ప్రతి అమ్మాయీ అందంగా కనబడాలనే కోరుకొంటుంది. అయితే, అందం అంటే ‘జీరో సైజ్’ కొలతలే అన్న అపోహ పరిశ్రమలో పాతుకుపోయింది. నిజానికి, అందం అనేది చూసే కండ్లనుబట్టి ఉంటుంది.‘ప్రేక్షకులను మెప్పించగలిగే సామర్థ్యమే నటులకు ప్రధాన అర్హత’ అంటున్నది జీ తెలుగు ‘గుండమ్మకథ’ సీరియల్ హీరోయిన్ పూజా మూర్తి. లావు, సన్నం లెక్కలు పక్కన పెట్టి వ్యక్తిత్వానికి విలువ ఇవ్వాల్సిన అవసరం ఉందంటూ ‘జిందగీ’తో తన అనుభవాలను పంచుకొంటున్నది..
మాది కర్ణాటకలోని కోలార్. తాతగారు మైన్స్లో పనిచేసేవారు. నాన్న శ్రీనివాసమూర్తి సివిల్, ఎలక్ట్రికల్ కాంట్రాక్టర్. అమ్మ కళావతి. గార్మెంట్స్ ఎక్స్పోర్ట్ కంపెనీలో మేనేజర్. వారి ఏకైక సంతానం నేను. చిన్నప్పటినుంచీ చాలా ముద్దుగా పెరిగాను. ఎల్కేజీ చదువుతున్నప్పుడు ఓ సాంస్కృతిక కార్యక్రమంలో పాల్గొన్నా. ముఖ్య అతిథిగా వచ్చిన ఓ కన్నడ సీరియల్ దర్శకుడు నా నటనను చూసి మెచ్చుకున్నారు. నన్ను తన సీరియల్ కోసం తీసుకుంటానని అడిగారు. అంత చిన్న వయసులోనే అవకాశం వచ్చినప్పుడు, వదులుకోవడం ఎందుకని అమ్మానాన్న ఒప్పుకొన్నారు. అలా, నటన అంటే ఏమిటో తెలియని రోజుల్లోనే నా నట జీవితం మొదలైంది. కన్నడలో వచ్చిన ‘అనాథ’ నా మొదటి సీరియల్. ఆ తర్వాత, ఏడో తరగతి వరకూ చదువుకొంటూనే ఇరవై అయిదు సీరియళ్ళు, నాలుగు సినిమాల్లో చేశాను. ‘మహానది’ బాలనటిగా చివరి సీరియల్.
అనుకోకుండా..
ఆ తర్వాత, చదువులపైనే దృష్టి సారించా. మళ్ళీ నటించాలనీ, నటిస్తాననీ అనుకోలేదు. డిగ్రీ ఫైనలియర్లో ఉన్నప్పుడు, ఓ సీరియల్లో చేస్తున్న నేహా అనే ఫ్రెండ్ను కలవడానికి షూటింగ్ స్పాట్కు వెళ్ళాను. మేనేజర్ గుర్తు పట్టి నా ఫోన్ నంబరు తీసుకున్నారు. ఓ రోజు ఫోన్ చేసి, రాబోయే సీరియల్లో నన్ను హీరోయిన్గా తీసుకొంటున్నట్టు చెప్పారు. దానికి దర్శక నిర్మాత మధుసూదన్గారు. అలా, సీరియల్స్లో పునఃప్రవేశం జరిగింది. అన్యాయాన్ని అరికట్టే సోషల్ వర్కర్గా నా పాత్రను ప్రేక్షకులు బాగా ఆదరించారు.
అధిక బరువుతో..
