంది. చెరువుల నుంచి రైతులు స్వచ్ఛందంగా మట్టిని తీసుకుపోవడానికి అవకాశమివ్వాలి. రైతులపై ఎలాంటి ఆంక్షలు పెట్టవద్దు’ అని సీఎం కేసీఆర్‌ అధికారులకు సూచించారు. 

ఎస్సారెస్పీ ఆయకట్టుకు సాగునీరు

ఈ వానకాలంలో ఎస్సారెస్పీ ఆయకట్టు పరిధిలో 16,41,284 ఎకరాలకు సాగునీరు అందించాలని సీఎం కేసీఆర్‌ అన్నారు. ‘గోదావరిలో పైనుంచి వచ్చే వరదను ఎప్పటికప్పుడు అంచనా వేసుకొంటూ ఎస్సార్‌ఎస్పీని కాళేశ్వరం ద్వారా నింపాలి. ఎల్‌ఎండీ నుంచి దిగువకు నీరందించడానికి ప్రస్తుతమున్న కాలువ కేవలం ఆరు వేల క్యూసెక్కుల నీటి ప్రవాహ సామర్థ్యంతో ఉన్నది. దీని సామర్థ్యాన్ని 9 వేల క్యూసెక్కులకు పెంచాలి. ప్రస్తుతమున్న కాల్వ సామర్థ్యం పెంచడమా? సమాంతరంగా మరో కాల్వ నిర్మించాలా? అనే విషయాన్ని ఈఎన్సీల కమిటీ తేల్చాలి. కాళేశ్వరంలో మూడో టీఎంసీ ఎత్తిపోసే పనులను వెంటనే పూర్తిచేయాలి. వచ్చే వానకాలం నుంచి మూడో టీఎంసీని వాడుకోవాలి. తోటపల్లి కాల్వ ద్వారా 77 వేల ఎకరాలకు నీరందించాలి. గౌరవల్లి లిఫ్టు పనులు వెంటనే పూర్తిచేసి, ఈ సీజన్‌లోనే నీళ్ళు అందించాలి’ అని సీఎం స్పష్టంచేశారు. 

ఒకే గొడుగు కిందకు సాగునీటి వ్యవస్థ 

నీటిపారుదల వ్యవస్థను ఒకే గొడుగు కిందకు తీసుకొనిరావాలని సీఎం కేసీఆర్‌ ఆదేశించారు. ‘భారీ, మధ్య తరహా, చిన్న తరహా నీటి పారుదల, ఇరిగేషన్‌ డెవలప్‌మెంట్‌ కార్పొరేషన్‌ పరిధిలోని విభాగాలు, ప్రాజెక్టులన్నీ ఒకే గొడుగు కిందికి రావాలి. అన్నీ నీటిపారుదలశాఖ పరిధిలోనే ఉండాలి. ప్రాజెక్టులు, వాటి భౌగోళికస్థితి ఆధారంగా నీటిపారుదలశాఖను పునర్వ్యవస్థీకరించాలి. సీఈ/ఈఎన్సీ పరిధులు నిర్ణయించి, నీటిపారుదల జోన్లు ఏర్పాటుచేయాలి. అత్యవసరమైన సాగునీటి పనులకు కావాల్సిన అనుమతులు ఇవ్వడానికి సీఈ నుంచి ఈఈ వరకు అధికారాలను ప్రభుత్వం బదిలీచేస్తుంది. సీఈ 50 లక్షల వరకు ఎస్‌ఈ 25 లక్షల వరకు, ఈఈ 5 లక్షల వరకు పనులకు అనుమతులు ఇవ్వవచ్చు’ అని సీఎం కేసీఆర్‌ తెలిపారు. 

 ప్రాజెక్టుల నిర్వహణకు బడ్జెట్‌లో నిధులు

ప్రతి ప్రాజెక్టు నిర్వహణకు ప్రతి ఏటా బడ్జెట్‌లో నిధులు కేటాయిస్తామని సీఎం కేసీఆర్‌ చెప్పారు. ‘ఎంతో వ్యయంచేసి ప్రాజెక్టులు నిర్మించాం. వాటిని సరిగ్గా నిర్వహించడం కూడా ముఖ్యం. ప్రతి ప్రాజెక్టు నిర్వహణకోసం ఓ అండ్‌ ఎం మాన్యువల్‌ రూపొందించాలి. ప్రతి ఏటా బడ్జెట్లోనే నిర్వహణ వ్యయానికి నిధులు కేటాయించి ప్రభుత్వం విడుదల చేస్తుంది. ఇంకా ఎక్కడైనా భూసేకరణ మిగిలి ఉంటే పూర్తిచేయాలి. దీనికి కావాల్సిన నిధులు విడుదలచేస్తాం’ అని సీఎం కేసీఆర్‌ తెలిపారు. ఈ సమావేశంలో మంత్రులు కే తారకరామారావు, ఈటల రాజేందర్‌, ఎర్రబెల్లి దయాకర్‌రావు, జగదీశ్‌రెడ్డి, ప్రశాంత్‌రెడ్డి, ఇంద్రకరణ్‌రెడ్డి, గంగుల కమలాకర్‌, నిరంజన్‌రెడ్డి, సత్యవతి రాథోడ్‌, రైతుబంధు సమితి రాష్ట్ర అధ్యక్షుడు పల్లా రాజేశ్వర్‌రెడ్డి, ఇరిగేషన్‌ ముఖ్య కార్యదర్శి రజత్‌కుమార్‌, సీఎంవో కార్యదర్శి స్మితా సబర్వాల్‌, ఓఎస్డీ శ్రీధర్‌రావు దేశ్‌పాండే, ఈఎన్సీలు మురళీధర్‌రావు, నాగేందర్‌రావు, అనిల్‌కుమార్‌, వెంకటేశ్వర్లు, హరిరాం, చీఫ్‌ ఇంజినీర్లు శంకర్‌, బంగారయ్య, మధుసూదన్‌రావు, ప్రాజెక్ట్‌ అడ్మినిస్ట్రేటర్‌ సుధాకర్‌రెడ్డి పాల్గొన్నారు.

