మన ఆహారమే మన ఆరోగ్యాన్ని నిర్ణయిస్తుందన్న మాటను కొట్టిపారేయలేం. కానీ, ఏ మేరకు నిర్ణయిస్తుందన్న విషయంలో రకరకాల వాదనలు ఉన్నాయి. అందుకే మిషిగాన్ విశ్వవిద్యాలయం.. మన జీవితం మీద ఏ ఆహార పదార్థం ఎంత ప్రభావం చూపుతుందో స్పష్టంగా విశ్లేషించే ప్రయత్నం చేసింది. ఇందుకోసం ఏకంగా 5,800 పదార్థాలను పరిశీలించింది. వాటిలో కొన్నిటిని నిమిషాల లెక్కన కొలిచే ప్రయత్నమూ చేసింది. ఉదాహరణకు ఒక హాట్ డాగ్ తినడం వల్ల మన జీవితంలో 36 నిమిషాల ఆరోగ్యం తగ్గిపోతుందని తేల్చింది. దానికి బదులు పప్పుధాన్యాలు తినడం వల్ల 26 నిమిషాల ఆరోగ్యకరమైన జీవితం తిరిగివస్తుందని ఊరించింది. అంతేకాదు! మన ఆరోగ్యం మీదా, పర్యావరణం మీదా ఆహారపు ప్రభావాన్ని అంచనా వేసి రెడ్, గ్రీన్, ఎల్లో అంటూ మూడు జోన్లుగా విభజనలు చేసింది. తృణధాన్యాలు, పండ్లు, సేంద్రియ కూరగాయలు లాంటివన్నీ పచ్చని విభాగంలోకి వస్తే… బీఫ్, గొర్రె మాంసం వగైరాలు రెడ్ జోన్లోకి వచ్చాయి.