అలబామా: అగ్రరాజ్యం అమెరికాలోని అలబామా రాష్ట్రంలో ఘోర రోడ్డు ప్రమాదం జరిగింది. అలబామాలోని ఇంటర్స్టేట్ హైవేపై జరిగిన ఈ ప్రమాదంలో 10 మంది దుర్మరణం పాలయ్యారు. వారిలో 9 మంది చిన్నారులే ఉన్నారు. మృతిచెందిన చిన్నారులంతా 3 నుంచి 17 ఏండ్ల మధ్య వయసు వారే ఉన్నారు. ఓ బీచ్లో విహారయాత్రకు వెళ్లిన చిన్నారులు వ్యాన్లో తిరిగి వస్తుండగా ప్రమాదం జరిగింది.
అలబామాలో గత కొన్ని రోజులుగా టొర్నడోలు విజృంభిస్తుండటంతో ఈ ప్రమాదం జరిగింది. వరదనీటిలో కొట్టుకొచ్చిన వాహనాలు ఒకదానికొకటి ఢీకొంటూ చిన్నారులు ప్రయాణిస్తున్న వ్యాన్ను ఢీకొన్నాయి. దాంతో వ్యాన్లో మంటలు చెలరేగి డ్రైవర్ సహా చిన్నారులంతా ప్రాణాలు కోల్పోయారు. మొత్తం 17 వాహనాలు ఒకదానికి ఒకటి ఢీకొనగా అందులో ఏడు వాహనాలు దగ్ధమయ్యాయి. మిగతా వాహనాల్లో మనుషులు లేకపోవడంతో పెనుప్రమాదం తప్పింది.