ఒకరికొకరికి ముఖ పరిచయం లేకపోయినా, ఎవ్వరో తెలియకపోయినా, ఇబ్బంది పడుతున్న జనానికి, బాధిత వర్గానికి ‘సోషల్ మీడియా’ నేనున్నానంటూ చేయూతనిస్తుంది. ఆన్లైన్ వేదికపై సమస్యను చెబితే.. క్షణాల్లో అందుకు తగిన పరిష్కారం చెబుతుందీ.. మీడియా. మనిషిని మనిషి ఆదరించని ఈ విపత్కర కొవిడ్ కాలంలో ఎంతో మంది బాధితులకు పెద్ద దిక్కుగా, పెద్ద అండగా ఉంటూ ‘సోషల్ మీడియా’ సహాయం చేస్తోంది.
మనిషిని మనిషి ఆదరించని సమయమిది. ఈ కరోనా ఆపత్కాలంలో సోషల్ మీడియా క్రియాశీలక పాత్ర పోషిస్తోంది. కష్టమొచ్చిన వారికి పరిష్కారాన్ని చూపిస్తుంది. ధైర్యాన్నిస్తుంది. సాయం అందిస్తుంది. ‘ప్లీజ్.. హెల్ప్’ అని అడిగితే.. డోంట్ వర్రీ.. మేమున్నామంటూ భరోసానిస్తుంది. సమయంతో సంబంధం లేదు. ‘సదా.. మీ సేవలో..’ అండగా నిలుస్తుంది. నెటిజన్లు సామాజిక మాధ్యమాల ద్వారా తమకు తోచిన సాయం అందిస్తున్నారు. కరోనా గందరగోళ పరిస్థితుల్లో పాజిటివ్ వస్తే ఏ ఆసుపత్రిలో జాయిన్ అవ్వాలి. ఆక్సీజన్ సేవలు ఉన్నాయా? వెంటిలేటర్ దొరుకుతుందా? బెడ్లు ఉన్నాయా? ఇలాంటి ప్రశ్నలన్నీ ఇప్పుడు సోషల్ మీడియాలో విస్తృతంగా దర్శనమిస్తున్నాయి. ఫేస్బుక్, వాట్సప్, ఇన్స్టాగ్రామ్, ట్విట్టర్ తదితర యాప్ల ద్వారా కొవిడ్ పేషెంట్లు, వారి బంధువులకు నెటిజన్లు అండగా నిలుస్తున్నారు.
కొవిడ్ సమయంలో బ్లడ్, ప్లాస్మా, ఆసుపత్రి వివరాలు తదితర పేర్లతో గ్రూపులుగా ఏర్పడి అవసరమైన వారికి హెల్ప్ చేస్తున్నారు. కాలనీలో ఉన్న వాళ్లంతా వాట్సాప్ గ్రూప్ ఏర్పాటు చేసుకుని జాగ్రత్తలు, ఆహారం తదితర వివరాలు పంచుకుంటున్నారు. నేరుగా కలిసి మాట్లాడే పరిస్థితి లేదు. కాబట్టి అందరూ సోషల్ మీడియానే నమ్ముతున్నారు. మన సమస్యను ప్రభుత్వం దృష్టికి తీసుకెళ్లడానికి కూడా నిమిషాల సమయం చాలు. కొవిడ్ కష్ట సమయంలో సేవా మూర్తులు సోషల్ మీడియా ద్వారా చాలా మందికి సహాయ కార్యక్రమాలు చేపడుతున్నారు. – విజయ్, ఉద్యోగి
ప్రస్తుతం సోషల్ మీడియా ప్రతి ఒక్కరికి పెద్ద దిక్కుగా నిలిచింది. నెటిజన్లు అంతా అనేక గ్రూపులుగా ఏర్పడి సమాచారాన్ని పంచుకుంటున్నారు. ఏ సమయంలోనైనా సరే ఏదైనా కష్టమొస్తే సంబంధిత గ్రూప్లో పోస్ట్ చేస్తే చాలు వెంటనే స్పందిస్తుంటారు. కొవిడ్ సమయంలో సోషల్ మీడియా రోల్ ఇంకా పెరిగింది. చాలా మంది నెటిజనులు మరింత యాక్టివ్ అయ్యారు. సేవలు అందించే వారందరూ వారి నెంబర్లను షేర్ చేసి అవసరమైన వారికి అండగా నిలుస్తున్నారు. ఒక్క క్షణంలోనే మన బాధ లక్షలాది మంది దృష్టికి వెళుతుంది. పరిష్కారం దొరుకుంతుంది. – దీప్తి, ఐటీ ఉద్యోగి