ఓ మగువ తెగువ. ఓ తండ్రి ధైర్యం. ఓ అర్థంకాని సమస్య. అర్థమయ్యే పరిష్కారం. ..వీటన్నిటి కలబోత ‘ఫ్యామిలీ మ్యాన్-2’ వెబ్ సిరీస్. ఓటీటీలో రోజుకో కొత్త సిరీస్ మొదలవుతూనే ఉంటుంది. ‘ఫ్యామిలీ మ్యాన్-1’కి వచ్చినంత క్రేజ్, తర్వాతి సిరీస్కూ ముందే వచ్చేసింది. కారణం, అందులో సమంత నటిస్తుందన్న వార్తే! ఆ క్రేజ్ను అంతే జాగ్రత్తగా హ్యాండిల్ చేస్తూ.. ‘ఫ్యామిలీమ్యాన్-2’ ను విడుదల చేశారు.
రెగ్యులర్ చిత్రీకరణ కనిపించదు. రొటీన్ డైలాగులు వినిపించవు. ట్రైలర్ విడుదలతోనే శ్రీలంకలోని తమిళ ఈలం పోరాటం కథావస్తువని తెలిసిపోయింది. ఇందులో టైగర్లను తప్పుగా చూపించారన్న ప్రచారమూ జరిగింది. అయితే, ఈ సిరీస్ను వివాదాస్పద అంశాలు లేకుండా ఓటీటీకి ఎక్కించింది నిర్మాణ బృందం. సిరీస్ విడుదల నిలుపుదల చేయాలన్న రచ్చ కొనసాగుతుండగానే.. అమెజాన్ ప్రైమ్లో హిందీ వెర్షన్ స్ట్రీమింగ్ మొదలైంది. వాస్తవాలను అంతర్లీనంగా చూపిస్తూ చిత్రీకరించిన విధానం సగటు ప్రేక్షకుడికి నచ్చుతుంది. కథా రచన దశలోనే చాలా పరిశోధన జరిగిందనిపిస్తుంది. మొత్తానికి కథా రచయిత-దర్శకులు రాజ్ అండ్ డీకే, సుపర్ణ్ వర్మ ఫ్యామిలీ మ్యాన్ మొదటి సిరీస్తో పోల్చితే, రెండో సిరీస్ను మరింత అర్థవంతంగా, ఆకట్టుకునేలా చిత్రీకరించారు.
‘టాస్క్’ సీనియర్ ఏజెంట్ శ్రీకాంత్ తివారీ పాత్రలో మనోజ్ బాజ్పాయ్ పకడ్బందీగా నటించారు. తమిళ టైగర్ రాజ్యలక్ష్మి అలియాస్ రాజీగా సమంత తన నటనలోని మరోకోణాన్ని ఆవిష్కరించారు. ఎత్తులు, పైఎత్తులతో సిరీస్ ఆద్యంతం ఆసక్తికరంగా సాగుతుంది. కథనంలో పట్టు, నటీనటుల పెర్ఫార్మెన్స్ ఫ్యామిలీ మ్యాన్-2ను ఇంకో రేంజ్కు తీసుకెళ్లాయి. కొన్నికొన్ని సన్నివేశాల్లో సమంత యాక్టింగ్కు ‘టేక్ ఏ బౌ’ అనాల్సిందే. టాస్క్ ఏజెంట్గా, తండ్రిగా రెండు పార్శాలనూ అద్భుతంగా పండించారు మనోజ్ బాజ్పాయ్. మొదటి రెండు మూడు ఎపిసోడ్లు కాస్త జీడిపాకంలా అనిపించినా, కథ వేగం పుంజుకున్న తర్వాత ప్రేక్షకుడు అందులో లీనమైపోతాడు. రాజీ మానవబాంబుగా మారి దేశ ప్రధానిని హతమార్చడానికి ఎలాంటి కుట్ర చేసింది, శ్రీకాంత్ తివారీ దానిని అడ్డుకున్నాడా, లేదా? చివరికి ఏం జరుగుతుంది.. అనే విషయాలను ఉత్కంఠ భరితంగా చిత్రీకరించి ప్రేక్షకులను కట్టిపడేశారు దర్శకులు. అందుకే, కాస్త అటూ ఇటూగా గంటేసి చొప్పున నిడివి ఉన్న తొమ్మిది ఎపిసోడ్లను ఏకబిగిన చూస్తున్నారు.