దేవాదుల నుంచి ఏడాదంతా లిఫ్టింగ్‌

దేవాదుల ప్రాజెక్టు నుంచి ఏడాది పొడవునా నీటిని లిఫ్ట్‌ చేయాలని సీఎం కేసీఆర్‌ అధికారులను ఆదేశించారు. ‘మల్లన్నసాగర్‌ ద్వారా తపాస్‌పల్లి రిజర్వాయర్‌ నింపి, అక్కడినుంచి మోత్కూరు, అడ్డగూడూరు, చేర్యాల, మద్దూరు, కొమురవెల్లి, చిల్పూర్‌ మండలాలకు నీరందించాలి. జగిత్యాల జిల్లాలో ఎల్లంపల్లి ప్రాజెక్టు పరిధిలోని ముక్కట్‌రావుపేట గ్రామంలో ఆర్‌ అండ్‌ ఆర్‌ ప్యాకేజీ అమలుచేయాలి. దేవాదుల ద్వారా వరంగల్‌ జిల్లాలోని అన్ని చెరువులు నింపాలి. సమ్మక్క బరాజ్‌ పనులను వేగవంతంచేయాలి. దేవాదుల ప్రాజెక్టు ద్వారా 365 రోజులూ నీటిని లిఫ్టు చేయాలి. వరద కాల్వకు వెంటనే నీరు విడుదలచేయాలి. ఓటీల నిర్మాణాన్ని యుద్ధప్రాతిపదికన పూర్తిచేయాలి’ అని సీఎం సూచించారు. 


15 రోజుల్లో కొత్త గేజ్‌ మీటర్ల ఏర్పాటు

పదిహేను రోజుల్లోగా అన్ని సాగునీటి ప్రాజెక్టులపై కొత్తగా గేజ్‌ మీటర్లు ఏర్పాటుచేయాలని సీఎం కేసీఆర్‌ ఆదేశించారు. ‘ప్రస్తుతమున్న గేజ్‌లు చాలాకాలం క్రితం ఏర్పాటుచేసినవి. చాలా ప్రాజెక్టుల్లో పూడికవల్ల గేజ్‌లు సరిగా చూపెట్టడం లేదు. కొత్తగా గేజ్‌లు ఏర్పాటు చేసి కచ్చితమైన అంచనా వేయాలి. నీటిపారుదలశాఖ భూములు, ఆస్తుల వివరాలతో ఇన్వెంటరీ తయారుచేయాలి. నీటిపారుదలశాఖ సేకరించిన భూములను వెంటనే మ్యుటేషన్‌ చేయించాలి. ప్రాజెక్టుల నిర్మాణంకోసం సేకరించిన భూమిని ఇతరులు ఆక్రమిస్తున్నారు. వాటిపై సీరియస్‌గా ఉండాలి’ అని సీఎం ఆదేశించారు. రాష్ట్రంలో చాలాచోట్ల, ముఖ్యంగా పట్టణ ప్రాంతాల్లోని కాల్వ కట్టలపై నిర్మాణాలు వచ్చాయని, ఇది నేరమే కాకుండా ప్రమాదకరమని సీఎం అన్నారు. ఇప్పుడు అన్ని కాల్వల్లోకి నీళ్లు వస్తాయి కాబట్టి, ప్రమాదాలు జరిగే అవకాశం ఉంటుందన్నారు. అందువల్ల కాల్వలపై నివాసముండేవారు వెంటనే ఖాళీచేయాలని ఆదేశించారు. ఈ విషయంలో అధికారులు కఠినంగా వ్యవహరించి, అక్రమ నిర్మాణాలను తొలగించాలన్నారు. 

నేడు క్యాబినెట్‌ భేటీ 

కరోనా నేపథ్యంలో కేంద్ర ప్రభుత్వం ఆదివారం లాక్‌డౌన్‌ నూతన మార్గదర్శకాలను విడుదలచేయడంతో తెలంగాణలో అనుసరించాల్సిన వ్యూహంపై రాష్ట్ర మంత్రివర్గం సోమవారం సమావేశం కానున్నది. సాయంత్రం 5 గంటలకు ప్రగతిభవన్‌లో ముఖ్యమంత్రి కే చంద్రశేఖర్‌రావు అధ్యక్షతన మంత్రివర్గ సమావేశం జరుగనున్నది. రాష్ట్రంలో నియంత్రిత పద్ధతితో పంటల సాగు విధివిధానాలపై కూడా చర్చించే అవకాశం ఉన్నది.


logo