ఏ-విటమిన్ కోసం క్యారెట్, బీ-విటమిన్ కోసం సోయాబీన్, సీ-విటమిన్ కోసం టమాట, డీ- విటమిన్కు వెన్న, ఈ-విటమిన్ కోసం ఆకుకూరలు, కె-విటమిన్ కోసం బంగాళ దుంపలు తినడం మంచిది. టమాట, బీరకాయ, వంకాయ, బెండకాయ, దోసకాయ, మునగ వంటి కూరగాయల్లో కూడా విలువైన పోషకాలు ఉంటాయి. క్యారెట్తో కామెర్లు మాయమవుతాయని, ప్రతిరోజు ఒక క్యారెట్ తింటే మంచిదని వైద్యులు, ఆరోగ్య నిపుణులు సూచిస్తున్నారు. క్యారెట్లో సోడియం క్లోరిన్, ఐరన్తో పాటు విటమిన్లు పుష్కలంగా ఉంటాయి. వీటికి కామెర్లు దరిచేరవు. క్యారెట్ జ్యూస్ తాగితే మలబద్ధకం తొలిపోవడంతో పాటు కంటిచూపు మెరుగవుతుంది.
బీట్రూట్ రసంతో ఎన్నో లాభాలు
బీట్రూట్తో ఎన్నో లాభాలు కలుగుతాయి. ఇందులో చెంచా నిమ్మరసం కలుపుకుని తాగితే కామెర్లు, వాంతులు, వికారం, అతిసారం వంటి వ్యాధుల నుంచి ఉపశమనం పొందవచ్చు. ప్రస్తుతం కరోనా లాంటి వైరస్ నుంచి రక్షణకు క్యారెట్ రసం ఎంతో ఉపయోగపడుతున్నది. శరీరంలో ఉన్న రక్తాన్ని వృద్ధి చేయడానికి బీట్రూట్ ఉపయోగపడుతుంది. దీనిని ఏ కాలంలోనైనా రసం చేసుకుని తాగితే ఆరోగ్యం బాగుంటుంది.
దోసకాయతో ఎంతో చలువ..
దోసకాయతో కూడిన ఆహారం ఒంటికి ఎంతో చలువ. జీర్ణక్రియకు సంబంధించిన వ్యాధులను నివారిస్తున్నది. కడుపు నొప్పి, పొట్ట ఉబ్బరం లాంటి సమస్యలను దూరం చేస్తుంది. ముఖ్యంగా దోసకాయను ఎక్కువ శాతం ప్రజలు పిల్లలకు తినిపిస్తారు. ఎందుకంటే దీనితో చలువ చేయడంతో పాటు ఆరోగ్యం చేకూరుతుంది.
మధుమేహానికి కాకరకాయ..
షుగర్ వ్యాధిగ్రస్తులు కాకరకాయను తినడంతో ఎంతో ఉపయోగం ఉంటుంది. కాకరకాయ అనారోగ్యాన్ని తగ్గిస్తున్నది. కాకర రసం తాగడంతో కలరా లాంటి వ్యాధులు దరిచేరవు. కాకర తినడంతో శరీరంలో చక్కెర శాతం అదుపులో ఉంటుంది. మరెన్నో పోషకాలను కాకర అందిస్తున్నది.
కరోనా బాధితులు వ్యాయామం చేయాలి
కరోనా వచ్చిన వారు ఆందోళన చెందకుండా ఇంట్లోనే ఉండి వ్యాయామం, యోగా తదితర ఆసనాలు తప్పక చేయాలి. మంచి ఆహారం తీసుకోవాలి. కరోనా వచ్చినవారు 80 శాతం మంది ఐసొలేషన్, ఇంట్లోనే ఉండి మంచి ఆహారం తీసుకుంటూ కోలుకుంటున్నారు. ఎలాంటి ఆందోళన చెందాల్సిన అవసరం లేదు. కరోనా బాధితులకు ఆక్సిజన్ లెవల్ పడి పోకుండా ఉండాలంటే ఇండ్లలో, చెట్లున్న ప్రదేశంలో నడక, బ్రీతింగ్, వ్యాయామం చేస్తే పల్స్ పెరిగే అవకాశం ఎక్కువగా ఉంటుంది. వైద్యులు, నిపుణుల సూచనలు పాటించాలి.
రోగ నిరోధకశక్తిని పెంచే టమాట..
మానవశరీరంలో రోగనిరోధకశక్తిని పెంచే గుణం టమాటకే ఉంది. ఇది శరీరంలో విషపదార్థాలను తొలిగిస్తుంది. మధుమేహంతో బాధపడేవారికి టమాట ఎంతో మేలుచేస్తుంది. టమాటతో బరువు తగ్గడంతో పాటు స్థూలకాయం కూడా తగ్గుతుంది. నిత్య జీవితంలో ఎక్కువ శాతం ప్రజలు టమాటను వినియోగిస్తారు. కూరలు, చట్నీలతో పాటు సలాడ్లలో దీనిని వాడతారు.
కొలెస్ట్రాల్ తగ్గించే వంకాయ..
కొలెస్ట్రాల్తో బాధపడేవారికి వంకాయ ఎంతో దోహదపడుతుంది. వంకాయ తినడంతో శరీరానికి పోషక పదార్థాలు పుష్కలంగా అందుతాయి. యాంటీబయోటిక్గా కూడా వంకాయ పనిచేస్తుంది. కూరగాయల్లో వంకాయను రారాజుగా చెబుతారు. ఏ పంక్షన్ జరిగినా వంకాయ కూర ఉండాల్సిందే. చాలా మంది వంకాయను ఇష్టపడి మరీ తింటారు.
పోషకాలతో కూడిన ఆహారం మేలు..
అధిక పోషకాలు ఉన్న ఆహారం తింటే మనిషి ఆరోగ్యంగా ఉంటారు. ముఖ్యంగా సేంద్రియ ఎరువులతో పండించిన ఆహార పదార్థాలు చాలా మేలు చేస్తాయి. సేంద్రియ ఎరువులతో పండించిన పంటల్లో పోషకాలు ఎక్కువగా ఉంటాయి. శాస్త్రవేత్తలు సైతం పోషకాలు గల ఆకుకూరలను తీసుకోవాలని సూచిస్తున్నారు. ప్రస్తుతం జిల్లా వ్యాప్తంగా ఎక్కువ శాతం రైతులు సేంద్రియ ఎరువులతోనే పంటలను పండిస్తున్నారు. సేంద్రియ ఎరువులనే వాడాలని, గ్రామీణ ప్రాంతాల్లో రైతులకు కూడా వ్యవసాయశాఖ ఆధ్వర్యంలో అవగాహన సదస్సులను ఏర్పాటు చేసి సూచనలు చేస్తున్నాం.