e-Paper

Advertisement

E-Paper

Apps

Book Your Copy

Visit Telangana Today

Sunday, June 20, 2021
Home Top Slides ఏ పరీక్ష ఎందుకు?

ఏ పరీక్ష ఎందుకు?

ఏ పరీక్ష ఎందుకు?
  • కొవిడ్‌ చికిత్సలో కీలకంగా మారుతున్న ప్రొఫైల్‌ పరీక్షలు
  • పాజిటివ్‌ వచ్చిన 3-4 రోజుల్లో చేయించాలంటున్న వైద్యులు
  • ఇన్ఫెక్షన్లు, రక్త ప్రసరణలో లోపాలను గుర్తించే వెసులుబాటు
  • 40 ఏండ్లు నిండి దీర్ఘకాలిక వ్యాధులున్నవారికి అనివార్యం

ఒక్కొక్కరిలో ఒక్కో లక్షణం.. కొందరిలో తీవ్రత ఎక్కువ.. మరికొందరిలో మోస్తరు లక్షణాలున్నా నాలుగైదు రోజుల్లో పరిస్థితి ఆందోళనకరంగా మారుతున్న వైనం.. ఇదీ కొవిడ్‌ మహమ్మారి ప్రజలను వణికిస్తున్న తీరు. ముందుగానే అప్రమత్తమైతే తప్ప కొవిడ్‌ భూతం
ఆరోగ్యాన్ని ఎంతమేర దెబ్బతీస్తున్నదనేది తెలుసుకోవడం సాధ్యం కాదని వైద్య నిపుణులు చెప్తున్నారు.

హైదరాబాద్‌ సిటీబ్యూరో ప్రధాన ప్రతినిధి, మే 18 (నమస్తే తెలంగాణ): కరోనా పాజిటివ్‌ వచ్చినవారు నాలుగైదు రోజుల్లో కొవిడ్‌ ప్రొఫైల్‌ పరీక్షలు చేయించుకొంటేనే మేలని ఉస్మానియా దవాఖాన జనరల్‌ ఫిజీషియన్‌ డాక్టర్‌ శ్రవణ్‌కుమార్‌ సూచిస్తున్నారు. వైరస్‌ శరీరంలో ఏయే మార్పులకు కారణమైంది? రక్తంలో ఎంత ఇన్ఫెక్షన్‌ చేరింది? ఊపిరితిత్తులు, మూత్రపిండాలు, గుండె తదితర కీలక అవయవాలకు ఏదైనా ముప్పు వాటిల్లిందా? అనేది వైద్యులు శాస్త్రీయంగా గుర్తించేందుకు ఈ ప్రొఫైల్‌ పరీక్షలు దోహదపడతాయని చెప్పారు. ప్రధానంగా రక్తంలో ఎలాంటి ఇన్ఫెక్షన్లు ఉన్నా, రక్తం గడ్డ కట్టే పరిస్థితులు ఉన్నా ఈ పరీక్షల్లో ముందుగానే గుర్తించడం సాధ్యమవుతుందని, తద్వారా వెంటనే తగిన మందులు వాడటం వల్ల వ్యాధి ముదిరి ఇతర అవయవాలపై ప్రభావం చూపకుండా ప్రాణాపాయం నుంచి తప్పించవచ్చన్నారు. ఈ నేపథ్యంలో అసలు కొవిడ్‌ నిర్ధారణ పరీక్షలు, కొవిడ్‌ ప్రొఫైల్‌తో పాటు సీటీ స్కాన్‌లో వ్యాధి నిర్ధారణ ప్రమాణాలను ఓసారి పరిశీలిస్తే…

కొవిడ్‌ పరీక్ష..

సాధారణంగా కరోనా నిర్ధారణకు పరీక్షలు ర్యాపిడ్‌ టెస్టులతోపాటు ఆర్టీపీసీఆర్‌ నిర్వహిస్తున్నారు. ముక్కు, గొంతు నుంచి తీసిన నమూనాలతో ఈ పరీక్షలు నిర్వహిస్తారు. మొదటి దశలో ఆర్టీపీసీఆర్‌ పరీక్షల్లోనూ కరోనా పాజిటివ్‌, నెగెటివ్‌ అని మాత్రమే ఫలితాలు ఇచ్చేవారు. రెండో వేవ్‌లో వైరస్‌ తీవ్రతను కూడా సూచిస్తూ ఫలితాలు ఇస్తున్నారు. వాటి ప్రకారం
సాధారణంగా పరీక్షలో సైకిల్‌ త్రెషోల్డ్‌ వాల్యూ (సీటీ వాల్యూ) ఆధారంగా వ్యాధి నిర్ధారణ చేస్తున్నారు.

