న్యూఢిల్లీ : భారత దిగ్గజ మాజీ క్రికెటర్ సచిన్ టెండూల్కర్ గుర్తించి శ్రీలంక లిజెండరీ స్పిన్నర్ ముత్తయ్య మురళీధరన్ ఆసక్తికర వ్యాఖ్యలు చేశారు. సచిన్ చాలా గొప్ప బ్యాట్స్మెన్ అంటూనే ఆటలో ఆయన లోపాలను ఎత్తిచూపారు. తన కెరియర్లో సచిన్లో బ్యాటింగ్లో ఓ బలహీనతను గమనించానని, లిటిల్ మాస్టర్ ఆఫ్ స్పిన్ను ఎదుర్కోవడంలో కాస్త ఇబ్బంది పడతారని అభిప్రాయపడ్డారు. ఈఎస్పీఎన్ క్రిక్ ఇన్ఫో ఛానల్కు ఇచ్చిన ఇంటర్వ్యూలో మురళీధరన్ సచిన్ బ్యాటింగ్ శైలి గుర్తించి పలు విషయాలు చెప్పుకొచ్చారు. ‘సచిన్కు బౌలింగ్ చేయడంలో పెద్దగా భయపడాల్సిన పని లేదు. అతను చాలా జాగ్రత్తగా వికెట్ను కాపాడుకుంటాడు. బంతిని అంచనా వేసి ఆడటంలో దిట్ట. నా కెరియర్లో సచిన్ బ్యాటింగ్లో ఓ చిన్నలోపం గుర్తించా. లెగ్స్పిన్ను సమర్థవంతంగా ఎదుర్కొనే సచిన్.. ఆఫ్స్పిన్ విషయంలో కాస్త బలహీనుడు. చాలామంది ఆఫ్ స్పిన్నర్లు ఈ విషయాన్ని రుజువు చేశారు. సచిన్ నాకు కూడా చాలాసార్లు వికెట్ సమర్పించాడు. ఈ విషయాన్ని నేనెప్పుడు సచిన్ వద్ద ప్రస్తావించ లేదు. బహుశా ఆయనకు ఆఫ్స్పిన్ ఆడటంలో కాస్త బలహీనత ఉందని నా అభిప్రాయం. సచిన్ చాలా క్లిష్టమైన ఆటగాడు. అతడిని అవుట్ చేయడం చాలాకష్టం’ అని మురళీధరన్ అన్నారు. ఆస్ట్రేలియా ఫాస్ట్బౌలర్ బ్రెట్లీ తరువాత అత్యధిక సార్లు సచిన్ను అవుట్ చేసిన ఘనత మురళీధరన్దే. టెస్టుల్లో 800 వికెట్లు, వన్డేల్లో 530కిపైగా మురళీధరన్ పడగొట్టాడు.