అక్కడ అడుగు పెడితే అంతే..


Sun,April 14, 2019 12:18 AM

ఆ సముద్ర తీరం (బీచ్)లో ఎప్పుడు ఏం జరుగుతుందో తెలియదు. ఒక దశాబ్ద కాలంగా నరికేసిన మనుషుల కాళ్లు ఆ తీరానికి కొట్టుకొస్తున్నాయి. దీంతో ఆ సముద్ర తీరంలో అడుగు పెట్టాలంటేనే ప్రజలు భయపడుతున్నారు. ఇంతకీ ఆ బీచ్ ఎక్కడుంది? తీరానికి కొట్టుకొస్తున్న ఆ కాళ్లు ఎవరివీ? పోలీసులు ఆ కేసులను ఎందుకు ఛేదించలేకపోతున్నారు?

కెనడాలోని బ్రిటీష్ కొలంబియా, అమెరికాలోని వాషింగ్టన్ మధ్య సలిష్ సముద్రం తీరం పేరు వింటే చాలు అక్కడి ప్రజలు వణికిపోతున్నారు. ఇందుకు గత దశాబ్ద కాలంగా జరుగుతున్న మారణకాండయే కారణం. ఈ ఏడాది జనవరి 1న జెట్టీ ఐల్యాండ్ తీరానికి షూ కొట్టుకొచ్చింది. ఆ షూలో మనిషి పాదాన్ని చూసి స్థానికులు భయాందోళనకు గురయ్యారు. ఆ పాదాన్ని స్వాధీనం చేసుకున్న పోలీసులు డీఎన్‌ఏ పరీక్షలు జరుపగా 2016, డిసెంబరు 12 నుంచి ఆచూకీలేని ఆంటోనియో నిల్ అనే వ్యక్తిదని తెలిసింది. ఆ తీరంలో ఏటా నరికేసిన మనుషుల కాళ్లు లభ్యమవుతున్నాయి. ఇప్పటివరకు 21 కాళ్లు తీరానికి కొట్టుకొచ్చాయి. ఈ ఏడాది కూడా ఓ కాలు కొట్టుకొచ్చింది. ఆ కాళ్లన్నింటికీ షూలు ఉండడం గమనార్హం.సలిష్ సముద్రంలో తొలి ఘటన 1887లో చోటుచేసుకుంది. అక్కడి తీరానికి కొట్టుకొచ్చిన షూలో మనిషి పాదాన్ని కనుగొన్నారు. ఆ తర్వాత 1914లో మరో పాదం కూడా అలాగే దొరికింది. అయితే, ఆ తర్వాత మళ్లీ అటువంటి ఘటనలేవీ చోటుచేసుకోలేదు. 2007 నుంచి తీరానికి మనుషుల కాళ్లు, పాదాలు కొట్టుకురావడం పెరిగింది. సలిష్ సముద్ర తీరాన్ని ఆనుకొని ఉన్న వివిధ ప్రాంతాలకు ఆ కాళ్లు కొట్టుకొచ్చేవి. 2007లో రెండు, 2008లో ఐదు, 2009లో ఒకటి, 2010లో రెండు, 2011లో మూడు, 2012లో ఒకటి, 2014లో ఒకటి, 2016లో రెండు, 2017లో ఒకటి, 2018లో రెండు, 2019లో ఒకటి చొప్పున కాళ్లు, పాదాలు కొట్టుకొచ్చాయి. దీంతో ఆ తీర ప్రాంతాలను ఆనుకొని ఉన్న పరిసర ప్రాంతాల్లో ఏం జరుగుతుందో తెలియక ప్రజలు బిక్కుబిక్కుమంటూ జీవిస్తున్నారు. పోలీసులు సైతం ఆయా ప్రాంతాలను జల్లెడ పట్టినా నిందితులను పట్టుకోలేకపోయారు. బాధితుల ఆచూకీ కనుక్కోలేకపోయారు. ఇక్కడ లభించిన అన్ని కాళ్లకు షూలు ఉండటం గమనార్హం.
Beech

పోలీసులు దీనిపై వివరణ ఇస్తూ సలిష్ సముద్రంలో ఆత్మహత్య చేసుకునేవారు, వివిధ ప్రమాదాల్లో మరణించేవారి పాదాలు తీరానికి కొట్టుకొస్తున్నట్లు తెలిపారు. శరీరాలు కాకుండా కేవలం పాదాలు, కాళ్లు మాత్రమే ఎందుకు కొట్టుకొస్తున్నాయనే విషయానికి మాత్రం పోలీసులు జవాబు చెప్పలేకపోతున్నారు. అయితే, సెంటర్ ఫర్ ఫోరెన్సిక్ రీసెర్చ్ కో-డైరెక్టర్ గెయిల్ అండర్సన్ స్పందిస్తూ.. నీళ్లలో ఉండే శరీరాల్లో కాళ్లు, చేతుల భాగాలు సున్నితంగా ఉంటాయి. అయితే, పాదాలకు షూలు ధరించడం వల్ల అవి ఎక్కువగా ప్రవాహ తాకిడికి గురవ్వుతాయి. దీనివల్ల షూలతో సహా కాళ్లు, లేదా పాదాలు శరీరం నుంచి వేరవుతాయి. లేదా సముద్రంలో ఉండే జీవుల దాడి వల్ల పాదాలు ఊడిపోయే అవకాశాలున్నాయి. సలిష్ తీరానికి కొట్టుకొచ్చిన అన్ని కాళ్లకు షూలు ఉండడాన్ని చూస్తే ఇది స్పష్టమవుతుంది అని తెలిపారు. అయితే, ఆ చనిపోయివారు ఎవరు? ఎక్కడివారనే వివరాలు మాత్రం ఇంకా అంతుచిక్కని మిస్టరీగానే ఉండిపోయాయి.

1255
Tags

More News

VIRAL NEWS