  • యూనిట్లు 35 కంటే ఎక్కువ ఉంటే కరోనా నెగెటివ్‌గా నిర్ధారిస్తారు.
  • యూనిట్లు 30-34 వరకు ఉంటే వెరీ హై సీటీ వాల్యూగా నిర్ధారణ. వైరస్‌ తీవ్రత స్వల్పంగా ఉన్నట్టు.
  • యూనిట్లు 25-30 మధ్య ఉంటే హై సీటీ వాల్యూగా నిర్ధారణ. వైరస్‌ తీవ్రత సాధారణంగా ఉన్నట్టు.
  • యూనిట్లు 20-24 మధ్య ఉంటే మధ్యతరహా సీటీ వాల్యూగా నిర్ధారణ.
  • యూనిట్లు 20 కంటే తక్కువగా ఉంటే తక్కువస్థాయి సీటీ వాల్యూగా పరిగణిస్తారు. అంటే వైరస్‌ తీవ్రత ఎక్కువగా ఉన్నట్టు లెక్క.
  • ఈ తీవ్రత ఆధారంగా ర్యాపిడ్‌ యాంటిజెన్‌ పరీక్షల్లో కిట్లపై నిర్ధారణ వేగం కూడా ఆధారపడి ఉంటుందని నిపుణులు చెప్తున్నారు. తీవ్రత ఎక్కువగా ఉంటే కిట్‌పై శాంపిల్‌ వేయగానే పాజిటివ్‌ నిర్ధారణగా రెండు గీతలు వేగంగా ఏర్పడతాయి.

తీవ్రత ఆధారంగా సీటీ స్కాన్‌

సాధారణంగా పాజిటివ్‌ నిర్ధారణ అయిన నాలుగైదు రోజులకు కొవిడ్‌ ప్రొఫైల్‌ నిర్వహిస్తే బాగుంటుందని సూచిస్తున్న వైద్యులు. వారం రోజులైనా కొవిడ్‌ లక్షణాలు తగ్గకపోగా తీవ్రమవుతుంటే వెంటనే సీటీ స్కాన్‌ చేయించుకోవడం మంచిదని డాక్టర్‌ శ్రవణ్‌కుమార్‌ తెలిపారు. దీని ద్వారా వైరస్‌ ఊపిరితిత్తుల్లో ఎంతమేర ప్రభావాన్ని చూపిందనేది శాస్త్రీయంగా నిర్ధారణ జరుగుతుందన్నారు. సీటీ స్కాన్‌లో కరోనా తీవ్రతను కొరాడ్స్‌లో సూచిస్తారు. ఇందులో. ఒకటి నుంచి ఆరు దశలు ఉంటాయి.
కొరాడ్స్‌-1 : ఇబ్బంది ఏమీలేదు
కొరాడ్స్‌-2 : స్వల్ప లక్షణాలు ఉన్నట్టు. ఇది కేవలం కరోనా వల్లనే అని నిర్ధారణ కాదు.
కొరాడ్స్‌-3 : లక్షణాలు ఉన్నట్టు.
కొరాడ్స్‌-4 : కరోనా తీవ్రంగా ఉన్నట్టు.
కొరాడ్స్‌-5 : కరోనా తీవ్రత బాగా ఎక్కువగా ఉన్నట్టు.
కొరాడ్స్‌-6 : కరోనా లక్షణాలు అతి తీవ్రంగా ఉన్నట్టు.
సీటీ సూచికలో ఊపిరితిత్తులపై వైరస్‌ ఎంత ప్రభావం చూపిందనేది నిర్ధారిస్తారు. సాధారణంగా ఊపిరితిత్తుల్లో ఐదు లోబ్స్‌ (భాగాలు) ఉంటాయి. ఒక్కో లోబ్‌లో 0-5 పాయింట్ల చొప్పున మొత్తం 25 పాయింట్లను లెక్కిస్తారు.

