భీమ్లానాయక్ సినిమాలో అవకాశం రావడం నా అదృష్టం
పవన్ను కలువాలనుకుంటున్నా
కిన్నెరమెట్ల కళాకారుడు మొగులయ్య
అచ్చంపేట, సెప్టెంబర్ 3 : తెలంగాణలోనే తనకు గుర్తింపు వచ్చిందని, ప్రభుత్వం ఇస్తున్న రూ.10 వేల పింఛనే ఆసరాగా బతుకుతున్నానని 12 మెట్ల కిన్నెర ప్రముఖ వాయిద్య కళాకారుడు దర్శన మొగులయ్య తెలిపారు. సినీ నటుడు పవన్కళ్యాణ్ నటిస్తున్న భీమ్లానాయక్ సినిమాలో పాటపాడే అవకాశం రావడం అదృష్టంగా భావిస్తున్నట్టు చెప్పారు. శుక్రవారం నాగర్కర్నూల్ జిల్లా అచ్చంపేటలో ఆయన మీడియాతో మాట్లాడారు. తెలంగాణ రాకముందు కిన్నెరను తీసుకొని సంతలో పాటలు పాడుకుంటూ బతికేవాడినని గుర్తుచేసుకున్నారు. స్వరాష్ట్రంలో సీఎం కేసీఆర్ పాలనలో అంతరించిపోతున్న కళలు, కళాకారులను గుర్తింపు దక్కిందని తెలిపారు. అందులో భాగంగా సీఎం కేసీఆర్ ఉగాది పురస్కారం ఇచ్చి సత్కరించడంతోపాటు 8వ తరగతి సాంఘికశాస్త్రం పుస్తకంలో తనకళ, ఫొటోను ముద్రించి గౌరవించాడని సంబురంగా చెప్పారు. అవకాశం వస్తే హీరో పవన్ కల్యాణ్ను కలుసుకోవాలని అనుకుంటున్నట్టు మొగులయ్య తెలిపారు.