నేడో రేపో అంగారక గ్రహంపై అడుగుపెట్టడానికి సిద్ధంగా ఉన్నా.. అత్యాచారాలు మాత్రం ఆగడం లేదు. క్రూరమృగాలు సైతం మానవ మృగాలను చూసి అసహ్యించుకొనే పరిస్థితి నెలకొంది. నగరాలూ, పట్టణాలతో పోలిస్తే.. బస్తర్ అటవీ ప్రాంతమే నయం. ఇక్కడ, ప్రతి పౌరుడూ పసిబిడ్డలను కన్నబిడ్డల్లా, వృద్ధులను కన్న తల్లుల్లా చూస్తారు. లైంగిక నేరాలకు చోటే లేదు.
ఛత్తీస్గఢ్ రాష్ట్రం, బస్తర్ జిల్లా. ఇంద్రావతి నదీతీరంలోని అటవీప్రాంతం ‘మురియా’ అనే ఆదివాసీ తెగకు చిరునామా. వీరిని చూసి నగరవాసులు చాలా నేర్చుకోవాల్సి ఉంది. ఎందుకంటే, ఆ సమూహంలో లైంగిక నేరాలకు స్థానం లేదు. ఇప్పటికీ, ఒక్క కేసు కూడా నమోదైన దాఖలాలు లేవు. కారణం.. బిడ్డలు పుట్టిన దగ్గర నుంచీ పెద్దయ్యే వరకూ వారిని ఓ బాధ్యతతో పెంచుతారు. సంస్కృతి, సంప్రదాయాలను నేర్పుతారు. విలువల గురించి బోధిస్తారు.
గోండుల నుంచి..
బస్తర్.. భారతీయ గిరిజన సంస్కృతికి, అనేక గిరిజన సమూహాలకు నిలయం. ఇక్కడ నివసిస్తున్న పలు జాతుల్లో ‘బైసన్ హార్న్ మురియా’ తెగ కూడా ఒకటి. వీరు గోండుల నుంచి విడిపోయి ప్రత్యేక తెగగా ఏర్పడినట్లు చరిత్రకారులు చెబుతారు. వీరి ఆలోచనలు ప్రగతిశీలంగా కనిపిస్తాయి. మహిళల రక్షణ విషయంలో తీసుకొనే చర్యలు ఆధునిక సమాజాన్నీ అబ్బురపరుస్తాయి. పాములు, తాబేళ్లు, చేపలు, పులులు, మేకలను దైవాలుగా పూజిస్తారు. ఆ జంతువుల అంత్యక్రియలు కూడా శ్రద్ధగా నిర్వహిస్తారు. వాటిని చంపరు, తినరు. కేవలం పప్పు ధాన్యాలను, కొన్ని సాధు జంతువులనే ఆహారంగా తీసుకుంటారు. ప్రకృతికి భంగం వాటిల్లకుండా, భూమికి నష్టం జరగకుండా పంటలు ఎలా పండించాలో పిల్లలకు నేర్పుతారు. వీళ్లు స్వతహాగా ప్రకృతి ఆరాధకులు.
లైంగిక నేరాల్లేని సమాజం
మురియా తెగలో సెక్స్ సంబంధిత నేరాలు ఒక్కటంటే ఒక్కటి కూడా నమోదు కాకపోవడానికి కారణం.. వారి లైంగిక సంప్రదాయాలే. ఈ తెగ యువతీ యువకుల మధ్య ప్రేమను గుర్తిస్తుంది, నవతరం అభిప్రాయాలను గౌరవిస్తుంది. కన్నవాళ్లు తమ పిల్లలతో లైంగిక ఆరోగ్యం గురించి స్వేచ్ఛగా చర్చిస్తారు. ఇష్టమైనవారితో సహజీవనం కూడా నిషిద్ధమేం కాదు. ‘ఘోతుల్’ అనే వలపు విడిదిలో ప్రేమికులు కలుసుకోవచ్చు. కానీ, అక్రమ సంబంధాల విషయంలో మాత్రం కఠినంగా ఉంటారు. కాబట్టే, వివాహేతర సంబంధాలు అక్కడ కనిపించవు. పెండ్లిని పవిత్ర కార్యంగా భావిస్తారు. భర్త చనిపోయిన స్త్రీకి అత్తగారే వరుణ్ని వెతికి పెండ్లి చేయిస్తారు. కట్నాలు, కానుకల వంటివి అస్సలు ఉండవు.
ఆహార్యం..
ఈ తెగలో ఆడా,మగా కలిసే ఇంటి పనులూ, పొలం పనులూ చేస్తారు. ఇతర తెగలతో పోల్చితే మురియా ప్రజలు సంపన్నులే. వ్యవసాయం, అటవీ ఉత్పత్తులు వీరి ప్రధాన ఆదాయ వనరు. ముల్లంగి, వంకాయ, మిర్చి, టమాట వంటి కూరగాయలను ఇష్టంగా తింటారు. ముఖ్యమైన వేడుకల్లో, అదీ తమ తెగవారు తయారు చేసిన మద్యాన్నే స్వీకరిస్తారు. ప్రకృతి పండుగలు, తొలకరి, ఇతర వేడుకలప్పుడు మురియా నృత్యాన్ని ప్రదర్శిస్తారు. వాళ్ల దృష్టిలో జీవితమే ఓ పండుగ. హద్దులులేని ఆనందం, విలువలతో కూడిన జీవనం.. వీరి ప్రత్యేకత.