విజయములన్నియున్ ప్రజల ప్రేమకు రూపములై లభించగా
ప్రజలకు సేవచేయు వరభాగ్యమునొంది వెలుంగునేతయై
సృజనలతోడ పాలనను ప్రీతిగజేయుచు సాగిపోవు మా
విజయుడు చంద్రశేఖరుడు విశ్వహితైషిగ నిల్చునెప్పుడున్!
పద్యము చంద్రశేఖరము, పద్యము హృద్యము లోకమందునన్
పద్యము భావనాస్పదము, పద్యము గానకళావిలాసమౌ
పద్యము లోకవేద్యమయి భాసిలుచుండును దివ్యవాణియై
పద్యము లేనిదే చదువు వాసిలజాలదు ఛాత్రకోటికిన్
లలితపదావళీ సహితలాస్యము పద్యములో కనంబడున్
కలువలు పూచినట్లు రసగాంగఝరీ సలిలాల దేలుచున్
చెలిమినిబెంచు నీత్యమృతశీకరముల్ వెదజల్లు నిత్యమున్
పలుకగ మేధలో వెలుగు భవ్యవికాసమరీచులెప్పుడున్!
ఆతడు చంద్రశేఖరుడు హాయిగ భాషణతోడ పద్యమున్
చేతము నిండ నింపుకొని శ్రీకరుడై విహరించు భాషణన్
పాతను లేతనున్ కలిపి పాయసరీతి, సభాసరస్వతీ
ఖ్యాతిని నిల్పువాడతడగణ్య వచోనిలయ ప్రహర్షుడై!
కలువలకుంటలో విమలకాంతులు పూచిన కల్వపువ్వుగా
విలువల వర్తనమ్మున వివేచన శీలముతోడ సాగుచున్
పలికిన పల్కులన్ హృదయభావనలొప్పు విధాననుద్ధతిన్
జెలగెడి చంద్రశేఖరుని చేతనతో తెలగాణ వెల్గెడిన్!
గురువుల సేవజేసి, సమకూడిన భాగ్యము తీర్చిదిద్దగా
స్థిరమగు పాలనాగరిమ చేర్చెను రాష్ట్రమునున్నత స్థితిన్
సురల వరాలు శోభిలగ శుభ్రయశోమయ జీవనమ్ముతో
వరలెడి చంద్రశేఖరుడు భాసిలు రాష్ట్రమనోభిరాముడై!
జనుల మనంబులన్ గెలిచి సిద్ధముచేసిన నుద్యమమ్ముతో
ననయ వికాసకార్యముల నందరి మేలును చూడగోరుచున్
సునిశిత పాలన ప్రభల జోరుగ దీనజనాళిగాచు నీ
ఘనుడగు చంద్రశేఖరుడు కాంతులనింపును నిర్విరామతన్!
భవ్య తెలగాణ వరవీణ వఙ్మయాన
దివ్య తెలగాణ సంస్కృతి దీప్తికలన
భిన్నమార్గాలకెనయైన విశ్వనిలయ
చంద్రశేఖర గుణసాంద్ర చారురూప!