  • 0 శాతం ఉంటే ఇన్‌ఫెక్షన్‌ ఏమీ లేనట్టు.
  • ఎనిమిది ఉంటే స్వల్పంగా ఇన్‌ఫెక్షన్‌
  • 8-15 శాతం ఉంటే మోస్తరుగా (మోడరేట్‌) ఇన్‌ఫెక్షన్‌
  • 15 కన్నా ఎక్కువగా ఉంటే ఇన్‌ఫెక్షన్‌ ఎక్కువగా ఉన్నట్టు. ఈ సూచిక ద్వారానే ఊపిరితిత్తులు ఎంతమేర దెబ్బతిన్నాయనే అంచనాకు వస్తారు

రక్త పరీక్షల్లో సమగ్ర వివరాలు…

కొవిడ్‌ పాజిటివ్‌ నిర్ధారణ అయ్యి నాలుగైదు రోజులపాటు లక్షణాలు తగ్గకపోతే కొవిడ్‌ ప్రొఫైల్‌ పరీక్షలు నిర్వహించాల్సిందేనని డాక్టర్‌ శ్రవణ్‌కుమార్‌ తెలిపారు. ముఖ్యంగా 40 ఏండ్ల పైబడిన వారు, దీర్ఘకాలిక రోగాలతో బాధపడేవారు కొవిడ్‌ బారిన పడితే కచ్చితంగా ఈ ప్రొఫైల్‌ పరీక్షలు నిర్వహించుకోవాలని సూచించారు. కొవిడ్‌ వైరస్‌ శరీరంలో ఎలాంటి విధ్వంసాన్ని సృష్టిస్తుందనేది ఇదమిత్థంగా చెప్పలేని పరిస్థితులు ఉన్నాయని, ఒక్కొక్కరి శరీరంలో ఒక్కో తీరుగా వైరస్‌ ప్రభావం కనిపిస్తుందన్నారు. అందుకే నాలుగైదు రోజుల్లో ఈ పరీక్షలు నిర్వహించడం వల్ల వైరస్‌ ప్రభావం ఏయే అవయవాలపై, ఎంత మేర ఉందనేందుకు అంచనాకు రావొచ్చన్నారు.

