ఆహ్లాదకర వాతావరణంతో పాటు ఆరోగ్యానికి ప్రాధాన్యమిస్తూ సూర్యాపేట పట్టణంలో పార్కులను తీర్చిదిద్దుతున్న తీరుపై ప్రశంసలు వెల్లువెత్తుతున్నాయి. మంత్రి గుంటకండ్ల జగదీశ్రెడ్డి సహకారంతోపాత పార్కులతో పాటు కొత్తగా వాటి నిర్మాణ పనులు శరవేగంగా జరుగుతున్నాయి. గతంలో 9పార్కులు ఉన్నప్పటికీ అవి నిర్వహణ కొరవడి ఆనవాళ్లు కోల్పోయాయి. ఈ నేపథ్యంలో కొత్తగా మరో 10 ప్రాంతాల్లో పార్కుల నిర్మాణం చేపట్టి పాత వాటిని సైతం పునరుద్ధరిస్తున్నారు. ఆహ్లాదంతో పాటు ఉదయం, సాయంత్రం వేళల్లో వ్యాయామం చేసుకొనేలా సామగ్రిని ఏర్పాటు చేశారు. ఇప్పటికే కోట్లాది రూపాయల వ్యయంతో సద్దుల చెరువును మినీ ట్యాంక్బండ్గా తీర్చిదిద్దగా.. నలుమూలల్లో పార్కుల నిర్మాణంతో పట్టణ రూపురేఖలు మారిపోయాయి.
సూర్యాపేట జిల్లా కేంద్రంలో పార్కుల సంఖ్య 19కి చేరింది. రూ.1.61కోట్ల వ్యయంతో పాత పార్కులను పునరుద్ధరించగా మరో రూ.3.20కోట్లతో కొత్తవి నిర్మిస్తున్నారు. అమృత్, పట్టణ ప్రణాళిక నిధులతో పాత పార్కులైన హౌజింగ్బోర్డు కాలనీ, అంబేద్కర్నగర్(వాకర్ సెక్షన్), ఎన్టీఆర్ కాలనీ, అంబేద్కర్నగర్, ఆర్.కె.గార్డెన్, కృష్ణకాలనీ, ఎస్వీ డిగ్రీ కళాశాల సమీపంలో, రాజీవ్పార్కు, ఇందిరాపార్కుల అభివృద్ధికి ఇప్పటి వరకు రూ 1.86కోట్లు ఖర్చు చేశారు. కొత్త పార్కులైన అంజనాపురికాలనీ, హనుమాన్నగర్, ఇందిరమ్మకాలనీ-1, ఇందిరమ్మ కాలనీ-2, ఇందిరమ్మ కాలనీ 3, సైనిక్పురి కాలనీ, సైనిక్పురి(పాత ఫైర్స్టేషన్), వెంకట్రామారావు పార్కు, గణేశ్నగర్, జాహ్నవి టౌన్షిప్ పార్కులకు రూ.3.20కోట్లు ఖర్చు చేస్తున్నారు. ఈ పార్కుల్లో అన్ని హంగులతో ప్రజలకు సకల సౌకర్యాలు కల్పిస్తున్నారు. ఒక హబ్, పచ్చదనం పెంపు, బెంచీలు, ఫుట్పాత్లు, ఎల్ఈడీ విద్యుత్ సౌకర్యంతో పాటు మరుగుదొడ్లు, తాగు నీటి వసతి కల్పిస్తున్నారు.
గణేశ్నగర్ పార్కుకు మహర్దశ..
జిల్లా కేంద్రంలోని గణేశ్నగర్లో ఏర్పాటు చేసిన నూతన పార్కు ఆకట్టుకుంటున్నది. మహానగరాల్లోని పార్కులను మైమరిపించేలా అధికారులు అన్ని వసతులు కల్పించారు. వ్యాయామ పరికరాలతో పాటు చిన్నారులకు ఆహ్లాదం కల్పించడానికి బొమ్మలు, విభిన్న ఆకృతుల్లో ఏర్పాటు చేసిన కుర్చీలు ఆకట్టుకుంటున్నాయి. పచ్చిక మధ్యలో ఫుట్పాత్, పార్కు మధ్య భాగంలో ఫౌంటెయిన్తో పాటు పార్కు ముఖద్వారం ప్రతి ఒక్కరికీ ఆహ్లాదాన్ని అందిస్తున్నాయి. రాత్రి వేళల్లో ఫౌంటెయిన్ అందాలను వీక్షించేందుకు ప్రజలు పెద్ద ఎత్తున తరలివస్తున్నారు. శని, ఆదివారాల్లో రద్దీ ఎక్కువగా ఉంటున్నది.
వ్యాయామానికి మంచి వాతావరణం..
పట్టణంలోని పార్కుల్లో ఏర్పాటు చేసిన వ్యాయామ పరికరాలు ఎంతో ఉపయోగకరంగా ఉన్నాయి. మా ప్రాంతాంలోనే మేము వాకింగ్ చేస్తున్నాం. పార్కులో ఆహ్లాదకర వాతావరణంలో వ్యాయామం చేయడం చాలా ఆనందాన్నిస్తున్నది. పార్కులను అభివృద్ధి చేయడం చాలా ఆనందంగా ఉంది. మా పిల్లలను కూడా పార్కులకు తీసుకువెళ్తుండడంతో చాలా సంతోషంగా గడుపుతున్నారు.
ప్రజలు సద్వినియోగం చేసుకోవాలి
సకల హంగులతో ఏర్పాటు చేస్తున్న పార్కులను పట్టణ ప్రజలు సద్వినియోగం చేసుకోవాలి. పట్టణంలో ఇప్పటికే పాతవి 9పార్కులు ఉండగా కొత్తవి పది ఏర్పాటు చేస్తున్నాం. 19పార్కులను కూడా అన్ని హంగులతో తీర్చిదిద్దుతున్నాం. అన్ని పార్కుల్లో వ్యాయామ పరికరాలతో పాటు చిన్నారులకు ఆహ్లాదాన్ని పంచేలా బొమ్మలను, పచ్చికను ఏర్పాటు చేస్తున్నాం.