చదువుకొంటూనే షూటింగ్స్కి అటెండ్ కావడం, వరుస షెడ్యూల్స్, నిద్రలేమి, వేళాపాళా లేని తిండి.. కారణాలేమైతేనేం శరీరంపై శ్రద్ధ పెట్టకపోవడంతో బరువు పెరిగిపోయాను. దాంతో అవకాశాలు సన్నగిల్లాయి. నటులంటే సన్నగా, నాజూకుగా ఉండాలనుకునే పరిశ్రమ మనది. నా ప్రతిభను, సామర్థ్యాన్ని గుర్తించకుండా శరీరాకృతిని సాకుగా చూపించి అవకాశాలు ఇవ్వనందుకే కొంత బాధనిపించేది. రాని అవకాశాలకోసం ఎదురు చూడటం ఎందుకని, ఓ అమెరికన్ సాఫ్ట్వేర్ కంపెనీలో చేరిపోయా. అక్కడేమో నైట్ షిఫ్టులు. దీంతో మరింత బరువు పెరిగాను.
ఓపిగ్గా చెప్పారు
చిన్నప్పటి నుంచీ సాంస్కృతిక కార్యక్రమాల్లో పాల్గొనడం, సీరియళ్లూ సినిమాల్లో నటించడం కారణం కావచ్చు.. కెమెరా ముందు నేనెప్పుడూ భయపడలేదు. మేము బెంగళూర్లో స్థిరపడినా, మాది కోలార్ కాబట్టి మా ఇంట్లో ఎక్కువగా తెలుగు కలిసిన కన్నడ మాట్లాడేవాళ్లం. దాంతో భాష నాకు సమస్యగా కనిపించలేదు. ఏదైనా అర్థం కాకపోతే నిర్మొహమాటంగా అడిగి తెలుసుకునేదాన్ని. డైరెక్టర్స్ ఓపిగ్గా చెప్పేవాళ్ళు. తెలుగు ప్రేక్షకులు నన్ను తమ అమ్మాయిలానే ఆదరిస్తున్నారు.
పెండ్లి తర్వాత కూడా..
ప్రస్తుతం, పెండ్లి గురించిన ఆలోచన లేదు. నిర్ణయాన్ని అమ్మానాన్నలకే వదిలేశా. ప్రేమ వివాహం అయినా, అరేంజ్డ్ మ్యారేజ్ అయినా అర్థం చేసుకునే భర్త దొరికితే చాలు. అప్పుడే ఏ ఆడపిల్ల అయినా ఆనందంగా ఉంటుంది. బాగా తెలిసిన అబ్బాయిని చేసుకున్నంత మాత్రాన జీవితం సంతోషంగా ఉంటుందని నేననుకోను. అయితే, తర్వాత కూడా నా కెరీర్ను కొనసాగించేలా కన్విన్స్ చేసే పెండ్లి చేసుకుంటా. గొప్ప ధనవంతుడు కాకపోయినా ఫర్వాలేదు కానీ జీవితం, భవిష్యత్తుపై స్పష్టత ఉన్న వ్యక్తి అయితే చాలు. నన్ను, నా కెరీర్ని సపోర్ట్ చేస్తూ నా తల్లిదండ్రులను బాగా చూసుకుంటే చాలు.
గుండమ్మగా తెలుగులోకి..
ఉద్యోగం చేస్తున్నప్పుడే జీ తెలుగు నుంచి ఫోన్ వచ్చింది. ‘గుండమ్మ కథ’ సీరియల్లో నన్ను హీరోయిన్గా చేయమని అడిగారు. కొత్త భాష, కొత్త మనుషులు అని ముందు కాస్త ఆలోచించినా, నా ప్రతిభను నిరూపించుకోవడానికి ఇదో మంచి అవకాశమని భావించా. అనుకున్నట్టుగానే ఈ మూడేండ్లలో ‘గుండమ్మ కథ’ సీరియల్ద్వారా నాకు మంచి గుర్తింపు వచ్చింది. నా పేరుతో కంటే తెలుగు ప్రజలు ‘గుండమ్మ’గానే గుర్తిస్తున్నందుకు సంతోషంగా ఉంది. నటిగా జీ తెలుగు నాకు మరో అవకాశాన్ని ఇచ్చింది. కొన్ని సీరియళ్ళలో అతిథి పాత్రలు కూడా చేశా. మంచి అవకాశం వస్తే సినిమాల్లో నటిస్తా.
… ప్రవళిక వేముల