ప్రొఫైల్‌ పరీక్షల్లో ప్రధానంగా ఆరు రకాల పరీక్షలు నిర్వహిస్తున్నారు

  1. సమగ్ర రక్త చిత్రం (సీబీపీ)
    హిమోగ్లోబిన్‌, ఆర్‌బీసీ, తెల్ల రక్తకణాల సంఖ్య, ప్లేట్‌లెట్స్‌ సంఖ్యను తెలుసుకోవచ్చు. ప్రధానంగా ల్యూకోసైట్స్‌ (న్యూట్రోఫిల్స్‌, లింపోసైట్స్‌, మోనోసైట్స్‌ తదితరాలు) నిర్ణీత ప్రమాణాల్లో ఉన్నాయా? లేదా? అనేది ఈ పరీక్షలో తేలుతుంది. ఇందులో తేడాలు ఉంటే వెంటనే వైద్యులు తగిన మందులను సూచిస్తారు.
  2. రెనల్‌ ఫంక్షన్‌ టెస్ట్‌ (ఆర్‌ఎఫ్‌టీ)
    రక్తంలో యూరియా, నైట్రోజన్‌, సీరంలో కాల్షియం, పొటాషియం, క్లోరైడ్స్‌ మోతాదులు నిర్ణీత ప్రమాణాల్లో ఉన్నాయా? లేదా? అనేది ఈ పరీక్ష ద్వారా తేలుతుంది. వీటిల్లో తేడా ఉంటే రక్తంలో ఇన్‌ఫెక్షన్‌ ఉన్నట్టు వైద్యులు గుర్తించి తగిన మందులు సూచిస్తారు.
  3. ఆర్‌బీఎస్‌-రక్తంలో షుగర్‌
    ఇది సాధారణంగా 150 ఎంజీ/డీఎల్‌ వరకు ఉండొచ్చు. అంతకంటే ఎక్కువగా ఉంటే మధుమేహం ఉన్నట్టు నిర్ధారిస్తారు. మధుమేహ వ్యాధిగ్రస్తులకు కొవిడ్‌ చికిత్సలో వైద్యులు మరింత జాగ్రత్తలు తీసుకొని మందులు సూచిస్తారు.
  4. ఎల్‌డీహెచ్‌-లాక్టిక్‌ యాసిడ్‌ డీహైడ్రోజినెస్‌
    ఇది కీలకమైన పరీక్ష. రక్తంలో ఎల్‌డీహెచ్‌ పరిమాణం ఎంత ఉందనేది ఈ పరీక్షలో తెలుస్తుంది. సాధారణంగా శరీరంలో ఏవైనా టిష్యూస్‌ (పొరలు) దెబ్బతింటే ఎల్‌డీహెచ్‌ పరిమాణం పెరుగుతుంది. సాధారణంగా పెద్దవారిలో ఎల్‌డీహెచ్‌ పరిమాణం రక్తంలో 250 ఐయూ/ఎల్‌ వరకు ఉండొచ్చు. ఇంతకుమించి ఉంటే శరీరంలోని టిష్యూస్‌ దెబ్బతిన్నట్టు. ఇది కూడా రక్తంలో ఇన్‌ఫెక్షన్‌కు దారితీస్తుంది. దీంతో వైద్యులు ఎల్‌డీహెచ్‌ పరిమాణం సాధారణ స్థితికి వచ్చేందుకు మందులను సూచిస్తారు.
  5. డీ-డైమర్‌
    కొవిడ్‌ ప్రొఫైల్‌లో ఇది కూడా కీలకమైన పరీక్ష. రక్త సరఫరాలో ఏమాత్రం లోపాలు తలెత్తినా దీని ద్వారా తెలుస్తుంది. రక్తం నిర్ణీత ప్రమాణాల మేరకు పలుచగా ఉంటే ప్రసరణ సాఫీగా ఉండి ఆరోగ్యంగా ఉంటారు. రక్తనాళాల్లో రక్తం గడ్డ కడితే వెంటనే ఆరోగ్యసమస్యలు వస్తాయి. అందుకే డీ-డైమర్‌ పరీక్షలో రక్తం తీరు ఎలా ఉంటుందనేది తెలుస్తుంది. సాధారణంగా 500 ఎన్జీ/ఎంఎల్‌ వరకు డీ-డైమర్‌ ఉండొచ్చు. అంతకంటే ఎక్కువగా ఉంటే రక్తం గడ్డకట్టే పరిస్థితులకు దారి తీస్తున్నట్టు లెక్క. కరోనా నుంచి కోలుకొన్నవారిలో డీ-డైమర్‌ పరిమాణం పెరిగిన దాఖలాలు అనేకం ఉన్నాయని వైద్యులు చెప్తున్నారు. స్టెరాయిడ్స్‌ వాడటంవల్ల ఈ పరిస్థితి తలెత్తుతుంది. కొవిడ్‌ ప్రొఫైల్‌లో ముందుగానే గుర్తించి తగిన మందులు వాడటం వల్ల ముప్పును తప్పించవచ్చు. లేదంటే డీ-డైమర్‌ పరిమాణం పెరగడం వల్ల పక్షవాతం, గుండెపోటు వచ్చే ప్రమాదం ఉందని వైద్యులు హెచ్చరిస్తున్నారు.
  6. ఐఎల్‌-6
    ఇంటర్‌ల్యూకిన్‌-6 సైటోకైన్స్‌ సమూహం. సైటోకైన్స్‌ శరీరంలో రోగ నిరోధక వ్యవస్థ పనితీరుకు దోహదపడుతాయి. ఐఎల్‌-6 నిర్ణీత ప్రమాణాల మేరకు లేకుంటే ఇన్‌ఫెక్షన్‌, ఆటో ఇమ్యూన్‌ డిజార్డర్‌, గుండె సమస్యలకు దారితీసే ప్రమాదం ఉంది. కరోనా వైద్యంలో స్టెరాయిడ్స్‌ వాడటం వల్ల రోగ నిరోధక వ్యవస్థ ఒక్కోసారి పరిమితికి మించి (హైపర్‌ టెన్షన్‌) పని చేసే అవకాశం ఉన్నది. యువకుల్లో ఇలాంటి పరిస్థితులు కనిపించి రోజుల వ్యవధిలోనే ఆక్సిజన్‌ స్థాయి పడిపోవడం, గుండెపోటుకు దారితీయడం వంటివి సంభవిస్తున్నాయి. ఈ పరీక్షల్లో ఐఎల్‌-6 నిర్ణీత ప్రమాణాలకు మించి ఉంటే (పెద్దవారిలో 1.8 pg/ml కంటే తక్కువ) రక్తంలో ఇన్‌ఫెక్షన్‌ ఉందని, గుండె సమస్యలు ఇతరత్రా ముప్పును సూచిస్తుంది. తద్వారా వైద్యులు ముందుగానే మందులను సూచిస్తారు.
Advertisement
-Advertisement-

తాజావార్తలు

Advertisement
ఏ పరీక్ష ఎందుకు?

ట్రెండింగ్‌

Advertisement